აქამდე შინაურ სარბიელზე დაუმარცხებელი „გურია“, დღეს მეტად დრამატულ პაექრობაში დამარცხდა ქუთაისის „ტორპედოსთან“. შეხვედრა როგორც პროგნოზირებადი იყო საინტერესო საცქერი გამოდგა, ბოლო წუთებამდე შენარჩუნებული მოჭარბებული ინტრიგით.
იმერული კლუბი ბოლო ტურებში აღმავლობით თამაშობს და 5 თამაშში ოთხი მოგება და ერთი ფრე გააჩნდა. ეს კარგი ფორმა გუნდმა ლანჩხუთშიც შეინარჩუნა და სწორედ ამის ხარჯზე დაჯაბნა მეტოქე.
თავის მხრივ გურულებს მოგება გავარდნაზე ფიქრს ავიწყებდა და ზედა ოთხეულის პერსპექტივასაც უჩენდა. თუმცა, სათამაშო კლასში თუ არა ფიზიკურ კონდიციებში სტუმართა უპირატესობამ თავისი გაიტანა.
შეხვედრა დაიწყო და ცივი შხაპიც მიიღეს თემურ ლორიას შეგირდებმა. ვინძლო, საქართველოს ჩემპიონატების ისტორიაში ყველაზე სწრაფი გოლი ვიხილეთ. მე-12 წამი იქნებოდა, ცენტრიდან გათამაშებული ბურთი სტუმარმა ჭელიძემ გრძელი პასით ჩია თარგამაძეს რომ შეაყოლა. ამანაც ჯერ კიდევ გამოუფხიზლებელ მცველებს ჩაუქროლა და მეკარესთან პირისპირ შეყრილმა შორეულ კუთხეში გაიტანა.
ასეთი ჰანდიკაპის დაძლევა „გურიას“ ახალ გამოწვევას უმზადებდა, თანაც მე-8 წუთზე იძულებითი შეცვლაც მოუხდა, ცინცაძემ კუნთი გაიწყვითა და შესაცვლელი შეიქნა.
და მაინც, მასპინძლები არ გატყდნენ და აგრესიულად მოთამაშე მეტოქეს საკუთარი თამაში მოახვიეს თავს. ეგ იყო ოღონდ, რომ იმერლები დაცვაში მედგრად იდგნენ და სწრაფ კონტრჩხვლეტებსაც არ ივიწყებდნენ. ძალიან დაძაბული და ხისტი გამოდგა პირველი ტაიმი, სადაც იყო ბევრი ბრძოლა, საგოლე მომენტები კი – ცოტა.
მთავარი მოვლენები შესვენების შემდეგ გველოდა. აი, ბოლო 20 წუთი კი მართლაც საამო საცქერი და დრამატიზმით აღსავსე გამოდგა. ლორიამ ისიანი ჩართო თამაშში და გაუმართლა. ვილი ვერაა სასურველ ფორმაში , მაგრამ 7 წუთში ლამაზი გოლი მაინც გაჩარხა. საჯარიმოდან მოგერიებულ ბურთს გარეთ დაუხვდა და შეუჩერებლივ ისეთი დაჰკრა, სტუმარი მეკარე სახტად დატოვა.
ამ გოლმა ახალი ინტრიგა დაბადა, ფრე არც მასპინძელს აწყობდა და როგორც გაირკვა არც სტუმარს. 1:0-ზე „ტორპედოს“ ორჯერ შეეძლო მეტოქის დასჯა, მაგრამ უგერგილოდ იმოქმედეს შემტევებმა. აი, გაშვებული გოლის შემდეგ მარცხის სურნელმა იმერლები გამოაფხიზლა და ჯერ კიდევ შემორჩენილი ენერგიით ათამაშდნენ ისინი. თავის მხრივ მოსაგებად დაიძრა „გურიაც“ და სამჯერ ახლოსაც იყო მიზანთან. ჯერ შალამბერიძემ კოშკაძის დიდებული გადაცემა გოლად ვერ ასახა – ოდნავ ააცილა შორეულ ძელს, მერე კი 5 წუთში ორი შანსი გაანიავა ისიანმა. პირველ ეპიზოდში ახლოდან ბურთს ფეხი ხეირიანად ვერ შეაგება, მეორედ კი, კარგად დაარტყა, მაგრამ ოდენ ხარიხა შეაზანზარა.
ამასობაში სტუმრებმა მოღლილ მეტოქეს აქტიურად შეუტიეს და ხეირიც მოიმკეს.ორი სწრაფი კონტრიერიში წამოიწყეს და ორივე გოლად აქციეს. ჯერ ბაბუნაშვილმა ისარგებლა მცველთა დაბნეულობით, ორიოდ წუთში კი კიდევ ერთმა ახალშემოსულმა კვარაცხელიამ საწყისი წუთის შოკი გაუმეორა მასპინძლებს.
ამ მოგებით „ტორპედომ“ „გურიას“ 2 ქულით გადაუსწრო და მერვე ადგილიც წაართვა. ერთიცაა, ამ წაგების შემდეგ გურულები მართალია გასავარდნ ზონასთან შორს არიან, მაგრამ 8 ქულა აშორებთ და ორი რთული მატჩი ელით, ჯერ „ბათუმთან“ სტუმრად, მერე კი შინ „დინამოსთან“.
ამ ტურში ცუდი ფაქტი დაფიქსირდა -„ზესტაფონმა“ ფინანსური კრიზისი ვერ აიტანა და პროტესტის ნიშნად არ გავიდა სათამაშოდ თავისსავე სტადიონზე გორის „დილასთან“. არადა ასეთი ფაქტი კარგა ხანია ქართული ფეხბურთის ელიტაში არ მომხდარა.
გუნდებმა მატჩი ასეთი შემადგენლობებით ჩაატარეს:
გურია – მ. გოგუაძე, ჭეიშვილი, ცინცაძე (გოგიაშვილი 8), კილაძე, მჭედლიშვილი, კოშკაძე, ბენაშვილი, ზაზულია, მოსიაშვილი (მათიაშვილი 82), შალამბერიძე ვ. წილოსანი (ისიანი 65).
ტორპედო – შეყრილაძე, ადამაძე, ტუღუში, პუხაევი (მამასახლისი 46), კანკია, ქიმაძე, კლიმიაშვილი (ბაბუნაშვილი 83), მირცხულავა, ჭელიძე, კვერნაძე (კვარაცხელია 60), კირკიტაძე.
გოლები: კირკიტაძე (1), ისიანი (72), ბაბუნაშვილი (86), კვარაცხელია (88).
