"დემოკრატიული მოძრაობის" ლიდერის ნინო ბურჯანაძის განცხადებით, ,,ნაციონალურ მოძრაობასთან" ბრძოლა არა ოპოზიციის, არამედ ხელისუფლების ვალდებულებაა, რასაც თავს არიდებს.
ნინო ბურჯანაძემ ეს, გაზეთ ,,კვირის ქრონიკასთან" საუბრისას განაცხადა.
"ჩვენ "ნაცმოძრაობას" მაშინ ვებრძოდით, როცა ისინი ხელისუფლებაში იყვნენ. არ ვფიქრობ, რომ მათ ისევ ჩვენ უნდა ვებრძოლოთ. ხელისუფლებამ კეთილი ინებოს და გაინძრეს. ჩვენი მხრიდან კი ყველაფერს გავაკეთებთ, რომ "ნაცმოძრაობის" ხელისუფლებაში დაბრუნება არ დავუშვათ.
ხელისუფლებასთან ხელჩართულ ბრძოლას ნამდვილად არ ვაპირებთ, რადგან დღეს ,,ქართული ოცნება" გაცილებით ნაკლები ბოროტებაა, ვიდრე "ნაციონალური მოძრაობა" იყო. აქედან გამომდინარე, ჩვენი ბრძოლის მეთოდებიც კორექტულია",- აღნიშნავს ნინო ბურჯანაძე.
მისივე თქმით, "ნაციონალებმა" იციან, რომ ხელისუფლებაში არჩევნების გზით ვერ მოვლენ, ამიტომ მუდმივად ვითარების დაძაბვას ცდილობენ.
"ნაცმოძრაობას" ხალხზე კი არ შესტკივა გული, მათი მიზანია პოლიტიკური ტემპერატურის აწევა, საკუთარი თავის წარმოჩენა, როგორც დაჩაგრულ ოპოზიციის, ამით "ნაცმოძრაობა" დასავლეთში უზამაზარ ქულებს იწერს. იციან, რომ ხელისუფლებაში არჩევნების გზით ვერ მოვლენ, ამიტომ ცდილობენ, სიტუაცია დაძაბონ და არიონ", – განაცხადა ნინო ბურჯანაძემ.
