"დემოკრატიული მოძრაობის" გურიისა და ოზურგეთის ორგანიზაცია, მორიგ განცხადებას აქვეყნებს, სადაც "ქართულ ოცნებას" ქალაქის მერიაში განვითარებულ მოვლენებზე პოლიტიკური შეფასების გაკეთებას სთხოვს.
"დემოკრატიული მოძრაობის" წარმომადგენლები აღნიშნავენ, რომ ქალაქ ოზურგეთის მერიის მხიდან გამოქვეყნებული იყო უპასუხისმგებლო და ადამიანებისათვის შეურაცხმყოფელი განცხადება, რომელიც ოზურგეთის მერის მხრიდან ფოლკლორული ანსამბლების ”იადონისა” და ”ელესას” დაფინანსებას შეწყვეტას ეხება.
"როგორც საზოგადოებისათვის ცნობილია, ანსაბლის ღვაწლმოსილი წევრები აღშფოთებულნი იყვნენ არამარტო დაფინანსების შეწყვეტით, არამედ მერის მხრიდან მათდამი ცინიკური დამოკიდებულებით. ჩვენს გარდა, ხსენებულ ფაქტს არაერთი საზოგადო მოღვაწის განცხადებები მოჰყვა, რომლებიც ჩვენსაზე გაცილებით უფრო მწვავე გახლდათ. ამასთანავე, მათი მხრიდან მერის მოქმდებები უფრო გულახდილად და შინაარსობრივად იყო შეფასებული. ოზურგეთის მერიის ოფიციალურ ვებ-გვერდზე
ა.წ. 7 მაისს გავრცელებული განცხადების შინაარსის მიხედვით, ანსამბლების ”იადონისა” და ”ელესას” წევრებმა ვერ გაათვითცნობიერეს, რომ მათი ემოცია შესაძლებელი იყო პოლიტიკურ ჯგუფებს და ჩასაფრებულ ადამიანებს გამოეყენებინათ ადგილობრივი ხელისუფლების წინააღმდეგ წესებისა და მორალის გარეშე ბრძოლაში.
ძალიან სამწუხაროა, რომ დღეს ოზურგეთს ჰყავს მერი, რომელიც არასწორი გადაწყვეტილების მიღების შემდეგაც კი ვერ ათვიცნობიერებს დამდგარ შედეგს, რასაც ადგილი არა მარტო ამ შემთხვევაში ჰქონდა. ასევე ცუდია, რომ მერია, თავისი უფლებამოსილებების განხორციელების ნაცვლად, ოფიციალურ განცხადებაში მორალის განმარტებებს იძლევა, რადგანაც ამისათვის არც კანონიერი უფლებამოსილება გააჩნია და არც ასეთი შეფასებისათვის საჭირო ადამიანური რესურსი. მაგრამ თუ კი მორალზე მიდგება საქმე, პირველ რიგში გადაწყვეტილებების მიმღები პირის მორალი და მისი ბრძოლის წესებია სამსჯელო და მისი ეს საქციელი აუცილებლად უნდა გახდეს ოზურგეთელების შეფასების საგანი.
ჩვენდა სამწუხაროდ, მერიისთვის ახლაც კი გაუგებარია, რომ საკითხი ეხება ჩვენს კულტურულ მემკვიდრეობას და არა რესტორნის ბენდს. მერიისთვის ასევე გაუგებარია, რომ ოზურგეთის მერის მხრიდან ანსამბლების დაფინანსებიდან მოხსნა და ამ ანსამბლების დაშლა გარდაუვალია, რაც ძალიან უარყოფითად აისახება ჩვენი რეგიონის კულტურულ ცხოვრებაზე.
”გაერთიანებული დემოკრატიული მოძრაობის” ოზურგეთის ორგანიზაცია აცხადებს, რომ ოზურგეთის მერის მოქმედებებზე პოლიტიკური პასუხისმგებლობა მთლიანად ეკისრება ”ქართულ ოცნებას”, რომელიც, სამწუხაროდ, როგორც პოლიტიკური ძალა, არანაირ შეფასებას არ აძლევს ოზურგეთში მიმდინარე მოვლენებს და არ (ან ვერ) აცნობიერებს თუ რაოდენ საზიანოა ეს ყველაფერი ჩვენი საზოგადოების კულტურული განვითარებისთვის"
" გურია ნიუსი" აღნიშნულთან დაკავშირებით დაუკავშირდა კოალიცია "ქართული ოცნების" ოზურგეთის რაიონული ორგანიზაციის თავმჯდომარეს, ოზურგეთის მუნიციპალიტეტის საკრებულოს თავმჯდომარეს დავით დარჩიას, რომლის განმარტებითაც, ქალაქ ოზურგეთის მერიაში ყველაფერი რიგზეა და ის საგანგაშოს ვერაფერს ვერ ხედავს.
" რა პოლიტიკური შეფასება უნდა მივცე, არანაირი პრობლემა არაა, მიმდინარეობს რეორგანიზაციები, რაც ჩვეულებრივი პროცესია, ჩემი აზრით ყველაფერი რიგზეა"_ გვითხრა პარტიის თავმჯდომარემ.
