ოზურგეთის მუნიციპალიტეტში მიწებთან დაკავშირებული აჟიოტაჟი კვლავ აქტუალურია. დაბა ლაითურისა და დაბა ნასაკირალის მოსახლეობამ, წლების წინ უკანონოდ გაყიდული მიწების ნაკვეთებთან დაკავშირებით, აქციები არაერთხელ გამართეს და ხელისუფლებას ამ პრობლემის მოგვარება სთხოვეს.
ამჯერად დაბა ლაითურსა და ნასაკირალის მოსახლეობის მოთხოვნებს, ოზურგეთის მუნიციპალიტეტის სოფელ ბაილეთის მოსახლეობაც უერთდება. რამდენიმე დღის წინ, ბაილეთში მცხოვრებლები უკანონოდ გაყიდული მიწების თაობასთან დაკავშირებით კიდევ ერთხელ შეიკრიბნენ და ადგილობრივი ხელისუფლების წარმომადგენლების მისამართით პროტესტი გამოთქვეს. მათი განცხადებით, დაახლოებით 15 წლის წინ სახელმწიფომ პრივატიზაციით მიაკუთვნა მიწები, რომლითაც ისინი წლების განმავლობაში სარგებლობდნენ, როგორც ბაილეთის მცხოვრებლები აღნიშნავენ, დაახლოებით 7 წლის წინ, აღნიშნული მიწები მათთან შეთანხმების გარეშე გაიყიდა ერთ-ერთ პიროვნებაზე, დღეს კი როგორც შეიტყვეს, მიწების მფლობელი ეროვნებით არაბი გამხდარა.
სოფელ ბაილეთიდან "გურია ნიუსს" მოსახლეობის ნაწილი დაუკავშირდა და ინფორმაცია მოგვაწოდა:
"დღეს მოსახლეობას ის არაბი უნდა შეხვდეს, რომელმაც ჩვენი მიწები იყიდა. გაოგნებულები ვართ, რამდენიმე აქცია გავაკეთეთ მიწებთან დაკავშირებით, სად არ ვირბინეთ და მოვითხოვეთ, მაგრამ დღემდე პასუხი არავის უგია, არც არავინ დაინტერესებულა ჩვენი მოთხოვნებით, გაყიდეს ჩუმად, ჩვენდა დამოუკიდებელად და რაც მთავარია უკანონოდ, ამაში სოფლის დეპუტატისა რწმუნებულის ხელიც ერია, ახლა გავიგეთ, ისიც შემთხვევით, რომ აღნიშნული მიწები არაბს უყიდია, დღეს უნდა შეგვხვედროდა, რადგან ალბათ იცის ჩვენი ამბავი, რომ ამ ტერიტორიაზე არავის შესვლის უფლებას არ მივცემდით და არ ვასარგებლებდით, ველოდებოდით, თუმცა არ გამოჩნდა" _ გვითხრა მოსახლეობამ.
ადგილზე შეკრებილი, სოფელ ბაილეთის მცხოვრებლები რაისა ჯოჯუამ, ციური მინდიაშვილმა, მთვარისა ბერიძემ, ციური დოლიძემ, "გურია ნიუსს" მიწებთან დაკავშირებულ ატეხილ აჟიოტაჟთან ერთად სოფლის უმთავრეს პრობლემებსაც გაუსვეს ხაზი:
"ჩვენი სოფელი მდიდარი იყო. უამრავი ფაქტი არსებობს, როგორ გაასხვისეს ლეკიანის მიწები, სახნავ-სათესი ფართობები. თავს შევაკლავთ და არავის არ მივცემთ იმის უფლებას, რომ ჩვენი მიწა შემოღობოს და დაისაკუთროს. გზას გადავკეტავთ, არ გავჩერდებით, ჩვენი კუთვნილი მიწა ჩვენს დაუკითხავად გაიყიდა,რამდენჯერმე ისე, რომ ჩვენ არავინ საქმის კურსში არ ჩაგვაყენა, გაგვაგებინეთ, სად და ვის უნდა მივმართოთ? მოსახლეობა ამას ასე არ დატოვებს".
ციური მინდიაშვილის თქმით, ის ოზურგეთის მუნიციპალიტეტის გამგებელს მერაბ ჭანუყვაძეს "გურია ნიუსის" მეშვეობით ამ საკითხის მოგვარებას სთხოვს.
"არჩევნებზე შემოვხაზე მერაბ ჭანუყვაძე, რომ ვნახე მომეწონა, კაი ბიჭი ჩანდა, გადაეცით, როგორც შემოვხაზეთ, ისე გადავხაზავთ, თუ მიწების პრობლემის მოგვარებაში არ მოგვეხმარება"_ გვითხრა მინდიაშვილმა.
ოზურგეთის მუნიციპალიტეტის გამგებლის მერაბ ჭანუყვაძის წარმომადგენელი სოფელ ბაილეთში, სპარტაკ მამულაიშვილი, "გურია ნიუსთან" აცხადებს, რომ მოსახლეობის მოთხოვნები სამართლიანია.
მისი თქმით, სოფლის ხელმძღვანელობასთან შეთანხმების გარეშე მოხდა მიწების გასხვისება, იმის გამო, რომ ამ ადამიანებს ელექტრონული წესით დარეგისტრირებული არ ჰქონდათ აღნიშნული ნაკვეთები.
"ჯერ იჯარით გაიცა და შემდეგ გაყიდეს, მეპატრონე, როგორც გავიგეთ არის არაბი, ის რამდენიმე დღის წინ დაგვიკავშირდა, ჩვენ ავუხსენით, რომ შეხვედროდა მოსახლეობას და თავად გასაუბრებოდა, რომ დაცული ყოფილიყო ხალხის ინტერესიც, ნამდვილად არ ვიცოდით ისე გაყიდა სახელმწიფომ ეს მიწები, იმის გამო, რომ მოსახლეობას არ ჰქონდა დარეგისტრირებული და ელექტრონულად არ ჩანდა, 7 წლის წინ იჯარით გაიცა როინ დარჩიაზე, მაგრამ მე ამ პიროვნებამ როდის მიყიდა ამ არაბს, ეს ნამდვილად არ ვიცი, სამწუხაროდ, ჩვენ მიწების გაკონტროლება არ გვევალება", _ აღნიშნავს გამგებლის წარმომადგენელი.
მისივე თქმით, მოსახლეობის მოთხოვნები კანონიერია.
"ცოდვები არიან ნამდვილად, არ ეკითხებიან, ისე იყიდება მიწები. საქმის კურსში არც ჩვენ ვართ. ზემოდან ხდება ეს ყველაფერი, ვინ ყიდულობს, ხალხმა არ იცის", _ აცხადებს მამულაიშვილი.
