დღეს, ქალაქ ოზურგეთის მუნიციპალიტეტის საკრებულოს ბიუროს სხდომა გაიმართა, სადაც დეპუტატებმა რამდენიმე საკითხი განიხილეს, მათ შორის, ა(ა)ი.პ. ოზურგეთის მუნიციპალური კულტურის ცენტრი-ს და ა(ა)ი.პ. ქალაქ ოზურგეთის მუნიციპალიტეტის მოსწავლე ახალგაზრდობის სახლის რეორგანიზაციის პროცესის დასრულებასა და შედეგად ახალი სუბიექტის ქალაქ ოზურგეთის მუნიციპალიტეტის კულტურისა და მოსწავლე ახალგაზრდობის ცენტრის დაფუძნების შესახებ, მუნიციპალიტეტის მერისათვის თანხმობის მიცების თაობაზე ისაუბრეს.
აღნიშნული საკითხი ბიუროს სხდომაზე ქალაქ ოზურგეთის მუნიციპალიტეტის მერიის იურისტმა გიორგი ხუროშვილმა წარმოადგინა.
საკრებულოს დეპუტატმა ლავრენტი ბიგვავამ ხუროშვილს საკითხის არასრულად მიწოდებაში შენიშვნა მისცა და განუმარტა, რომ თუ ეს საკითხი საკრებულოს სხდომაზე შესაბამისი გაანგარიშებით გათვლილი, ტექნიკურ – ეკონომიკური გაანგარიშებით დამდგარი შედეგით არ იქნება შემოტანილი, ის დაწერს შესაბამის საბიუჯეტო დასკვნას.
"რა მოგვცა ორი ა.(ა).ი.პ. რეორგანიზაციის ცვლილებამ, რა მოგვცა ეკონომია, რა შედეგი მოჰყვა ამას, ეს არ უნდა ახლდეს ბიუროზე შემოტანილ საკითხს დაკონკრეტებულად? რამდენი მუშაკი განთავისუფლდა, რამდენი დარჩა, რა თანხა დაიზოგა, რამდენით შემცირდა საწვავისა და მივლინების ხარჯი, თუ სხვა და სხვა, ეს არ უნდა იყოს საკრებულოს სხდომაზე დაკონკრეტებული? საბიუჯეტოს საკითხში მე მკაცრ შეფასებას დავდებ, თუ ეს ისე არ იქნება შემოტანილი, როგორც საჭიროა"_აღნიშნა ბიგვავამ ბიუროს სხდომაზე.
რა ეფექტი ექნება ამ ორი აიპის გაერთიანებას, დეპუტატებს შენიშვნა აქვთ, – მიმართა საკრებულოს თავმჯდომარემ გელა კობალაძემ ქალაქ ოზურგეთის მერს ბეგლარ სიორიძეს, რაზეც სიორიძემ განმარტა, რომ ა.(ა.)ი.პ. -ების გაერთიანებით წელიწადში 80 000 ლარის ეკონომიას მიიღებს ბიუჯეტი.
"24 პროცენტით ხელფასები გავუზარდეთ თანამშრომლებს. რა ვიცი, სულ ტაშფანდურა–ტაშფანდურას ძახილი იყო და შევამცირეთ 80 000 ლარით და ახლა, პირიქით, რატომ შეამცირეთო ერთი ამბავია ატეხილი, 12 ანსამბლს ვერ შეინახავს ქალაქის ბიუჯეტი და კეთილი ინებოს თემთა მუნიციპალიტეტმა, ჩვენ 6 ანსამბლს შევინახავთ და ექვსი შეინახოს თემთა მუნიციპალიტეტმა, მას მიჰყავს ეს ანსამბლები, სახლში არავინ არ უშვებს, ყველა ღონისძიება, რაც ოზურგეთში ტარდება, ცეკვავენ თუ მღერიან, იყო კულტურის სამსახურიდან, დაფინანსება კი – ჩვენი, ახლა გავინაწილეთ და მგონი, სწორადაც მოვიქეცით", _აღნიშნა ბეგლარ სიორიძემ.
