თბილისის მერია ოლივერ და მარჯორი უორდროპების მონუმენტური სახვითი ხელოვნების ძეგლის დიზაინისა და სახარჯთაღრიცხვო დოკუმენტაციის შედგენის მიზნით კონკურსს აცხადებს. ინგლისური არისტოკრატიული გვარის წარმომადგენლების ძეგლი რუსთაველის გამზირზე, ოლივერ უორდროპის სკვერში განთავსდება.
თბილისის მერიის საკონკურსო კომისიის გადაწყვეტილებით, საკონკურსო წინადადებების მიღება 2015 წლის 8 ივნისს 12:00 საათზე დასრულდება.
შენიშვნებისა და რეკომენდაციების წარდგენა შესაძლებელია 2015 წლის 1 ივნისამდე, რათა კომისიამ დროულად შეძლოს მათი მიღება, განხილვა და საჭიროების შემთხვევაში საკონკურსო დოკუმენტაციაში ცვლილებების შეტანა.
ინგლისელი დიპლომატი, მოგზაური და მთარგმნელი ოლივერ უორდროპი საქართველოში 1887 წელს ჩამოვიდა.ოლივერ უორდროპმა შეისწავლა ქართული ენა და მჭიდრო კონტაქტები დაამყარა ქართველ მწერლებთან და საზოგადო მოღვაწეებთან ილია ჭავჭავაძესთან, აკაკი წერეთელთან, თედო სახოკიასთან, გრიგოლ ვოლსკისთან. ოლივერ უორდროპმა შეისწავლა საქართველოს ისტორია და ლონდონში ინგლისურ ენაზე გამოსცა წიგნი "საქართველოს სამეფო". ოლივერ უორდროპმა თარგმნა ასევე სულხან-საბა ორბელიანის "სიბრძნე სიცრუისა" და "ვისრამიანი". იგი ინგლისში გამოსცემდა ქართველოლოგიურ ჟურნალ "გეორგიკას". ოლივერ უორდროპი ინგლისის მთავრობამ საქართველოში ოფიციალურ წარმომადგენლად მოავლინა. მოგვიანებით საქართველოს მისი და მარჯორი უორდროპიც ეწვია. მან თარგმნა შოთა რუსთაველის "ვეფხისტყაოსანი", ილია ჭავჭავაძის "განდეგილი", "ქართული ხალხური ზღაპრები" და "წმინდა ნინოს ცხოვრება".
