მალტაში საქართველოს პარლამენტის დელეგაციის ვიზიტი დაიწყო. დელეგაციამ, რომელსაც საქართველოს პარლამენტის თავმჯდომარე, დავით უსუფაშვილი ხელმძღვანელობს, დღეს შეხვედრა მალტის პრეზიდენტთან, მარი-ლუიზ კოლეირო პრეკასთან გამართა.
მხარეებმა ორმხრივი ურთიერთობების განვითარების და გაღრმავების, ტურიზმის, ნაოსნობის და საფინანსო სფეროში თანამშრომლობის შესახებ ისაუბრეს.
შეხვედრის დასრულების შემდეგ, დავით უსუფაშვილმა მასმედიისთვის კომენტარი გააკეთა.
მისი განცხადებით, ეს საქართველოს საპარლამენტო დელეგაციის პირველი, საპასუხო ვიზიტია მალტაში.
"ჩვენ ჩამოვედით, ვინაიდან მალტასთან ძალიან მნიშვნელოვანია მეგობრული ურთიერთობების გაღრმავება. მოგეხსენებათ, ეს ქვეყანა არის ევროკავშირის წევრი ქვეყანა და პატარა მალტას ისეთივე ერთი ხმა აქვს იმ საკითხების გადაწყვეტაში, როგორც ევროკავშირის დიდ წევრებს, ამიტომ ჩვენი პოზიციების გასაძლიერებლად, ყველა მიმართულებით, გვჭირდება ამ ქვეყანასთან საკმაოდ მჭიდრო ურთიერთობის შენარჩუნება", _ განაცხადა დავით უსუფაშვილმა.
მისივე თქმით, შეხვედრაზე ისაუბრეს ტურიზმისა და ნაოსნობის სფეროში თანამშრომლობაზეც.
"ჩვენ შეგვიძლია ვითანამშრომლოთ ტურიზმის სფეროში, ნაოსნობის სფეროში, სადაც მალტა პირველ ადგილზეა ევროკავშირის ქვეყნებს შორის და მეხუთე ადგილზეა მსოფლიოში მალტის დროშის ქვეშ მცურავი სანაოსნო საშუალებებით. მოგხსენებათ, ეს ქვეყანა, ისტორიულად, ძალიან წინ არის წასული ამ სფეროში და როდესაც ჩვენ ვსაუბრობთ იმ დიდ პროექტებზე, რომელიც უკავშირდება საქართველოს და მისი საზღვაო პორტების გამოყენებას, ამ საკითხებში მალტასთან მჭიდრო ურთიერთობა იქნება ძალიან მომგებიანი ჩვენი ქვეყნისთვის და ჩვენი ბიზნესისთვის", _ აღნიშნა საქართველოს პარლამენტის თავმჯდომარემ.
როგორც დავით უსუფაშვილმა განაცხადა, ისაუბრეს საფინანსო მიმართულებით თანამშრომლობის გაღრმავებაზეც.
"შეხვედრა დავტოვე იმ განცდით, რომ მალტა ძალიან მონდომებულია, მოწადინებულია იმისთვის, რომ საქართველოსთან მჭიდრო თანამშრომლობა გააგრძელოს და გააღრმაოს. ასე რომ, ჩვენ ხმელთაშუა ზღვის არეალში კიდევ ერთ სერიოზულ მეგობარს ვიძენთ ამ ქვეყნის სახით", _ განაცხადა ჟურნალისტებთან საუბრისას დავით უსუფაშვილმა.
დღესვე, საქართველოს საპარლამენტო დელეგაცია შეხვედრას მალტის პარლამენტის საგარეო საქმეთა კომიტეტის თავმჯდომარესთან, ლუჩიანო ბუსუტილთან და კომიტეტის წევრებთან გამართავს.
დელეგაცია, რომლის შემადგენლობაში დავით უსუფაშვილი და ზვიად კვაჭანტირაძე შედიან, მალტაში ვიზიტს 21 მაისს დაასრულებს.
