"გურია ნიუსი" ჩაის გადამამუშავებელ ("ნატურა თი კომპანი") საწარმოში, რომელიც სოფელ გურიანთაში მდებარეობს, ორი დღის წინ იმ მიზნით მივიდა, რომ გადაემოწმებინა მუშაობს თუ არა პრემიერ-მინისტრ ირაკლი ღარიბაშვილის მიერ ტელეკამერების წინ გახსნილი ჩაის გადამამუშავებელი საწარმო. სამწუხაროდ, "გურია ნიუსის" ჟურნალისტები მაშინ ქარხანაში არ შეუშვეს, თუმცა, ინფორმაციის ვებზე გასვლისთანავე დაგვიკავშირდა საწარმოს ხელმძღვანელი ბერდია ელგუჯაური, რომელმაც ნება დაგვრთო მოგვენახულებინა საწარმო სამუშაო პროცესში:
_ ვიცით, რომ იყავით საწარმოს სანახავად მოსულები, მაგრამ იმ დღეს ვერ მოხერხდა თქვენი შესვლა. წინასწარ უნდა ვიცოდეთ, დამიკავშირდით და არასდროს არ იქნება საწარმოში ჟურნალისტების შესვლა პრობლემა, _ გვითხრა ელგუჯაურმა.
მისივე თქმით, საწარმო 2015 წლის 5 მაისიდან შევიდა ექსპლუატაციაში. ქარხანაზე 800 ათას ლარზე მეტი დაიხარჯა; კომპანიის მფლობელმა შეღავათიანი აგროკრედიტის პროექტის აგროლიზინგის კომპონენტით 59 ათას 778 აშშ დოლარის სესხი აიღო, რომლითაც ჩაის გადამამუშავებელი დანადგარები შეიძინა. სესხის 12 %-ს სოფლის მეურნეობის პროექტების მართვის სააგენტო იხდის, ხოლო 3%-ს _ მეწარმე.
_ საწარმო ნედლეულის დიდ პროცენტს საკუთარი პლანტაციისგან იღებს, რომელიც დაბა ლაითურის მიწის ნაკვეთებზე მდებარეობს. ყველაზე მთავარი ის არის, რომ ადგილობრივი მოსახლეობისგან ვიღებთ ჩაის ფოთოლს და ერთ კილოგრამში მათ 2 ლარს ვუხდით. ასევე მომავალში ვაპირებთ, რომ სხვა კუთხითაც იყოს დატვირთული ეს საწარმო, რადგან წლის განმავლობაში ის ხალხი, ვინც ჩვენთანაა დასაქმებული, მხოლოდ სეზონურად მუშაობენ, _ თქვა ბერდია ელგუჯაურმა. ბერდია ელგუჯაურის თქმით, საწარმოში, ამ ეტაპზე, 18 ადამიანი მუშაობს.
საწარმო საქართველოს პრემიერ-მინისტრმა ირაკლი ღარიბაშვილი, გასულ კვირას გახსნა და მან შემდეგი სახის კომენტარი გააკეთა: "ეს არის თვალსაჩინო მაგალითი, როგორ ეხმარება სახელმწიფო ადგილობრივ წარმოებას. ქარხანაში მუშავდება ეკოლოგიურად სუფთა ჩაი, რომელიც გადის ექსპორტზე. ჩვენ მაქსიმალურად ვუწყობთ ხელს ექსპორტზე ორიენტირებული წარმოების განვითარებას. უახლოეს მომავალში მთავრობა მეჩაიეობის განვითარების პროგრამას წარადგენს, რათა მაქსიმალურად დასაქმდეს ადგილობრივი მოსახლეობა და აღდგეს ჩაის პლანტაციები. ეს არის ძალიან მომგებიანი და რენტაბელური წარმოება, რომელიც ათასობით ადამიანს დაასაქმებს", – განაცხადა პრემიერ-მინისტრმა.
