სოფლის მეურნეობის პროექტების მართვის სააგენტომ პროექტ "დანერგე მომავალის" საგაზაფხულო სამუშაოებისთვის განაცხადების მიღება დაასრულა. ამ დროისთვის სულ 14 განაცხადია დაფინანსებული, რაც ჯამში, 90 ჰექტარზე ახალი ბაღების გაშენებას ითვალისწინებს, ამისთვის კი, სააგენტომ 567 ათასი ლარის დაფინანსება გამოყო.
შეგახსენებთ, რომ პროექტ "დანერგე მომავლის" გახორციელებისთვის ორი წლის განმავლობაში 15 მილიონი ლარი დაიხარჯება. მისი მიზანია საქართველოს ყველა მუნიციპალიტეტში (თბილისის, რუსთავის, ბათუმის და ფოთის გარდა) სასოფლო-სამეურნეო მიწების მიზნობრივი გამოყენების ზრდის მაქსიმალური ხელშეწყობა, მრავალწლოვანი ბაღების გაშენებისა და სანერგე მეურნეობების მოწყობის გზით. ახალი პროექტის განხორციელების შედეგად, მეწარმეები და ფერმერები შეძლებენ აწარმოონ მაღალი ხარისხის პროდუქტი, რომელიც ადგილობრივ ბაზარზე იმპორტირებულ პროდუქციას გაუწევს კონკურენციას. ამავე დროს, გაიზრდება ქვეყნის აგრარული პროდუქციის საექსპორტო პოტენციალი.
პროექტის ფარგლებში სახელმწიფო თანადაფინანსების მოცულობა შეადგენს: ბაღის გაშენების შემთხვევაში _ ნერგების ღირებულების 70%-ს და წვეთოვანი სარწყავი სისტემის ღირებულების 50%-ს _ არაუმეტეს 100 ათასი ლარის ოდენობით ერთ ბენეფიციარზე.
რაც შეეხება სანერგე მეურნეობებს, ამ შემთხვევაში, სახელმწიფოს დაფინანსება მეურნეობის შექმნის ღირებულების 50% -ია, ერთ ბენეფიციარზე არაუმეტეს 150 ათასი ლარისა.
როგორც პროგრამა "დანერგე მომავლის" მენეჯერი ლევან დოლიძე აცხადებს, პროგრამის პირველი ეტაპი წარმატებით გახორციელდა და ივლისიდან საშემოდგომო სამუშაოებისთვის განაცხადების მიღებას დაიწყებენ:
"საგაზაფხულო სამუშაოები უკვე დავასრულეთ. სულ მივიღეთ 15 განაცხადი, აქედან 14 განაცხადი დაკმაყოფილებულია და ხელშეკრულებებიც გაფორმებულია, დაფინანსების პირველი ტრანშებიც გაცემულია. სულ ჯამში მოთხოვნის დაფინანსება განაცხადების მიხედვით 567 ათასი ლარია, რომლის ძირითადი ნაწილი, 400 ათასი ლარი უკვე გავეცით. დანარჩენ თანხას კი, ბენეფიციარები მაისის ბოლომდე აითვისებენ", _ აღნიშნავს დოლიძე.
მისივე თქმით, პროგრამით დაინტერესება ძირითადად შიდა ქართლის მოსახლეობის მხრიდან იყო, თუმცა, თითო-თითო პროექტი გურიიდან და ქვემო ქართლიდანაც დააფინანსეს. აღსანიშნავია, რომ პროგრამის ფარგლებში შეზღუდვა არ ყოფილა და ნებისმიერ დაინტერესებულ პირს შეეძლო განაცხადის გაკეთება:
"ძირითადი რეგიონი შიგა ქართლია, სადაც ვაშლის ბაღები გაშენდება. ჯამში, პროგრამის ფარგლებში, საგაზაფხულოდ 90 ჰა-ზე გაშენდა ბაღი. აქედან 80 ჰა-ზე ვაშლი, დანარჩენზე კი ქლიავი, ბალი და ატამი. პროგრამის ფარგლებში გაშენებულ ბაღებში ვაშლის ახალი ჯიშების მრავალფეროვნებაა. ძირითადად, ნახევრად ინტენსიური და ინტენსიური ბაღები გაშენდა, რომელიც მაღალი მსხმოიარობით გამოირჩევა. 1 ჰა-ზე დაახლოებით 50-80 ტონა მოსავალს იძლევა, რაც საკმაოდ დიდი ოდენობაა.
უნდა აღინიშნოს ისიც, რომ ერთი განაცხადი გვქონდა ქვემო ქართლიდან და ერთიც გურიიდან, რომელიც დაფინანსებულია. პროგრამა მთელ საქართველოს მოიცავს. თუმცა, შიდა ქართლის რეგიონი უფრო მომზადებული შეხვდა მას. ძირითადად, ბენეფიციარების უმრავლესობა, ვინც ჩვენთან განაცხადი შემოიტანა ისედაც გეგმავდნენ ბაღების გაშენებას, თუმცა არა იმ მოცულობით, რა მოცულობითაც ახლა პროგრამის ფარგლებში გააშენეს.
პირველ ეტაპზე, დაახლოებით ვფიქრობდით, რომ 50 ჰა-ს გაშენებას მოვასწრებდით, თუმცა 90 ჰა უკვე გაშენებულია. იქედან გამომდინარე, რომ პროგრამა პირველად 6 მარტს დაანონსდა, სანამ მოსახლეობამდე ინფორმაცია მივიდა და მათ პროექტში მონაწილეობის სურვილი გამოთქვეს, ცოტა დაგვიანდა საგაზაფხულო სამუშაოები, თუმცა, კარგია, რომ პროექტი გაზაფხულზე დავიწყეთ. ამ აქტივობამაც ძალიან კარგი სურათი გვაჩვენა, მომავალში რა უნდა გავაკეთოთ", _ აღნიშნავს დოლიძე.
შეგახსენებთ, რომ ბაღის გაშენების ან სანერგე მეურნეობის მოწყობის სრულად დაფინანსების მიზნით, სახელმწიფო თანადაფინანსებასთან ერთად, ბენეფიციარს შეუძლია ისარგებლოს შეღავათიანი აგროკრედიტის პროგრამითაც. როგორც დოლიძე განმარტავს, ამ მხრივ ბენეფიციარებს შეზღუდვა არ აქვთ.
"გარდა სახელმწიფო თანადაფინანსებისა, პროგრამაში ჩართული ბენეფიციარები დამატებით სარგებელს მიიღებენ: სასოფლო-სამეურნეო კოოპერატივები საჩუქრად მიიღებენ შესაწამლ აპარატებს; კვალიფიკაციის ამაღლების მიზნით, ყველა ბენეფიციარი, რომელსაც დავაფინანსებთ, მიიღებს ტექნიკურ დახმარებას ბაღის/სანერგე მეურნეობის მოვლის პრაქტიკული ტრენინგისა და თეორიული კურსის სახით. ყველა ბენეფიციარს აუნაზღაურდება ნიადაგის ლაბორატორიული შემოწმების ღირებულებაც", _ აღნიშნავს დოლიძე.
მისივე თქმით, პროგრამა ბაღების ინტენსიურ მონიტორინგსაც ითვალისწინებს:
"ყველა ბენეფიციარს ჩაუტარდება მონიტორინგი, ვისზეც დაფინანსება გაიცა. მათ ხელშეკრულებით აქვთ გაწერილი ვადები, რა ვადაშიც უნდა მოხდეს საბოლოოდ ბაღის გაშენება და მოწყობა სარწყავი სისტემით. ამის შემდეგ მოხდება მონიტორინგი რა და როგორ გაკეთდა", _ ამბობს დოლიძე.
რაც შეეხება მიღებული პროდუქტის რეალიზაციის საკითხს, პროგრამა "დანერგე მომავალის" მენეჯერი ამბობს, რომ ჯერჯერობით ასეთი ხელშეწყობის პროგრამა სახელმწიფოს აქ აქვს, თუმცა, ადგილობრივ ბაზარზე პროდუქტი იმპორტირებულ საქონელს კონკურენციას აუცილებლად გაუწევს, ასევე შესაძლებელი იქნება, რომ ბენეფიციარებმა თავიანთი პროდუქტი ევროკავშირის ქვეყნების ბაზარზეც გაიტანონ:
"ჯერჯერობით, მსგავსი ხელშეწყობის პროგრამა მხოლოდ ვაშლზე გვაქვს, რომელიც გათვლილია ისეთი დაბალი ხარისხის ნაყოფზე, რომელიც საბაზრო მოთხოვნებს ვერ აკმაყოფილებს. რაც შეეხება რეალიზაციას, ამის ხელშეწყობის პროგრამა ჯერჯერობით არ არის, თუმცა მივიჩნევთ, რომ ბაზარზე არის იმის საშუალება, რომ რეალურად ქართული პროდუქტით ჩანაცვლდეს იმპორტირებული ვაშლი, რადგან ძალიან მაღალი ხარისხი აქვს. ექსპორტის კუთხითაც ხელსაყრელია მისი გატანა თუნდაც ევროკავშირის ქვეყნებში", _ ამბობს დოლიძე.
რაც შეეხება საშემოდგომო სამუშაოებს, როგორც პროექტის მენეჯერი ამბობს, განაცხადების მიღება ივლისის შუა რიცხვებიდან დაიწყება.
"გვინდა, რომ 15 ივლისიდან დავიწყოთ განაცხადების მიღება. უკვე არის კიდევაც მოსახლეობის მხრიდან ინტერესი. შემოდგომასაც თავისი დატვირთვა აქვს, რადგან არის ბევრი კულტურა, რომელიც უმჯობესია ამ პერიოდში გაშენდეს. ამიტომ, ამ პერიოდში გაათმაგებულ და გაასმაგებულ მუშაობას ველოდებით", _ აღნიშნავს დოლიძე.
შეგახსენებთ, რომ დაფინანსების მისაღებად, დაინტერესებულმა პირებმა სოფლის მეურნეობის პროექტების მართვის სააგენტოში უნდა წარმოადგინოს სანერგე მეურნეობის შექმნის დეტალური პროექტი (პროექტის წარმოდგენა უნდა განხორციელდეს სააგენტოს მიერ შემუშავებული სტანდარტის მიხედვით), თანმდევ დოკუმენტაციასთან ერთად, რის შემდგომაც, სააგენტო განიხილავს მას და პროექტის პირობებთან შესაბამისობის შემთხვევაში, დასამტკიცებლად წარუდგენს "თანადაფინანსების კომიტეტს", პროექტის დამტკიცების შემთხვევაში კი, სააგენტო განახორციელებს სანერგე მეურნეობის დაფინანსებას.
სოფლის მეურნეობის პროექტების მართვის სააგენტომ პროგრამის "დანერგე მომავალი" განხორციელება თებერვლის ბოლოდან დაიწყო. პროგრამის წარმატებით განხორციელების შედეგად, 1 000 -1 200 ჰა-ზე თანამედროვე ტიპის ბაღი და 30 – 40 ახალი, თანამედროვე სანერგე მეურნეობა უნდა გაშენდეს, რაც ხელს შეუწყობს, ერთი მხრივ, ადგილობრივ ბაზარზე იმპორტჩანაცვლების, ხოლო, მეორე მხრივ, საექსპორტო პოტენციალის ზრდის პროცესს.
(R)
