დაითხოვეს თუ არა სამსახურიდან პოლიციელები პატრულთან დაპირისპირების გამო

“გურია ნიუსის“ წყაროს ინფორმაციით, შსს გურიის მთავარი სამმართველოს თანამშრომლები, პოლიციელები _ გია კვასდიანი და ზვიად ოსეფაიშვილი სამსახურიდან უნდა გაათავისუფლონ.
“გურია ნიუსის“ წყაროს ინფორმაციით, რამდენიმე თვის წინ პოლიციელი გია კვასდიანი პოლიციელის ფორმით ავტომანქანას მთვრალი მართავდა. იგი გააჩერა პატრულმა და არაფხიზელ მდგომარეობაში ავტომანქანის მართვის გამო, 6 თვით მართვის უფლება ჩამოართვა. კვასდიანი, რამდენიმე ხნის შემდეგ ისევ არაფხიზელ მდგომარეობაში მყოფი იჯდა საჭესთან, მასთან ერთად იმყოფებოდა პოლიციელი ზვიად ოსეფაიშვილი. ამჯერად, პატრულის მოთხოვნას, გაეჩერებინა ავტომანქანა, კვასდიანი თავდაპირველად არ დაემორჩილა რასაც პატრულსა და პოლიციელებს შორის დაპირისპირება  მოჰყვა.
როგორც ჩვენი წყარო ამბობს, კვასდიანი და ოსეფაიშვილი მათი სამსახურიდან გათავისუფლების შესახებ ბრძანებას უკვე ელოდებიან.
პოლიციელი გია კვასდიანი “ გურია ნიუსთან“ კატეგორიულად უარყოფს აღნიშნულ ინფორმაციას და ამბობს, რომ 23 წელია პოლიციელია და კიდევ 30 წელი  არსად წასვლას არ  აპირებს.
“როგორ გეკადრებათ, არ ვარ გამოშვებული, არ არის ეს ინფორმაცია სიმართლე. არა, ბატონო, არანაირი დაპირისპირება არ მქონია პატრულთან. ზვად ოსეფაიშვილს რა საქმე ჰქონდა ჩემთან, არანაირი პატრული, არც ჩხუბი, არც გაწევ-გამოწევა. მე არ დამილევია 6 თვეა და ნასვამ მდგომარეობაში როგორ ვიქნებოდი?“ _ გვითხრა კვასდიანმა.
შეესაბამება თუ არა აღნიშნული ინფორმაცია სიმართლეს, „გურია ნიუსი“ ორი დღეა ცდილობს, გაიგოს შსს პრესსამსახურისგან, საიდანაც უკვე რამდენჯერმე  განგვიმარტეს, რომ ეს არის პერსონალური ინფორმაცია და მივმართოდ შსს საჯარო ინფორმაციის ბიუროს.
“ეს არის პირადი ინფორმაცია, არაერთხელ გითხარი ამის შესახებ. რა მინდა, იცი, გითხრა, რაღაცა სულ ისეთ კითხვას მისვამ, ასე შენნაირად არავინ არ მეკითხება _ მუშაობს თუ არა ეს პოლიციელი, მოქმედია თუ არა, გამოუშვეს თუ არა? ასეთი კითხვები სულ ხომ არ შეიძლება, არა? როცა ვეტყვით სხვებს ერთხელ, მორჩა, იციან, რომ საჯარო ინფორმაციის ბიუროს უნდა მიმართონ“, _ გვიპასუხეს პრესსამსახურიდან.
“გურია ნიუსმა“ უკვე ოფიციალურად მისწერა აღნიშნულ ბიუროს ამასთან დაკავშირებით.