ლანჩხუთის მუნიციპალიტეტის გამგებლის, ზაზა ურუშაძის თქმით, მიმდინარე წელს ლანჩხუთის მუნიციპალიტეტში განსახორციელებელი ინფრასტრუქტურული პროექტების თანხებს 900 ათასი ლარი დაემატება.
„წელს სამი საბავშვო ბაღის რეაბილიტაცია უნდა განხორციელდეს და თითოელ მათგანზე 200-200 ათასი ლარი იყო გამოყოფილი, მაგრამ პროექტების მიხედვით მაჩხვარეთის საბავშვო ბაღზე 241 ათასი ლარი დაიხარჯება, ხოლო ჯურუყვეთის საბავშვო ბაღზე – 274 ათასი ლარი. რაც შეეხება წყალწმინდის საბავშვო ბაღს, აქ ეს თანხა 254 ათასი ლარით განისაზღვარა“ – განაცხადა ურუშაძემ.
მისივე თქმით გრიგოლეთის საფეხბურთო ბაზაზე 400 ათასი ლარი დაიხარჯება და მთლიანად აღდგება ის ინფრასტრქტურა, რომელიც იქ არსებობს. აღსანიშნავია, რომ ბაზის აღდგენისთვის თავდაპირველად 150 ათასი ლარი იყო გამოყოფილი.
