ცნობილია, რომ facebook.com ყველაზე პოპულარული სოციალური ქსელია საქართველოში. სხვადასხვა მონაცემებით, საიტზე უკვე 900 000-მდე ქართველი მომხმარებელია დარეგისტრირებული.
ვებგვერდს ასევე იყენებენ ბიზნეს და სამთავრობო სტრუქტურებიც, რადგან „ფეისბუქი“ უნიკალური პლატფორმაა როგორც რეკლამირებისთვის, ისე სხვადასხვა ინფორმაციის გასავრცელებლად.
სამწუხაროდ, ამ ყველაფერს თაღლითებიც წარმატებით იყენებენ. ბოლო დროს, ალბათ, შეამჩნევდით სიახლეების ყალბი ვებგვერდების მომრავლებას, რომლებიც სიახლის გაცნობამდე მის გაზიარებას ან რეკლამის ნახვას გვთავაზობენ.
მსგავსი ვებგვერდები გამოირჩევა პროვოკაციული და დამაინტრიგებელი სათაურებით, რომელთა უმეტესობა ყალბია. დეზინფორმაციასთან ერთად ისინი ავრცელებენ ძალადობისა და 18+ შინაარსის შემცველ ინფორმაციას.
გვერდებზე გადასვლისას ხშირად მომხმარებელი ავტომატურად მისამართდება facebook.com-ის იდენტურ ვებგვერდზე, რომელიც ითხოვს თქვენს მომხმარებლის სახელსა და პაროლს. პაროლის შეყვანის შემდეგ ეს ინფორმაცია თაღლითის ხელში ხვდება, რომელიც მოიპოვებს წვდომას თქვენს ანგარიშზე.
მსგავსი ტიპის ვებგვერდები უმეტესად „ფეისბუქში“ არსებული ჯგუფების საშუალებით ვრცელდება, რომლებსაც თაღლითები ქმნიან და სხვადასხვა ხერხებით რაც შეიძლება ბევრ მომხმარებელს ამატებენ.
მსგავსი ჯგუფების რაოდენობა სოციალურ ქსელში უკვე 300-მდეა და მათი რიცხვი იზრდება, ჯგუფების წევრთა რაოდენობა კი რამდენიმე ათასიდან 500 000-მდე აღწევს.
სამწუხაროდ, მსგავს ჯგუფებში ხვდება ათიათასობით არასრულწლოვანიც, რომელთა ფსიქიკასაც ასეთი ვებგვერდების ნახვის შემდეგ შესაძლოა გამოუსწორებელი ზიანი მიადგეს, რადგან ხშირად ვრცელდება ადამიანთა სიკვდილისა და დასახიჩრების შემცველი ვიდეო მასალა.
CERT.GOV.GE გაძლევთ რეკომენდაციას არ გადახვიდეთ პროვოკაციული სათაურების შემცველი და გაურკვეველი წარმომავლობის დომენური სახელების მქონე ვებგვერდებზე.
ასევე გირჩევთ გადაამოწმოთ იმ ჯგუფების სია, რომლებშიც ამჟამად ხართ გაწევრებული.
ამ სიის გადამოწმება შეგიძლიათ მოახდინოთ შემდეგი ბმულიდან: https://www.facebook.com/groups/?category=membership
ჯგუფიდან გამოსასვლელად დააჭირეთ მისი სათაურის გასწვრივ განთავსებულ ჭანჭიკის სიმბოლოს და აირჩიეთ „ჯგუფის დატოვება“ ან „Leave Group”.
CERT.GOV.GE რამდენიმე თვეა ატარებს შესაბამის მოქმედებებს მსგავსი აქტივობების წინააღმდეგ.
"ჩვენ მიერ ყოველკვირეულად რამდენიმე თაღლითური ვებგვერდი იხურება. ასევე ვთანამშრომლობთ საქართველოს შინაგან საქმეთა სამინისტროსთან, რათა მოხდეს თაღლითების განეიტრალება" _ აღნიშნულია გავრცელებულ განცხადებაში.
