დღეს, 21 ივნისს რიყის პარკში საქართველოს საზოგადოებრივ საქმეთა ინსტიტუტმა, (GIPA) გაეროსა და გარემოს დაცვისა და ბუნებრივი რესურსების სამინისტროს მხარდაჭერით, სტიქიით დაზარალებულ ბავშვებთან ერთად საქველმოქმედო გამოფენა-გაყიდვა გამართა.
ღონისძიებაზე სტიქიით დაზარალებული ბავშვების ნახატები და ხელნაკეთი ნივთები გაიყიდა. საქველმოქმედო აქციას ქართველმა დიზაინერებმა და GIPA-ს სტუდენტებმა დაუჭირეს მხარი.
გამოფენაზე მოსულ მსურველებს შესაძლებლობა ჰქონდათ სამკერდე ნიშნები, ჩანთები, ექსკლუზიური მაისურები, საწერკალმები, სტიკერები, ჭიქები და ნახატები შეეძინათ.
შემოსული თანხა სრულად მოხმარდება თბილისის ზოოპარკს, გადარჩენილ ცხოველებს და დაზარალებულ ბავშვებს.
"გურია ნიუსთან" საუბარში საქველმოქმედო აქციაზე მოსულმა პიარ-სპეციალისტმა ელდარ პირმისაშვილმა აღნიშნა, რომ ზოოპარკის გადარჩენა მნიშვნელოვანია.
"ძალიან მნიშვნელოვანი ღონისძიებაა. ყველა ჯგუფის ჩართულობა საქველმოქმედო აქციებში მნიშვნელოვანია. ძალიან მნიშვნელოვანია, რომ ნივთს ყიდულობ და ქველმოქმედი ხდები და უბრალოდ ფული არ მოგაქვს. ეს აქცია ზოოპარკის გადასარჩენად მოეწყო და მნიშვნელოვანია ზოოპარკი გადარჩეს. როგორც ხედავთ, ჯიპას სტუდენტები მონაწილეობენ და აქციას ორიგინალური ფორმა აქვს. წარმატებას ვუსურვებ ჯიპას", _ აღნიშნა ელდარ პირმისაშვილმა.
როგორც GIPA-ს მედიახელოვნების სამსახურის კოორდინატორმა ნინო ლიპარტელიანმა განაცხადა, უნივერსიტეტი სტიქიით დაზარალებულებს აქტიურად ეხმარება, სტუდენტები მოხალისეებად მუშაობენ, ხოლო ამ კონკრეტული აქციით ისინი ზოოპარკის დახმარებას აპირებენ.
"ჩვენ სტიქიის პირველივე დღიდან აქტიურად ვართ მიმდინარე სამუშაოებში ჩართულები, ჩვენი სტუდენტები მოხალისეებადაც მუშაობენ. ამიტომ ასეთი აქცია მოვიფიქრეთ და ცნობილი დიზაინერები ჩავრთეთ. ასევე ჯიპას ლექტორები, ჯიპას სტუდენტები და კურსდამთავრებულებიც. რასაც ხედავთ მათი ნამუშევრებია და ასეთი ექსკლუზიური ნივთები ჭიქები, ჩანთები, მაისურები შევქმენით. 13 რიცხვის მერე ყველა სასტუმროსთან გვქონდა კონტაქტი და განსაკუთრებით მრავალშვილიან ოჯახებს ვეხმარებოდით საკვებით და ტანსაცმლით. ბავშვებს რომლებიც ხატავდნენ დასახატი და გამოსაძერწი ნივთები მივეცით, რომ აქციაში მიეღოთ მონაწილეობა“, _ აღნიშნა ლიპარტელიანმა.
მისივე თქმით, ისინი მსგავს აქციას ამ დღეებში უკვე უნივერსიტეტის ეზოში გამართავენ.
"ამ საქველმოქმედო ღონისძიებით გვინდა ზოოპარკს დავეხმაროთ. სამწუხაროდ, აქტივობა არ არის ისეთი როგორსაც ველოდებით, ალბათ სიცხის ბრალია. მაგრამ ეს დღეს არ დასრულებულა და ამ დღეებში ხვალ ან ზეგ ჯიპას ეზოში კიდევ გავმართავთ", _ თქვა ლიპარტელიანმა.
GIPA-ს გარდა, რიყის პარკში არასამთავრობო ორგანიზაცია "გენი ქართულსაც" ჰქონდა კულტურული ღონისძიების კუთხე მოწყობილი.
როგორც მისმა დირექტორმა, ანი მენაბდემ "გურია ნიუსთან" საუბრისას აღნიშნა, სტიქიით დაზარალებულებს „გენი ქართულიც“ აქტიურად ეხმარება, დღევანდელ მათ ღონისძიებას კი „ანბანელას" აღსაზრდელებიც შეუერთდნენ.
"ჯიპას ინიციატივით დაიგეგმა დღევანდელი ღონისძიება, რომელიც საქველმოქმედო ხასიათის იყო სტიქიით დაზარალებული ბავშვების და ზოოპარკის მხარდასაჭერად. ჩვენ წარმოვადგენთ გენი ქართულის მხარეს. მრავალშვილიანი ოჯახების ბავშვების გარდა, ჩვენს ინიციატივას გვერდში დაუდგა "ანბანელას" აღსაზრდელები. მათი ნამუშევრები გამოიფინა დღეს და გაიყიდა. ადგილზეც მივეცით ბავშებს საშუალება, რომ ემუშავათ, დაეხატათ ან გამოეძერწათ. რაც სტიქია მოხდა ჩვენ ვეხმარებით დაზარალებულებს და გამოვიკვლიეთ თუ რა პრობლემები აქვთ და აქაც მოვიპატიჟეთ მონაწილეობის მისაღებად", _ აღნიშნა მენაბდემ და დასძინა, რომ დღევანდელ ღონისძიებას ცნობილი სახეებიც უნდა შეერთებოდნენ, თუმცა ისინი ღონისძიებაზე არ მისულან.
"მიუხედავად იმისა, რომ ბევრი ხალხი არ მოვიდა, არ მოვიდნენ ცნობადი სახეები ვისაც ველოდებოდით. თუმცა, მაინც კმაყოფილი ვარ. რადგან ვინც იყვნენ ხელცარიელი არავინ წასულა. შემოსული თანხა დაზარალებული ოჯახების ბავშვებს მოხმარდება. ვფიქრობთ, რომ უახლოეს მომავალში ამ აქციას სხვანაირი სახე მივცეთ, შესაძლებელია სხვადასხვა ორგანიზაციებსაც დავუკავშირდეთ", _ აღნიშნა მენაბდემ.
აღსანიშნავია, რომ დღეს გამართულ ღონისძიებას ერთ-ერთი სტიქიით დაზარალებული მოზარდის, ნიკას დაბადების დღე დაემთხვა. მას 11 წლის შესრულება GIPA-ს სტუდენტებმა და ანიმატორებმა მიულოცეს.
ასევე აქციის დასულებამდე ორგანიზატორები ბავშვებს ტკბილეულით უმასპინძლდებოდნენ, ხოლო ანიმატორები მათი მხიარული განწყობის შექმნაზე ზრუნავდნენ.
"ამ აქციის შესახებ დილით გავიგე და მოსვლა გადავწყვიტე. განსაკუთრებით ბეგის მაისური მინდოდა რომ შემეძინა. საქველმოქმედო აქციაა და ესაა მთავარი. შესაძლოა უფრო უკეთესიც ყოფილიყო, ნაწილობრივ კმაყოფილი ვარ", _ აღნიშნა "გურია ნიუსთან" საუბრისას ღონისძიების ერთ-ერთმა სტუმარმა.
როგორც დღის ბოლოს "გურია ნიუსს" აცნობეს, საქართველოს საზოგადოებრივ საქმეთა ინსტიტუტმა საქველმოქმედო აქციით 2 000 ლარამდე თანხის შეგროვება შეძლო. აღნიშნული თანხა თბილისის ზოოპარკს გადაერიცხება.
