თბილისში, 13 ივნისის ღამეს მომხდარი სტიქიის შედეგად დაზარალებულთა შორის არიან გმირთა მოედანზე მდებარე რესტორნის "მატრიოშკას" ხელმძღვანელი პირებიც.
"გურია ნიუსთან" საუბრისას ისინი აღნიშნავენ, რომ ზარალის აღწერისთვის ამ დრომდე მათთან არავინ მისულა.
სტიქიის ღამეს სიკვდილს რესტორანში მყოფი 17 ადამიანი გადაურჩა, აქედან 8 სტუმარი იყო, თუმცა, ერთი რესტორნის თანამშრომლის გადარჩენა ვერ მოხერხდა. ასაკოვანი მზარეულის ცხედარი მაშველებმა სტიქიიდან მესამე დღეს რესტორნის პირველ სართულზე იპოვეს.
"მატრიოშკას" პირველი სართული შლამით და ნაგვით არის სავსე. რესტორნის ხელმძღვანელი აცხადებს, რომ თუ ტერიტორია დროულად არ გაიწმინდა ინფექციის დიდი კერა წარმოიქმნება, რადგან შლამში რამდენიმე ათეული კილო ხორცი და თევზის პროდუქტებია გახრწნილი.
"ვერ მოვახერხეთ პროდუქტებით სავსე მაცივრების შლამიდან გამოტანა. ხორცი და თევზი მთლიანად შლამშია ჩაცლილი. უკვე ბუზები ახვევია. ჩვენი ძალებით ამ ყველაფრის გამოტანას ვერ შევძლებთ. მერიის დასუფთავების სამსახურში აცხადებენ, რომ კერძო საკუთრების დასუფთავების უფლება მათ არ აქვთ", _ ამბობს რესტორნის დირექტორი მანანა ლომიშვილი და დასძენს, რომ სამაშველო სამსახურები დაღუპული თანამშრომლის ტერიტორიიდან გამოყვანაში მხოლოდ სამი დღის შემდეგ დაეხმარნენ.
"გურია ნიუსთან" საუბრისას თბილისის მერიის დასუფთავების სამსახურში ამბობენ, რომ ტექნიკის არარსებობის გამო რესტორინის შიდა ტერიტორიის დასუფთავებას ვერ მოახერხებენ.
"ტექნიკა მთლიანად სტიქიის ზონებშია გადასროლილი, ამიტომ ყველგან ჯერჯერობით ვერ მივდივართ. ამასთან, "მატრიოშკა" კერძო საკუთრებაა, ამიტომ მფლობელებმა საკუთარი ძალებით უნდა დაასუფთავონ", _ აცხადებენ "თბილსერვის ჯგუფში, რომელიც ქალაქის დასუფთავებაზეა პასუხისმგებელი.
ამავე თემაზე:
რა მდგომარეობაა სტიქიისგან დაზიანებულ რესტორან „მატრიოშკაში“
ფოტოების ავტორი: თამთა კაკაურიძე
