ფინეთის დედაქალაქი ევროპის უშიშროების და თანამშრომლობის ორგანიზაციის საპარლამენტო ასამბლეას მასპინძლობს. რიგით 24-ე ყოველწლიური შეხვედრა "ჰელსინკი+40" სახელწოდების სემინარით გაიხსნა.მისი მოწვევის იდეა საპარლამენტო ასამბლეამ, გასული წლის სექტემბერში გააჟღერა, რათა მომხდარიყო იმ 40 წლიანი საქმიანობის შეჯამება, რომელიც „ჰელსინკის საბოლოო აქტის“ ხელმოწერის დღიდან დღემდე განხორციელდა. პროექტის მიზანს ასევე აუცილებელი რეფორმების და რელევანტური ღონისძიებების განსაზღვრა და ანალიზი წარმოადგენდა.
ღონისძიების მონაწილეებს ეუთო-ს საპარლამენტო ასამბლეის პრეზიდენტი ილკა კანერვა, ასამბლეის გენერალური მდივანი ოლივერ სპენსერი და ფინელი დიპლომატი იაკკო ილონიემი მიესალმნენ.
გამომსვლელებმა ეუთო-ს შექმნის და საერთაშორისო ორგანიზაციის ჩამოყალიბების ისტორიაზე, განვლილ საქმიანობასა და მის დღევანდელ როლზე ისაუბრეს. აღინიშნა, რომ 40 წლის წინ, "ჰელსინკის დეკლარაციის" გაფორმებით, "ცივი ომის" შემდგომ ეტაპაზე, ქვეყნებს შორის თანამშრომლობის, უსაფრთხოების და მშვიდობიანი ურთიერთობების ჩამოყალიბებაში, ეუთო მნიშვნელოვან როლს ასრულებს და იგი პოლიტიკური დიალოგის ერთ-ერთ საუკეთესო ფორუმს წარმოადგენს.
გამოსვლების დასრულების შემდეგ, საქართველოს საპარლამენტო დელეგაციის ხელმძღვანელი რეგიონული უსაფრთხოების საკითხით დაინტერესდა.
თედო ჯაფარიძემ კითხვით აშშ-ში ფინეთის ყოფილ ელჩს, იაკკო ილონიიემს მიმართა და იკითხა თუ რამდენად უსაფრთხოდ შეიძლება ჩაითვალოს დღეისათვის პოსტსაბჭოთა ქვეყნები. "40 წლის განმავლობაში ყოფილ საბჭოთა ქვეყნებში ბევრი რამე შეიცვალა.მათ შორის ადგილი ქონდა კონფლიქტების განვითარებას და ოკუპაციურ ქმედებებსაც. ,"ჰელსინკი+40" გადმოსახედიდან საინტერესოა, თუ რამდენად უსაფრთხოა პოსტსაბჭოთა სივრცე", – განაცხადა თედო ჯაფარიძემ. შეკითხვის პასუხად ფინელმა დიპლომატმა აღნიშნა, რომ დღევანდელ რთულ და ტურბულენტულ სამყაროში აბსოლუტური უსაფრთხოების გარანტია ვერც ერთ ქვეყანას ვერ ექნება.
სემინარი დისკუსიით გაგრძელდა. ბალკანეთის და სკანდინავიის ქვეყნების გამომსვლელებმა უსაფრთხოების საკითხებსა და კრიზისული ვითარებების მშვიდობიანი გზით მოგვარების თემებზე ისაუბრეს. მეზობელ სახელმწიფოებს შორის ურთიერთობების თემის დისკუსიისას, ქართული დელეგაციის ხელმძღვანელმა თედო ჯაფარიძემ აღნიშნა, რომ საქართველოს სურს ქონდეს კეთილმეზობური ურთიერთობა რუსეთის ფედერაციასთან, მაგრამ არა ქვეყნის სუვერენიტეტის და ტერიტორიების ხარჯზე.
სემინარის დასრულების შემდეგ საერთო კომიტეტის სხდომა გაიმართა, რომლის ძირითად საკითხს ასამბლეაში მონაწილეობაზე რუსეთის ფედერაციის ბოიკოტი წარმოადგენდა. საკითხი შეეხებოდა ევროპარლამენტის მიერ დადგენილ სანქციებს, რომლის თანახმადაც, რუსეთის სათათბიროს თავმჯდომარე იმ პირთა ჩამონათვალში იქნა შეყვანილი, რომელთაც ევროკავშირის წევრ ქვეყნებში შესვლა აეკრძალათ.
სწორედ ამიტომ, სერგეი ნარიშკინს ფინეთის საგარეო საქმეთა სამინისტროსგან ქვეყანაში შემოსვლაზე და ღონისძიების დასწრებაზე უარი ეთქვა, რაც გახდა კიდეც დელეგაციის ბოიკოტის მიზეზი. სხდომაზე აღინიშნა, რომ აუცილებელია რუსეთის დელეგაცია დაუბრუნდეს ასამბლეის ფორმატს, რადგან ეუთოს საპარლამენტო ასამბლეა სწორედ ის ინსტრუმენტია, სადაც კონფლიქტური სიტუაციების მოგვარება დიალოგის და მოლაპარაკებების გზით ხდება.
სხდომის მსვლელობისას კომიტეტს რუსეთის საპარლამენტო დელეგაციის ხელმძღვანელი შემოუერთდა, რომელმაც მისი ქვეყნის პარლამენტის სპიკერისთვის დაწესებული სანქციები და ქვეყანაში არ შემოშვების საკითხი, ეუთო-ს პრინციპების უხეშ დარღვევად შეაფასა და მისი დელეგაციის პროტესტი კიდევ ერთხელ დააფიქსირა. საერთო კომიტეტის სხდომაზე საორგანიზაციო და რეგლამენტის საკითხებიც განიხილეს.
ეუთოს საპარლამენტო ასამბლეა ხვალ პლენარული სხდომით გაგრძელდება, რომელსაც ფინეთის პრეზიდენტი საული ნიინისტო დაესწრება.
