დღეს ქალაქ ოზურგეთის მუნიციპალიტეტის საკრებულოს სხდომაზე, მეხუთე საკითხად გამოტანილი იყო "ქალაქ ოზურგეთის მუნიციპალიტეტის ქონების პირდაპირი განკარგვის წესით, სასყიდლიანი სარგებლობის უფლებით გაცემის თაობაზე" – ქალაქ ოზურგეთის მუნციპალიტეტის მერიისათვის თანხმობის მიცემის შესახებ.
ქალაქ ოზურგეთის მერიის ეკონომიკური განვითარების, ქონების მართვის, ინფრასტრუქტურის, ტრანსპორტისა და კეთილმოწყობის სამსახურის უფროსის მერაბ წივწივაძის თქმით, ქალაქის ცენტრში, საზოგადოებრივი ტუალეტის მოწესრიგება და ფუნქციონირება ერთ ადგილობრივ მოქალაქეს სურს.
_ ერთ-ერთმა მოქალაქემ გამოთქვა ტერიტორიის მოწესრიგების სურვილი _ თქვა მერაბ წივწივაძემ.
რატომ არ ხდება აუქციონის წესით ამ საკითხის მოგვარება? _ იკითხა საკრებულოს დეპუტატმა ლევან მგელაძემ.
ამ ეტაპზე ზუსტად არ არის ცნობილი, თუ ვის უნდა ტუალეტის ფუნქციონირება. ჩვენ მხოლოდ ის ვიცით, რომ ეს ადამიანი გვარად ჭეიშვილია და ყვავილების ბიზნესი აქვს.
"გურია ნიუსი" ოზურგეთის ცენტრში ტუალეტის აშენების შესახებ 2012 წელს წერდა. საქართველოს მასშტაბით, "საქართველოს გაერთიანებული წყალმომარაგების კომპანიამ" საპირფარეშოების შენება დაიწყო.
2013 წლის აგვისტოში კი ამ საკითხთან დაკავშირებით "საქართველოს გაერთიანებული წყალმომარაგების კომპანიის“ პრესსამსახურში გვითხრეს, რომ 33 ტუალეტიდან 12 მთლიანად დასრულებულია, რეგისტრირებულია და არის "საქართველოს გაერთიანებული წყალმომარაგების კომპანიის" ბალანსზე. 21 ტუალეტში უნდა მოხდეს ცვლილებები.
_ მაგალითად, აუცილებელია მიწების დაზუსტება, ვინაიდან ეს ტუალეტები აშენდა სხვა ადგილებში და არა იქ, სადაც პროექტის მიხედვით იყო დაგეგმილი. დღეს არსებობს მათი რეგისტრაციის პრობლემა, ორი ტუალეტის მშენებლობა არ არის დასრულებული – ჩოხატაურსა და ურეკში – ამის გამო მოხდა მშენებელი კომპანიის – შპს "ოქტან-მედეას" დისკვალიფიკაცია და მას დაერიცხა ჯარიმები არადამაკმაყოფილებელი მუშაობის გამო. ხოლო რაც შეეხება დარჩენილ 10 ტუალეტს, უახლოეს ხანში გადაეცემა ადგილობრივ მუნიციპალიტეტებს, რაზეც თანხმობა უკვე მიღებულია ეკონომიკის სამინისტროდან.
საქართველოს წყალმომარაგების ახალ მენეჯმენტს მიაჩნია, რომ საზოგადოებრივი ტუალეტები არ არის წყალმომარაგების პროფილი. ამდენად დღეისათვის მიმდინარეობს მოლაპარაკებები ადგილობრივ მუნიციპალიტეტებთან ამ ტუალეტების ექსპლუატაციისთვის გადაცემის თაობაზე, მითუმეტეს, რომ ეს მუნიციპალიტეტების სურვილიცაა.
მოლაპარაკებებში ჩართულია საქართველოს ეკონომიკის და ინფრასტრუქტურის სამინისტროები, ვინაიდან სწორედ მათი საბოლოო თანხმობაა საჭირო ამ ცვლილების გასახორციელებლად. დღეისათვის ყველა ტუალეტი დაკეტილია იქამდე, ვიდრე არ გადაწყდება, თუ ვის დაქვემდებარებაში დარჩება ისინი _ წყალმომარაგების კომპანიის თუ მუნიციპალიტეტების.
2011 წლის ბოლოს, დეკემბერში 2 მილიონ 500 ათასი ლარი გამოიყო საზოგადოებრივი ტუალეტების მშენებლობაზე. 2012 წლის მაისში დაიწყო ტუალეტების სამშენებლო სამუშაოები, მთლიანობაში დაპროექტდა 33 ტუალეტის მშენებლობა და თანხა დაზუსტდა 2 მილიონ 300 ათას ლარამდე"- ასეთი პასუხი მივიღეთ 2013 წლის აგვისტოში.
"გურია ნიუსი" აგრძელებს ამ თემაზე მუშაობას და მოგვიანებით შემოგთავაზებთ ვრცელ სტატიას.
