"გურია ნიუსის" ვებ-გვერდზე გამოქვეყნებულ მასალას "იუსტიცის სახლის გარეპერიმეტრის კეთილმოწყობისთვის გახარჯული 60 ათასი ლარი", ოზურგეთის მუნიციპალიტეტის სოფელ ნატანების მცხოვრებლები გამოეხმაურნენ. მათ გამგებლის წარმომადგენელი ილია თავაძე ტყუილში დაადანაშაულეს.
"ძალიან გვაინტერესებს ნატანებში ლეკურის მცხოვრებლებს, რომელ ორშაბათს დაიწყო გზის მშენებლობა, თუ იგეგმება საერთოდ წყლის რეზერვუარის გაკეთება ამ უბნისთვის და საერთოდ, გვყავს პატრონი? ვინმემ ჰკითხა ხალხს რაში დაეხარჯათ ეს თანხა?
ძალიან კარგია პარკი, მაგრამ სახლამდე ვერ მივსულვართ ზამთარში, ისეთი გზებია და იქნებ გაითვალისწინონ ჩვენი თხოვნა. კმარა ამდენი ტყუილი! გთხოვთ მოგვაქციონ ყურადღება. ლეკურაში რამდენჯერ ვითხოვეთ რომ წყალი გაეკეთებინათ, გვპირდებიან ყველა არჩევნების წინ, მაგრამ შემდეგ არანაირი რეაგირება არაა.
გამგებელი ამბობს რომ დაიწყეს გზის გაკეთება. ეს ტყუილია. შეუძლებელია ცუდ ამინდში მოძრაობა, ბავშვები ძლივს მიდიან სკოლაში, იმხელა გუბეებია წვიმის დროს. ელემენტარულ პირობებს ვითხოვთ_ აღნიშნეს ნატანების მცხოვრებლებმა.
ოზურგეთის მუნიციპალიტეტის სოფელ ნატანებში მცხოვრები აკაკი ღელეყვა "გურია ნიუსთან" ამბობს, რომ გამგებლის წარმომადგენელი ილია თავაძე ტყუილს ამბობს:
"წავიკითხე თქვენი ინტერვიუ, გამგებლის წარმომადგენელი ამბობს, რომ ორშაბათს დაიწყო ლეკურას გზის გაკეთებაო. ეს არის ტყუილი. არანაირი გზის გაკეთება და არც წყალის არ დაწყებულა.
ძალიან გთხოვთ მობრძანდით და ნახეთ. გზა ისეთი გაფუჭებულია, რომ ერთი სამარშრუტო ტაქსი გვემსახურება და იმასაც ეზარება უკვე ამოსვლა. რამდენიმეჯერ მივმართეთ ხელისუფლების წარმომადგენლებს კითხვით, როდის დაიწყება გზის გაკეთება. მაგრამ ამბობენ, ჯერ გაზი უნდა გავიყვანოთ და შემდეგ დაიწყება გზის მშენებლობაო. იქნებ კიდევ ერთხელ დაინტერესდეთ ნატანების პრობლემებით.
"ლეკურას" უბანი ძალიან დიდია, მაგრამ განსაკუთრებით ჩვენთან კატასტროფული მდგომარეობაა. აქ 20 ოჯახი ცხოვრობს, რამდენიმე წელია უკვე ერთი მანქანა ხრეშიც არ დაუყრიათ. განსაკუთრებით სკოლასთან არის ცუდი მდგომარეობა" _ გვითხრა ღელეყვამ.
