ამ წუთებში ქალაქ ოზურგეთში გიორგი სალუქვაძის სახელობის ფოლკლორული ცეკვისა და სიმღერის საერთაშორისო კონკურს-ფესტივალი მიმდინარეობს.
ფესტივალის ფარგლებში დღეს ოზურგეთის მუნიციპალიტეტის სოფელ ცხემლისხიდში გიორგი სალუქვაძის სახელობის მუზეუმი გაიხსნა.
საქართველოს სახალხო არტისტის, მოცეკვავის და ქორეოგრაფის სახლ-მუზეუმის გახსნას საპატიო სტუმრები, საქართველოს ხელოვნების დამსახურებული მოღვაწეები ფრიდონ სულაბერიძე, ჯემალ ჭკუასელი და ანზორ ერქომაიშვილი დაესწრნენ. გურიის გუბერნატორმა გია სალუქვაძემ, ოზურგეთის მუნიციპალიტეტის გამგებელმა, მერაბ ჭანუყვაძემ, ქალაქ ოზურგეთის მერმა, ბეგლარ სიორიძემდა ადგილობრივი ხელისუფლების წარმომადგენლებმა პატივი მიაგეს გიორგი სალუქვაძის ხსოვნას და მისი საფლავი გვირგვინით შეამკეს
.გოგი სალუქვაძე, გიორგი სალუქვაძის შვილი: "ჩემი განწყობა დღევანელ დღესთან დაკავშირებით არის ამაღლებული და ეს ალბათ ყველასთვის გასაგებია. ძალიან ვღელავ. გიორგი სალუქვაძის სახლ-მუზეუმის გახსნა არის მამაჩემის უდიდესი ღვაწლის დაფასება. ამავდროულად ეს არის დაფასება იმ ხელოვნების, რომელსაც ქმნიდა და ინახავდა მომავალი თაობებისთვის.
ადამიანის სახელი ცოცხლობს მანამ, სანამ მას მოიგონებენ. დიდი მადლობა იმათ, ვინც ამ კეთილ საქმეში მიიღო მონაწილეობა. გიორგი სალუქვაძეზე არსებობს ძალიან ბევრი მასალა, რომლითაც თანდათან შეივსება ეს სახლ-მუზეუმი".
გიორგი სალუქვაძის დაბადების თარიღად 1913 წლის 27 ივნისს მიიჩნევენ. მისი დამსახურებით მრავალი მივიწყებული ქართული ცეკვის (შიპრობა, ფუნდრუკი, ფარცაკუკუ, იდუმალა და სხვა) აღდგენა მოხდა.
იყო საქართველოს სამუსიკო და ქორეოგრაფიული საზოგადოების გამგეობის თავმჯდომარე. მისი ინიციატივით შეიქმნა გურული სიმღერების აღმდგენი და შემსწავლელი ოთხწლიანი სალოტბარო სკოლა. 1973 წლიდან სალუქვაძე ხელმძღვანელობდა მახარაძის რაიონის სიმღერისა და ცეკვის ეთნოგრაფიულ ანსამბლ "იადონს."
