ივლისის მიწურულს ძალაში შევიდა კანონი მაღალმთიანი რეგიონების განვითარების შესახებ. ახალი კანონი ითვალისწინებს ეკონომიკურ სტიმულირებას ბიზნესისათვის, სოციალურ შეღავათებს მაღალმთიანი რეგიონების მოსახლეობისათვის და მიზნობრივ ფინანსურ დახმარებას სახელმწიფო ბიუჯეტიდან მაღალმთიანი რეგიონების განვითარებისათვის.
კანონპროექტი, რომელიც მესამე მოსმენით მიიღო საქართველოს პარლამენტმა, შეიმუშავა საქართველოს რეგიონული განვითარებისა და ინფრასტრუქტურის სამინისტრომ, სამხრეთ კავკასიაში შვეიცარიის თანამშრომლობის ოფისის (SCO), ავსტრიის განვითარების სააგენტოსა (ADC) და გაეროს განვითარების პროგრამის (UNDP) ხელშეწყობით.
რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილი ამბობს, რომ კანონი მაღალმთიანი რეგიონების შესახებ ითვალისწინებს ობიექტური კრიტერიუმების შემოღებას, რომელთა საფუძველზე მთაში მდებარე დასახლებებს მიენიჭება მაღალმთიანი დასახლების სტატუსი, ხოლო მათი მოსახლეობა და იქ მოქმედი საწარმოები ისარგებლებენ გარკვეული შეღავათებით.
" მაღალმთიანი რეგიონების განვითარებისათვის საჭირო თანხა ყოველწლიურად ჩაიდება სახელმწიფო ბიუჯეტში, – თქვა თენგიზ შერგელაშვილმა.
ახალი კანონით გათვალისწინებულია საგადასახადო შეღავათები მაღალ მთაში მოქმედი გარკვეული საწარმოებისათვის, ფინანსური და სოციალური დახმარება მაღალმთიან რეგიონებში მუდმივად მცხოვრები მოსახლეობისათვის, სახელფასო დანამატები პედაგოგებისა და მედიცინის მუშაკებისათვის, სოციალური დახმარება პენსიონერებისათვის, შეღავათები ელექტროენერგიით სარგებლობისას და გათბობით უზრუნველყოფის საკითხში.
განსაკუთრებული ყურადღება მიექცევა ბიზნესისა და ინფრასტრუქტურის განვითარებას. საჭირო თანხები აკუმულირდება სახელმწიფო ბიუჯეტის მაღალმთიანი რეგიონების განვითარების ფონდში. საქართველოს პრემიერ-მინისტრის ხელმძღვანელობით იქმნება მთის ეროვნული საბჭო, რომელიც, კანონში აღწერილი კრიტერიუმების საფუძველზე, მოამზადებს დასახლებათა სიას მაღალმთიანი დასახლების სტატუსის მისანიჭებლად. აღნიშნული სიას, საბოლოოდ, საქართველოს მთავრობა დაამტკიცებს.
"ახალი კანონი ეყრდნობა საერთაშორისო გამოცდილებას და მიზნად ისახავს სიღარიბის შემცირებასა და განვითარების ახალი შესაძლებლობების შექმნას. ის ხელს შეუწყობს ცხოვრების ხარისხის გაუმჯობესებას და ეკონომიკურ განვითარებას საქართველოს მაღალმთიან რეგიონებში",- თქვა შომბი შარპმა, საქართველოში გაეროს განვითარების პროგრამის ხელმძღვანელის მოადგილემ.
ახალი კანონ-პროექტის შესახებ ბეშუმში მყოფმა საქართველოს პრემიერ-მინისტრმა, ირაკლი ღარიბაშვილმა ისაუბრა.
"მთა ჩვენი ქვეყნის და ხალხის სიამაყეა და მთაში მცხოვრებ ხალხს განსაკუთრებით უნდა გავუფრთხილდეთ, უნდა ვიზრუნოთ მათზე",- განაცხადა პრემიერმა და აღნიშნა, რომ სწორედ ამიტომ, მთის გაძლიერება მთავრობის პრიორიტეტია.
ირაკლი ღარიბაშვილის თქმით, ჯერ კიდევ ბიძინა ივანიშვილის პრემიიერ-მინისტრობისას დაიწყო მთის გაძლიერებისკენ მიმართული პროგრამები და უკვე ამოქმედდა კანონი "მაღალმთიანი რეგიონების განვითარების შესახებ".
"მომავალი წლიდან ჩვენ დავიწყებთ ხელშემწყობ პროგრამებს როგორც აჭარის მაღალმთიანეთის, ისე სხვა მაღალმთიან რეგიონებში, რაც მჯერა, რომ მთის მცხოვრებლებისთვის დიდი სტიმულის მიმცემი იქნება.", – განაცხადა პრემიერმა.
