"დროა კოალიცია "ქართული ოცნება" შეეგუოს იმ რეალობას, რომ პრეზიდენტი მარგველაშვილი მართალია იყო დასახელებული კოალიციის მიერ, მაგრამ იგი არ არის კოალიცია "ქართული ოცნების“"პოლიტიკური გუნდის წევრი. ეს მასაც უთქვამს და მე ცოტა მეტსაც ვიტყოდი.. პრაქტიკულად ამას ჩვენი კონსტიტუციური სისტემაც განაპირობებს". -განაცხადა დავით უსუფაშვილმა გადაცემა "პოლიტარტში" სტუმრობისას.
მისივე თქმით, პრეზიდენტი შეიძლება იყოს დასახელებული პოლიტიკური პარტიის მიერ, ქონდეს გარკვეული ბმა ამ გუნდის პოლიტიკურ ისტორიასთან, თუ პოლიტიკურ მომავალთან, მაგრამ თავისი ფუნქციების შესრულებისას ის უნდა იყოს არა რომელიმე პარტიის პოლიტიკის გამომხატველი, არამედ უნდა შეეცადოს შეაგროვოს პარტიები, შეაგროვოს შეხედულებები.
"ამ თვალსაზრისით, პრეზიდენტი ახერხებს თუ არა ამ ფუნქციის ძალიან კარგად შესრულებას.. არ ვიცი.. შეიძლება იყოს სურვილები, მეც შეიძლება მქონდეს სურვილი, რომ მეტად შეძლოს ამ ფუნქციის შესრულება, არა მხოლოდ ოპოზიციური სპექტრის თავმოყრა და მათი მოსაზრებების გაერთიანება, არამედ კიდევ უფრო ფართოდ, ზოგადად პოლიტიკური სპექტრის პოზიციების თავმოყრა, როდესაც საქმე ძალიან მნიშვნელოვან სახელმწიფოებრივ საკითხებს ეხება.
კოალიცია ეს არის პოლიტიკური სისტემა, სადაც პოლიტიკური ძალები და პოლიტიკოსები გავერთიანდით პოლიტიკური ამოცანების მისაღწევად. პოლიტიკური ამოცანები ეფუძნება ჩვენს ღირებულებებს და ინტერესებს, რომ არ იყოს საკმარისი ღირებულებითი ერთობა კოალიციურ სუბიექტებს შორის, კოალიცია ვერ გასტანდა ამდენ ხანსაც კი. ჩვენ საკმარისად ბევრი გვაერთიანებს, იმისთვის, რომ ვიყოთ კოალიცია. ამასობაში, ჩვენ რომ არ გვქონდეს განსხვავებული ინტერესები და ღირებულებები დიდი ხანია ერთ პარტიად ჩამოვყალიბდებოდით"- თქვა დავით უსუფაშვილმა.
