ზაფხულის გაუსაძლისად ცხელ დღეებში უწყლობამ ლანჩხუთის მუნიციპალიტეტის სოფელ ქვემო ჩიბათის მოსახლეობაც შეაწუხა. აქაურები ხელისუფლების მხრიდან მეტ ყურადღებას ითხოვენ.
"ძალიან კარგია გზა, მილხიდი და გაბიონიც, მაგრამ წყალი, მით უმეტეს, ასეთ სიცხეში, ყველაფერია. ჩიბათში არის წლის სათავე-ნაგებობა და ავზი, საიდანაც წყალს ვიღებთ, მაგრამ ახლა, გაუსაძლისი სიცხეების გამო, წყლის დებეტმა იკლო და პრობლემაც ამიტომ შეგვექმნა. სხვა სოფლებთან შედარებით, ჩიბათში საკითხის გადაწყვეტა შედარებით მარტივადაა შესაძლებელი და დიდი თანხის დახარჯვაც არაა საჭირო. არც წყლის ალტერნატიული მარაგია საძებარი, ყველაფერი გვაქვს. ჩვენთან კომუნისტების დროს გაკეთებული ჭაბურღილია, საიდანაც წყალი "ნასოსით" იტუმბება. ახლა "ნასოსი" გაფუჭებულია და აუცილებლად უნდა გამოიცვალოს. გაცილებით დიდი სიმძლავრისაა საჭირო, რომ წყალი კარგად ამოიტუმბოს. მოკლედ, ადგილობრივი ხელისუფლებისაგან ჩვენ დახმარება გვჭირდება, რომ ამ ხელსაწყოს შეძენა მოვახერხოთ", _ გვითხრა მოსახლეობამ.
"წყლის დებეტი სოფელ ქვემო ჩიბათში ზაფხულის თვეებში ძალიან მცირეა და ამიტომაც მოსახლეობას წყალი არ მიეწოდება. ამასთან დაკავშირებით გამგებელიც ჩავაყენე საქმის კურსში საკრებულოს ერთ-ერთ სხდომაზე და მანაც დახმარება აღმითქვა. მომავალი წლის სტრატეგიულ გეგმაშიც გათვალისწინებულია საამისოდ 50 ათასი ლარი", _ ამბობს ჩვენთან საუბრისას ლანჩხუთის საკრებულოს წევრი გიორგი ჩახვაძე:
_ პრობლემა ისაა, რომ გვაქვს ჭაბურღილიც და წყლის მაგისტრალიც. ჭაბურღილზე დგას "ნასოსი", რომელიც გაფუჭებულია და, დაახლოებით, ოთხი ათას ლარამდეა საჭირო მის გამოსაცვლელად. მოკლედ, წყალი საძებარი არაა _ იმისთვის, რომ სოფელს 24-საათიანი მომარაგება ჰქონდეს, ცენტრალური ავზი უნდა მიუერთდეს ჭაბურღილს. გარდა მოწყობილობის შეცვლისა, ასევე, დაახლოებით, ორი კილომეტრის სიგრძეზე გამოსაცვლელია მილი. იმ 300-ტონიან ავზს, საიდანაც ქვემო ჩიბათის მოსახლეობის 90% იღებს წყალს, თუ მივუერთებთ ჭაბურღილს, ზაფხულის სეზონზე წყლის პრობლემა აღარ წარმოიქმნება და 200 ოჯახი წყლით სრულად იქნება უზრუნველყოფილი.
ამ ეტაპზე, მოსახლეობას წყლის პრობლემა დროებით რომ მოვუხსნათ, რამდენადაც ჩემთვის ცნობილია, მიმდინარე თვეში მოხდება ჭაბურღილზე "ნასოსის" შეკეთება და დროებით, ძველი მაგისტრალით მიუერთდება ავზს, სამომავლოდ კი 50 ათასი ლარის ფარგლებში, წყლის სისტემის სრული რეაბილიტაცია გახორციელდება", _ გვითხრა ჩახვაძემ.
