“ევროპა ბეთი” მომხმარებლისთვის მოგებული თანხის მიცემას არ აპირებს

 "რადგან არ მომაქციეს სათანადო ყურადღება, ყველგან ვაპირებ ამ საქმის განხილვას. დიდი ხანია, "ევროპა ბეთის" მომხმარებელი ვარ და უკვე მესამედ დაირღვა ჩემი უფლებები. ბოლო შემთხვევა კი მეტისმეტი იყო", _ ამბობს ბადრი გოგოტიშვილი და გვიყვება, თუ რა მოხდა 2015 წლის 14 ივლისს.

_ 14 ივლისს კომპიუტერით ვთამაშობდი "პოლარულ მელას", _ ამბობს ბადრი გოგოტიშვილი, _ ზედიზედ 60 ბონუსი მომცა და ამის შედეგად გამიხდა 300 545 ქულა, აქედან, 545 ქულა წავაგე და 300 00 ათასი დავტოვე ანგარიშზე. მეგონა, 30 ლარი მოვიგე და, თურმე, 3 000 ლარი ყოფილა.

_ როგორ გაიგეთ, რომ 3 000 ლარი მოიგეთ?

_ ოზურგეთში მითხრეს, ამავე ორგანიზაციის ფილიალში. მითხრეს, მოგებული თანხა 3 000 ლარს შეადგენს და თანხის ნახევარს გაიტანთ თუ ყველასო. მე ვუთხარი, თუ შეიძლებოდა, ყველა მოეცათ, მაგრამ ჩემი ანგარიში დაბლოკილი აღმოჩნდა. ეს ხდებოდა დღის მეორე ნახევარში, დილით არ იყო დაბლოკილი ანგარიში.

_ ქულები გაქრა თქვენი ანგარიშიდან?

_ ანგარიშის ისტორიაში ფიქსირდება ეს მოგება.

_ ცხელ ხაზზე რა გითხრეს?

_ არაკორექტული თანხააო. ვებგვერდზე სამუშაოები მიდიოდა და შეცდომა მოხდაო. მაინტერესებს, რომ წამეგო, მაშინ რას იზამდნენ? ამ კითხვაზე არავინ მიპასუხა. თუ სამუშაოები მიდიოდა, როგორ ვთამაშობდი პრობლემებისა და დაბრკოლებების გარეშე? ძალიან ბევრი კითხვა მაქვს და ყველა პასუხის გარეშე რჩება.

_ ხშირად თამაშობთ?

_ კი, ხშირად.

_ პირველად მოიგეთ 3000 ლარი?

_ დიახ, მაგრამ არ მაძლევენ ფულს. ერთხელ 5 ლარი წამართვეს და მეორედ _ 10 ლარი, მაგრამ რადგან დიდი თანხა არ იყო, არაფერი მითქვამს.

_ როგორ წაგართვეს ეს თანხა?

_ შუა თამაშის დროს გაითიშა ვებგვერდი. როდესაც თავიდან შევედი, ანგარიშზე აღარაფერი მქონდა.

_ ახლა რას აპირებთ?

_ ამ დღეებში კიდევ დავრეკე ცხელ ხაზზე და კიდევ ერთხელ ვკითხე, მაძლევდნენ თუ არა მოგებულს. რამდენიმე წუთში დამიკავშირდნენ და მითხრეს, რომ არ გასცემდნენ თანხას. ოპერატორს ვუთხარი, საწყენი ხომ არ იქნებოდა, გამესაჩივრებინა მათი გადაწყვეტილება. პასუხი ასეთი იყო _ სადაც გაგიხარდეთ, იქ მიიტანეთ ეს ამბავიო, _ თქვა გვითხრა გოგოტიშვილმა.

"ევროპა ბეთმა" ამ საკითხზე დაკავშირებით ელექტრონული ფოსტით გაგვცა პასუხი, რომელსაც უცვლელად გთავაზობთ:

"ევროპა ბეთის" მომხმარებლების შესახებ ინფორმაცია არის კონფიდენციალური და მომხმარებლის ოფიციალური ნებართვის გარეშე არ გაიცემა. თავად მომხმარებელს შეუძლია ოფიციალურად მოგვმართოს განცხადებით, რაზეც დაუყონებლივ მოხდება რეაგირება.

საიტის ტექნიკური გაუმართაობის შედეგად თანხის მოჭრას ან დაკარგვას არ ვადასტურებთ. "ევროპა ბეთის" თითოეული მომხმარებლის პრობლემა ინდივიდუალურად განიხილება და დაფიქსირებისთანავე ხდება მისი მყისიერად მოგვარება. ჩვენთვის მომხმარებლის კმაყოფილება უპირველესი და უმნიშვნელოვანესი მიზანია. ჩვენი ცხელი ხაზი, ვებგვერდზე live chat, Viber, Facebook და Forum.ge 24-საათიან რეჟიმში ფუნქციონირებს და გახსნილია ყველა პრობლემისა თუ საკითხის მოგვარებისთვის".