“ავადმყოფი შვილი და ქმარი მყავს, დახმარება კი მომიხსნეს!”

ოჯახში სამი სული ცხოვრობს _ ერთ-ერთი, 34 წლის გოჩა კერძევაძე ცერებრალური დამბლით არის დაავადებული და მას ყოველდღიურად ძვირადღირებული წამლები ესაჭიროება. 

მისი მშობლები საპენსიო ასაკის არ არიან, შესაბამისად, ოჯახის ერთადერთი შემოსავალი გოჩას 150-ლარიანი პენსიაა:

_ არ ვიცი, რა გავაკეთო. ახლა მეუღლეც ცუდად მყავს. ერთ საწოლზე _ ქმარი, მეორეზე _ შვილი მიწევს, რომელსაც დამოუკიდებლად არაფრის გაკეთება არ შეუძლია. 500 ლარის თხილი, 20 ქათამი და ერთი ძროხა გოჩას პენსიასთან ერთად _ სულ ესაა ჩვენი შემოსავალი მთელი წლის განმავლობაში. გოჩას სპეციალური კვება სჭირდება _ ფაფების გარდა ვერაფერს ჭამს, მე კი ყიდვის საშუალება არ მაქვს. მოვიდნენ, შეამოწმონ რა მაქვს კარადაში, ნახონ, რომ არც ფაფა მაქვს შვილისთვის და არც კარაქი. გოჩას დღეში სამ-ოთხჯერ ძვირადღირებული წამალი სჭირდება, რომ ტკივილები გაუყუჩდეს, _ გვითხრა ლალი კერძევაძემ.

მისივე თქმით, გადამოწმებამდე ოჯახს 34 000 ქულა ჰქონდა და დახმარებასაც იღებდნენ:

_ ასეთი რა გადაამოწმეს, არ ვიცი. ალბათ, სახლის ფასადი მოეწონათ, წლების წინ გაკეთებული. აბა, არაფერი შეცვლილა ჩვენს ცხოვრებაში _ პირიქით, უარესი მდგომარეობა გვაქვს, _ ამბობს ლალი კერძევაძე და დასძენს, რომ სოციალური აგენტის მიერ შევსებულ დეკლარაციასთან დაკავშირებით პრეტენზია არ აქვს:

_ მართლა არ ვიცი, რა ხდება _ ვერ გავარკვიეთ. ჩოხატაურში სოციალური მომსახურების სააგენტოში ვიყავი, დახმარება ვთხოვე _ დეკლარაციაში ყველაფერი სწორად წერია და ვერ გავიგე, რატომ მოვიდა ასეთი მაღალი ქულა, _ დასძინა ქალბატონმა ლალიმ, რომლის თქმით, აღნიშნულის შესახებ საქმის კურსში ჩოხატაურის მუნიციპალიტეტის გამგებელიც ჩააყენა და ყველა დოკუმენტი გადასცა.

_ ვესაუბრე სოციალური მომსახურების სააგენტოს ჩოხატაურის განყოფილების ხელმძღვანელობას. ვიცი, რომ სოცაგენტის მიერ შედგენილი დეკლარაცია გააცნეს ოჯახს, ბენეფიციარს დეკლარაციაში ასახული ინფორმაციისადმი უნდობლობა არ გამოუხატავს. მოქალაქის განცხადების ასლი, ჩვენი რეკომენდაციის თანდართვით, გადავაგზავნეთ შრომის, ჯანმრთელობისა და სოციალური დაცვის სამინისტროში, _ აღნიშნა ჩვენთან საუბრისას ჩოხატაურის მუნიციპალიტეტის გამგებელმა ირაკლი კუჭავამ.

მიუხედავად ამისა, ლალი კერძევაძეს ამ დრომდე არ მიუღია პასუხი კითხვაზე, რატომ შეუწყვიტეს სოციალური დახმარება. ამ კითხვაზე პასუხი არც სოციალური მომსახურების ჩოხატაურის ოფისში აქვთ:

_ ჩვენთვისაც გაურკვეველია, რატომ მიიღო ამ ოჯახმა ასეთი მაღალი ქულა. სიმართლე გითხრათ, ბოლო პერიოდში, გადამოწმების შემდეგ მოდის მაღალი ქულები და მიზეზი არ ვიცით. ასე იყო მარტოხელების შემთხვევაში და ამის გამო, კანონში ცვლილებაც შეიტანეს, თუმცა, ის ოჯახები, სადაც შეზღუდული შესაძლებლობის მქონე პირები ცხოვრობენ, ცვლილების გარეშე დარჩნენ და უმრავლესობას დახმარება მოეხსნა. ჩვენ, ამ შემთხვევაში, არაფერი შეგვიძლია და ყველა ასეთ ოჯახს ვურჩევთ, რომ ცენტრალურ აპარატში გაასაჩივრონ, _ გვითხრეს სოციალური მომსახურების ჩოხატაურის ოფისში.

"გურია ნიუსმა" აღნიშნულის შესახებ საქმის კურსში სოციალური მომსახურების სააგენტოს ცენტრალური ოფისი ჩააყენა. როგორც სააგენტოს პრესსამსახურის ხელმძღვანელმა ტატა გამყრელიძემ გვითხრა, კერძევაძეების პრობლემაში აუცილებლად გაერკვევიან:

_ ჩვენ გავივლით ამ საკითხს დეტალურად და შესაძლებლობების ფარგლებში ვიმოქმედებთ. ვერ გეტყვით დაზუსტებით, ეს რა იქნება _ ხელახალი გადამოწმება თუ სხვა რამ, მაგრამ დახმარებას შევეცდებით, _ გვითხრა გამყრელიძემ.

მისივე თქმით, ქულის მომატებაში დეკლარაციაში შეტანილმა ცვლილებამ იმოქმედა:

_ ამ ოჯახს 2013 წელსაც მაღალი ქულა ჰქონდა. 2014-ში დაიწია ქულებმა და იღებდა დახმარებას. ადამიანურად, უმნიშვნელო ცვლილებებია დეკლარაციაში _ მაგალითად, მომატებული დენის გადასახადი, შინაური ფრინველის რაოდენობა. გასაგებია, რომ ეს ბევრი არაფერია, მაგრამ მეთოდოლოგია ითვლის ასე და ამის შესაბამისად ხდება ქულის განსაზღვრა, _ აღნიშნა გამყრელიძემ.

კითხვაზე, რატომ ხდება, რომ ქულები ემატება იმ ოჯახებს, სადაც შშმ პირი ცხოვრობს, გამყრელიძე გვპასუხობს:

_ სტატისტიკურად, ასეთი მონაცემები არ გვაქვს. პირიქით, პრიორიტეტი ენიჭება ისეთ ოჯახებს, სადაც შშმ პირი ცხოვრობს მისი საჭიროებებიდან გამომდინარე. თუმცა, თუკი სხვა მონაცემებია, აუცილებლად დავინტერესდებით და გადავამოწმებთ, _ ამბობს გამყრელიძე.