გაზეთ "გურია ნიუსის" ვებ-გვერდზე გუშინ გამოქვეყნდა ინფორმაცია სათაურით _ "ვინ არიან "საპატიო ოზურგეთელების" სავარაუდო კანდიდატები", სადაც ჟურნალისტი, წყაროზე დაყრდნობით, იმ ადამიანთა სახელობით სიას აქვეყნებს, რომელთაც სავარაუდოდ "საპატიო ოზურგეთელის" სტატუსი მიენიჭება.
გვინდა გამოქვეყნებულ მასალასთან დაკავშირებით რამდენიმე განმარტება გავაკეთოთ:
"ქალაქ ოზურგეთის მუნიციპალიტეტის საპატიო მოქალაქის წოდების შემოღებისა და საპატიო მოქალაქის წოდების მინიჭების წესის დამტკიცების შესახებ" დადგენილება ქალაქ ოზურგეთის მუნიციპალიტეტის საკრებულომ უნდა მიიღოს. საკრებულოს სხდომა ხვალ გაიმართება. შესაბამისად, საზოგადოებისთვის ხვალ გახდება ცნობილი კომისიის იმ წევრთა ვინაობა, რომლებიც "საპატიო ოზურგეთელის" სტატუსის მქონე პირთა ვინაობას განიხილავენ.
რაც შეეხება ქალაქ ოზურგეთის მერის სატელეფონო საუბარს სტატიის ავტორთან, ქალბატონ ჟანა მეგრელიშვილთან, ის არ ეხებოდა "გაფრთხილებას", არამედ მერის მხრიდან იყო თხოვნა, რომ შეესწორებინა ვებ-გვერდზე განთავსებული მასალა, რომელსაც საზოგადოება შეცდომაში შეყავდა.
გთავაზობთ სატელეფონო საუბრის დიალოგს, სადაც ნათლად ჩანს, რომ მერს არანაირი მითითებები და ბრძანებები არ გაუცია, არამედ ჟურნალისტს სთხოვა გავრცელებული, არასწორი ინფორმაციის შესწორება.
_ ეს ხალხი რომ დაწერე, სავარაუდო კანდიდატები არიანო და რომ არ იქნებიან, გული არ დაწყდებათ? არ გიფიქრიათ?
_ მე წყარომ მომაწოდა ეს ამბავი და…
_ ხო, მაგრამ ჟანა, მომისმინე ადამიანო, სერიოზულად მომისმინე, ეს ხალხი რომ არ დასახელდეს, ჯერ არ ვიცით, სავარაუდოდ, კომისია ვის დაასახელებს, რომ არ დასახელდეს, შემდეგ გული რომ დაწყდებათ, დაიბოღმებიან, განაწყენდებიან ამაზე, როგორც ჟურნალისტს ჟანა არ გიფიქრია?
_ არ ვიცი, არ მიფიქრია.
_ ცუდია, რომ არ გიფიქრია. რა ეშველება ამ ამბავს? რაღაცა რომ დავწეროთ ახალი, არ შეიძლება?
_ მითხარით თქვენი კომენტარი და დავწერ.
_ გეუბნებით, რომ ჯერ კომისია არ შემდგარა და ვინ დასახელდება და ვინ იქნებიან კანდიდატები, არ ვიცით. ნამდვილად არ ვერევი არანაირად და რა გითხრათ მეტი კომენტარი? უბრალოდ გული მწყდება, რომ შარშან რაც მოხდა, მსგავსი რაღაც არ უნდა მოხდეს და ამას ჟურნალისტებმა ხელი არ უნდა შეუწყოთ არანაირად. ცუდია ეს ხალხი რომ განაწყენდება, გულში მაინც განაწყენდება და რატომ ვშვებით ამას?
_ ხო მაგრამ, მე ხომ არ მიწერია მტკიცებით ფორმაში და არც ის მიწერია, რომ განიხილავენ,-თქო და არც ის მიწერია რომ დასახელდნენ,-მეთქი და კულტურის სამსახურის უფროსი ქალბატონი მარინა ჯაფარიძე ამბობს კომენტარს ზუსტად იგივეს, რასაც თქვენ, საერთოდ არ არის საუბარი ამ თემასთან დაკავშირებითო და რა ვიცი, მე მგონი, მკითხველი გაიგებს და ის ინფორმაცია, რომელიც მე დავწერე…
_ გააკეთე რამე ჟანა ისე, რომ არ დაიწყოს შარშანდელივით ადამიანების დაბოღმვა სპეციალურად და ნუ მიიღებთ ამ პროცესში მონაწილეობას ჟურნალისტები.
_ ნახევარ საათში სამსახურში ვიქნები და გავაკეთებ ინფორმაციას.
