განახლდა თუ არა დაბა ნასაკირალის საჯარო სკოლაში სასწავლო პროცესი , ამის შესახებ დღეს ოზურგეთში ორი ურთიერთგამომრიცხავი ინფორმაცია ვრცელდებოდა. დაბა ნასაკირალის მოსახლეობის ნაწილის თქმით, სასწავლო პროცესი გაგრძელდა, მეორე ნაწილი კი ამბობდა, რომ სასწავლო პროცესი ნაწილობრივ მიმდინარეობდა.
– ნასაკირალის საჯარო სკოლაში სასწავლო პროცესი ნაწილობრივ აღდგა. ვისაც უნდოდა დაესწრო სასწავლო პროცესს და ვისაც უნდოდა, არ დაესწრო. – გვითხრეს დაბა ნასიკარალის სკოლის მოსწავლეების მშობლებმა.
სკოლის ერთ-ერთი პედაგოგი ამბობს, რომ ორშაბათს დილით ყოფილმა დირექტორმა სპარტაკ გოგიტიძემ მოსწავლეებს მოუწოდა, აუცილებლად დასწრებოდნენ გაკვეთილებს. მისივე თქმით, სპარტაკ გოგიტიძის გამოსვლის შემდეგ სასწავლო პროცესი დაიწყო.
დაბა ნასაკირალის საჯარო სკოლის დირექტორის მოვალეობის შემსრულებელმა, ზაზა ცეცხლაძემ "გურია ნიუსის" ჟურნალისტებს საკლასო ოთახში სასწავლო პროცესის დროს გადაღების უფლება არ მოგვცა.
ზაზა ცეცხლაძე: _ სწავლა დილიდანვე დაიწყო .
_ მხოლოდ ვნახავთ, მიმდინარეობს თუ არა სასწავლო პროცესი.
_ სასწავლო პროცესი მიდის, ჩემი არ გჯერათ?
_ სკოლის მიმდებარე ტერიტორიაზე ათობით მოსწავლე ვნახეთ.
_ ვინც არ დაესწრო სასწავლო პროცესს, მათ დაეწერებათ საკლასო ჟურნალში არა. – გვითხრა ცეცხლაძემ.
"გურია ნიუსი" დაუკავშირდა სკოლის ყოფილ დირექტორს სპარტაკ გოგიტიძეს. მისივე თქმით, ის დილით იმყოფებოდა სკოლაში და ბავშვებს მოუწოდა სასწავლო პროცესში მიეღოთ მონაწილეობა.
– ბატონო სპარტაკ! იმყოფებოდით თუ არა ნასაკირალის სკოლაში და მიმართეთ თუ არა მოსწავლეებს?
– დიახ, მივმართე მათ. გავრცელდა დეზინფორმაცია, თითქოს ბავშვები, პედაგოგები და მშობლები ჩემს მიერ არიან მართულნი. ეს ნამდვილად არ შეესაბამება სიმართლეს, ავდექი და მოვუწოდე ყველას, სასწავლო პროცესს დაწრებოდნენ. ჩემი მოწოდების შემდეგ ისინი შევიდნენ სკოლის შენობაში და განახლდა სასწავლო პროცესი.
_ როგორც გვითხრეს, ბავშვების ერთი ნაწილი არ შევიდა კლასებში. ვრცელდება ასევე ინფორმაცია, რომ სანამ თქვენ არ დაბრუნდებით სკოლაში, ისინი არ დაესწრებიან გაკვეთილებს.
– ბავშვები, ნამდვილად ვიცი, რომ შევიდნენ სკოლაში. ოღონდ, მშობლებს და ბავშვებს ერთი მოთხოვნა აქვთ: სამართლიანად იქნას გამოძიებული ეს საკითხი. ძმები შავაძეების მიერ მოწოდებული ინფორმაცია არის არასწორი. მე ვიბრძოლებ სასამართლოს გზით._ თქვა , ჩვენთან საუბრის დროს, სპარტაკ გოგიტიძემ.
ნასაკირალის სკოლასთან სასწავლო პროცესის დამთავრებამდე სამართალდამცავების მანქანა იდგა.
