რა ქონებას ფლობს შინაგან საქმეთა მინისტრის მოადგილე

საქართველოს შინაგან საქმეთა მინისტრის მოადგილის არჩილ თალაკვაძის საკუთრებაში თბილისში, ნუცუბიძის ქუჩაზე მდებარე ბინა და მოტოსატრანსპორტო საშუალებაა.

ამის შესახებ თალაკვაძის დეკლარაციაშია აღნიშნული, რომელიც მან 2015 წლის 2 ოქტომბერს შეავსო.

კერძოდ დეკლარაციაში აღნიშნულია, რომ თალაკვაძე ფლობს თბილისში, ნუცუბიძის მე-3 მიკრო რაიონის პირველ კვარტალში მდებარე 109.90 კვ.მ-ის ფართობის ბინას და მოტოსატრანსპორტო საშუალება Harley Davidson XL1200N Nightster-ს.

რაც შეეხება მის ფინანსებს, დეკლარაციის შევსებისას "თი–ბი–სი" ბანკის სახელფასო ანგარიშზე 7080.67 ლარი, ხოლო ამავე ბანკის საკრედიტო ანგარიშზე 148.67 ლარი ჰქონდა.

დეკლარაციის მიხედვით, 1 წლის განმავლობაში არჩილ თალაკვაძის შემოსავლებმა 98 619.89 ლარი შეადგინა.

კერძოდ, არჩილ თალაკვაძემ საქართველოს სასჯელაღსრულებისა და  პრობაციის სამინისტროდან, სადაც მას  მინისტრის მოადგილის პოსტი ეჭირა,  89495.21 ლარი მიიღო; ხოლო  საქართველოს შინაგან საქმეთა სამინისტროდან (მინისტრის მოადგილე) 9124.68 ლარი.

რაც შეეხება მინისტრის მოადგილის ოჯახის გასავლებს, დეკლარაციაში აღნიშნულია, რომ თალაკვაძის სახელზე სამი სესხია.

"თი-ბი-სი" ბანკიდან აღებული 72000.00 დოლარიანი იპოთეკური სესხის (სასესხო ხელშეკრულების ვადები 10/09/2012, 10/09/2012 – 10/08/2027) დასაფარად, მას ერთი წლის განმავლობაში 10037.96 დოლარის გასავალი ჰქონია; ამავე ბანკიდან საკრედიტო ბარათით აღებული 10410.00 ლარიანი სესხის  (03/03/2014, 04/03/2014 – 01/03/2017) დასაფარად 10 200.00 ლარის გასავალი.

5100.00-ლარიანი სამომხმარებლო სესხის (10/12/2014, 10/12/2014 – 10/06/2016) დასაფარად კი, თანხა ჯერჯერობით გადახდილი არ აქვს.

დეკლარაციის მიხედვით, არჩილ თალაკვაძეს ჰყავს მეუღლე, ქეთევან ბუბუტეიშვილი და ორი შვილი – ანა ბეატრისი და ელე თალაკვაძე.