ოზურგეთში, იაკობ შემოქმედელის ქუჩაზე არაერთგან შეხვდებით "მოჩუხჩუხე წყაროებს", რომელიც წყალგაყვანილობის გამსკდარი მილებიდან მოედინება და ან გზას მიუყვება ან დაღმართ ადგილებზე პირდაპირ ეზოებში შედის. აქ მცხოვრებნი კი ცდილობენ წყალს გზა მისცენ და კვალი გაუკეთონ, მაგრამ როგორც თვითონ ამბობენ, ეს არის დროებითი წინაღობა, რომ ნიაღვარი პირდაპირ სახლში არ შევარდეს. უმთავრესი პრობლემა კი ის არის, რომ წყალი გუბეებად იქ დგება, სადაც მილია გამსკდარი, შიგ იხვებიც ხშირად ბანაობენ და მერე ეს დაბინძურებული წყალი მილებში მიმავალ სასმელ წყალს ისევ ერთვის, რაც ძალიან სახიფათოა.
" კაცი არ დაიჯერებს, რას ვსვამთ და ბავშვებს რას ვასმევთ, თორემ ჩვენი თავი ჯანდაბას. წარმოიდგინეთ გახეთქილი მილი, საიდანაც წყალი მოჩქეფს. თუ დამრეცი ადგილი არ არის, იქვე კეთდება გუბე, მერე კი გადმოსული წყალი გზას საითაც იპოვის, იქით მიდის. ამ გუბეში კი ხშირად ბანაობენ იხვები. ხალხს შინაური ფრინველი ჰყავს და ხომ ვერ აუკრძალავ? არადა, ვინ გვიპასუხებს, იხვების ნაბანავებ წყალს რომ ვსვამთ და ბავშვებს ვასმევთ, ამას გამართლება მოეძებნება? მიზეზი რომ არ ილევა, ვხედავთ. ასეთი მდგომარეობა იაკობ შემოქმედელის ქუჩის მესამე შესახვევში ჩვეულებრივი ამბავია. არაერთხელ მივედი წყალმომარაგების სერვისცენტში. მოვიდნენ, გააკეთეს რაღაც, მაგრამ ორ დღეში თუ ორ კვირაში რომ ყოველ ათ მეტრ მანძილზე მილები ისევ სკდება, გაკეთებული ჰქვია? "_ გვეუბნება ი. შემოქმედელის ქუჩის მცხოვრები, რომან პაპიძე.
ამავე ქუჩის მცხოვრები თამარ ჩხარტიშვილი ამბობს, რომ გახეთქილი მილებიდან გადმოსული წყალი პირდაპირ მის ეზოში ჩაედინება და სამზარეულო სახლის საძირკველში დგება. არაერთხელ გაჭრეს პატარა კვალი, რომ წყალს მიმართულება შეცვლოდა, თუმცა, ეს საქმეს დროებითაც არ შველის.
"შევატყობინეთ და კი იყვნენ მოსული, მაგრამ სოლის გარჭობა არ შველის მილს. უნდა გამოიცვალოს ეს გაყვანილობა მთლიანად, რაც ძალიან დიდ თანხას არ მოითხოვს. ძალიან დაზიანებულია შემოქმედელის ქუჩის მესამე შესახვევის ხაზი, თუმცა შეუძლებელი აქ არაფერია. მთავარია, გაკეთების სურვილი იყოს," _ გვითხრა მან.
აღნიშნული ქუჩის # 134 -ში მცხოვრები ზაურ ბიბინიძის ჭიშკრის პირდაპირ, ასფალტზე წყალს ისეთი ორმო "გაუკეთებია", ადამიანის ნამოქმედარი გეგონება.
"დაახლოებით სამი თვის წინ იყვნენ აქ და გააკეთეს, თუმცა, წყალმა მაინც ამოხეთქა. მილია შესაცვლელი. ძველი მილები იმდენად დაზიანებულია და დაცრეცილ-დამპალი, არ შველის ალაგ-ალაგ შეკეთება. ერთხელ მოსახლეობამ მოითათბირა, ჩვენი ხარჯებით შევაკეთოთო, მაგრამ უარი უთხრეს, დაგაჯარიმებთო. კი ვართ ამ დღეში. რა ვქნათ?" _ გვითხრა ბიბინიძეების ოჯახის წევრმა ზურა ბიბინიძემ.
შემოქმედელის ქუჩის მცხოვრებთა თქმით, ერთი მონდომება დაასრულებდა ამ საქმეს და არა აქა-იქ "პალოს" გარჭობა. ისინი ამბობენ, რომ მათი ჯანმრთელობა დგას საშიშროების წინაშე. ამასთანავე იშლება და ოღროჩოღრო ხდება გზა, რომელზეც დაგებული ასფალტი გაცილებით დიდხანს გაძლებდა.
_მოკლედ, რამდენიმე საქმე ფუჭდება იმის გამო, რომ "ერთი თავი საქმე თავიანად არ კეთდება", _ ამბობენ ისინი.
"მადლობელი ვართ, რომ მოხვედით, მარა მიდი, ჰკითხე და რას გააკეთებენ მერე ისიც მოიკითხე. დაპირების მეტი რა იციან? არჩევნების წინ კი იძახდნენ, ყველაფერს გავაკეთებთო. დაპირებაში მაინც ყველა ერთმანეთს ისე ჰგავს ეს მთავრობები, ტყუპი დები თუ ძმები არ ემსგავსებიან ასე ერთმანეთს," _ განაწყენებული ამბობს რომან პაპიძე.
_ქვითრის მოტანას ერთი წუთით არ აგვიანებენ და მაგ ქვითარში ჩახედვამდე ამ დახეთქილ მილებს შეხედონ, _ გვაბარებენ იაკობ შემოქმედელის ქუჩის მცხოვრებლები.
"გურია ნიუსი" დაუკავშირდა საქართველოს გაერთიანებული წყალმომარაგების კომპანიის ოზურგეთის, ჩოხატაურისა და ლანჩხუთის გაერთიანებული სერვისცენტრის უფროსს ლევან აფხაზავას.
_ ბატონო ლევან, მთელი დღის განმავლობაში ვერ გიკავშირდებით, უფრო სწორად არ მპასუხობთ, რაშია საქმე?
_დიახ, ადრე დილიდან გასული ვარ სამსახურიდან. ამ წუთებში ვიმყოფები ლანჩხუთში, ორაგვის სათავესთან. არის ასეთი ადგილი, საიდანაც ლანჩხუთს წყალი მიეწოდება. ბოდიშს გიხდით, ალბათ, ვერ გავიგე ზარი.
_ოზურგეთში, იაკობ შემოქმედელის ქუჩაზე მოსახლეობა ძალიან შეწუხებულია წყალგაყვანილობის მილების დაზიანების გამო. მესამე შესახვევში განსაკუთრებით მძიმე მდგომარეობაა. მთელ სიგრძეზე დახეთქილია მილები და ყველგან გუბეები დგას, თან წყალი მიედინება პირდაპირ ქუჩაზე თუ ეზოებში…
_გეტყვით, რომ მე სულ ერთი კვირის დანიშნული ვარ ამ თანამდებობაზე. ამ წუთებში უფრო მძიმე მდგომარეობაა ობიექტზე, სადაც ახლ ვიმყოფები. ხვალ დილით შემოქმედელის ქუჩაზე ვიქნები. აუცილებლად შეგეხმიანებით და თქვენც წამობრძანდით. ახლა კი დავრეკავ ოფისში და დავავალებ, რომ დღესაც მივიდნენ იქ და შეხედონ, რა ხდება, _ გვითხრა ლევან აფხაზავამ. ჩვენც შევპირდით, რომ აღნიშნულ ქუჩაზე წყალკანალის წარმომადგენლებთან ერთად მივალთ.
