სოციალურმა პროექტმა "თბილისი-მარათონმა", რომელიც წელს უკვე მეოთხედ გაიმართა არაერთი ადამიანი მიუხედავად პროფესიისა და საქმიანობისა ქველმოქმედებისთვის გააერთიანა.
წელს "თბილისი-მარათონი" ბევრი სიახლითა და განსხვავებული ფორმატით დაბრუნდა. თბილისის ზღვის ნაცვლად, სტარტი, ფინიში და სხვა პუნქტები რუსთაველის გამზირზე, თბილისის კლასიკური გიმნაზიის წინ განათავსეს. ღონისძიების გამო კი, გზები გადაიკეტა.
როგორც "გურია ნიუსს" საქართველოს სოფლის მეურნეობის ლაბორატორიის საზოგადოებასთან ურთიერთობის სპეციალისტმა, სალომე ქარელმა განუცხადა, მარათონი ჩვენი ქვეყნისთვის ძალიან მნიშვნელოვანია.
"ეს მარათონი ჩვენი ქვეყნისთვის ძალიან მნიშვნელოვანია. ვეხმარებით სხვადასხვა ადამიანებს, რის გამოც ვთვლი, რომ ხშირად უნდა ჩატარდეს. მაქსიმალურად უნდა იყოს ჩართული ყველა უწყება და ზოგადად მოხალისეები. საქართველოს სოფლის მეურნეობის ლაბორატორია ცდილობს აქტიურად ჩაერთოს მსგავსი ტიპის აქციებში და ჯანსაღი ცხოვრების წესის პროპაგანდა გაწიოს,"_ აღნიშნა ქარელმა.
"მსგავსი ტიპის ღონისძიებების ჩატარება ძალიან მნიშვნელოვანი და აუცილებელია. ჩვენ მეორედ ვმონაწილეობთ თბილისი-მარათონში. ვართ ერთ-ერთი სპონსორი და შეჯიბრშიც ვიღებთ მონაწილეობას,"_ აღნიშნა "ვიტამინ ველის" დირექტორმა, ალექსანდრე მაჩიტიძემ.
"სმარტის" სახელით მოასპარეზე გიორგი ოძელაშვილმა "გურია ნიუსთან" საუბრისას აღნიშნა, რომ ხალხი უნდა მიხვდეს ჯანმრთელობისთვის რამდენად საზიანო ალკოჰოლი და სიგარეტი.
"სმარტის სახელით "თბილისი-მარათონზე" პირველად ვასპარეზობ, თუმცა ადრე, სამჯერ მაქვს მონაწილეობა მიღებული. ამჯერად 21 კოლიმეტრი გავირბინე და 27-ე ადგილზე გავედი. მსგავსი ღონისძიებების ჩატარება, ვფიქრობ, სავალდებულოა. სასურველია, მარათონები ყოველკვირა ჩატარდეს. სპორტი ძალიან მნიშვნელოვანია ჯანმრთელობისთვის და ხალხმა უნდა დაინახოს, რომ მოწევა და დალევა სასარგებლო არ არის", _ აღნიშნა გიორგი ოძელაშვილმა.
თითქმის ყველა მონაწილე, რომლებიც მარათონში ასპარეზობდნენ, აღნიშნავენ, რომ მსგავსი ღონისძიებები უფრო ხშირად უნდა ტარდებოდეს.
"გარბენში "პროკრედიტ ბანკის" სახელით ვასპარეზობ. 10 კილომეტრი გავირბინე, ავიღე მედალი, რაც ჩემთვის ძალიან ამაღელვებელია. ვისურვებდი, მსგავსი ტიპის ღონისძიებები უფრო ხშირად ჩატარდეს, რადგან ადამიანებს კეთილი საქმის გასაკეთებლად აერთიანებს", _ამბობს ნინო კორჯიაშვილი.
როგორც სადაზღვევო კომპანია "აი-სი ჯგუფის" მარკეტინგის მენეჯერმა "გურია ნიუსთან" თქვა, რომ კომპანია აქტიურად ეწევა ჯანსაღი ცხოვრების წესის პროპაგანდას.
"თბილისი-მარათონში მესამე წელია რაც ვმონაწილეობთ. ერთ-ერთი გენერალური სპონსორი ვართ, მხარს ვუჭერთ ჯანსაღი ცხოვრების წესის პროპაგანდას და ყოველთვის ვერთვებით მსგავს აქტივობებში", _ აღნიშნა თამარ კალანდარიშვილმა.
რუსთაველის გამზირზე, მარათონის პარალელურად ხალხის განწყობაზე "ქავერ-ბენდი" ზრუნავდა.
როგორც ბენდის ბასგიტარისტმა "გურია ნიუსთან" აღნიშნა, საქველმოქმედო ღონისძიებებში მუსიკოსების მონაწილეობა აუცილებელია.
" მსგავსი ტიპის ღონისძიებები იმდენად მნიშვნელოვანია, რომ შესაძლოა ჯერ არც კი გვქონდეს გაცნობიერებული. მუსიკოსების ჩართვა საქველმოქმედო ღონისძიებებში აუცილებელია, რადგან ბევრი კარგი მუსიკოსია, რომელსაც საზოგადოება ჯერ არ იცნობს და ვთვლი, რომ ისინი უნდა გამოჩნდნენ და საზოგადოებამ დააფასოს. გარდა ამისა, მსგავსი ღონისძიებები ახალგაზრდების ჩამოყალიბებასა და განვითარებას ხელს უწყობს,"_ აღნიშნა ჯაბა აბრამიშვილმა.
ღონისძიების დასასრულს, მარათონის გამარჯვებულები ქალაქის მერმა დავით ნარმანიამ დააჯილდოვა.
"მარათონმა წარმატებით ჩაიარა. გამარჯვებულთა შორის არიან, როგორც ჩვენი თანამემამულეები, ისე უცხოეთიდან ჩამოსული სტუმრები. მნიშვნელოვანია, რომ როგორც ევროპიდან, ასევე ამერიკის შეერთებული შტატებიდან გვყავს პრიზიორები. სპეციალურად ამ მარათონში მონაწილეობის მისაღებად თბილისში უცხოეთიდან სამასზე მეტი მონაწილე ჩამოვიდა. მნიშვნელოვანია ასევე ის, რომ საკმაოდ დიდი ფინანსური რესურსის მობილიზება მოხდა ამ მარათონზე, რომელიც გაორმაგდება და ბედიანის ბავშვთა სახლის მშენებლობას მოხმარდება", _ განაცხადა ნარმანიამ.
ჰაიდელბერგ ცემენტის" მიერ ორგანიზებული სოციალური პროექტი "თბილისი-მარათონი" უკვე მეოთხედ გაიმართა. წელს "თბილისი-მარათონის" ღონისძიების მარშრუტი თბილისის ცენტრალურ უბნებს მოიცავდა. "თბილისი-მარათონმა" სტარტი დღეს დილით აიღო.
"თბილისი-მარათონმა" წელს ორი სახის გარბენი მოიცვა: ნახევარმარათონი (21.1კმ) და 10 კმ-იანი გარბენი. მარათონი საერთაშორისო სტანდარტების დაცვით ჩატარდა. შედეგების დათვლა მსოფლიოში აპრობირებული, Mika timing-ის "Official Timekeeping and Data Processing" სისტემით განხორციელდა.
ღონისძიების მიზანი საზოგადოებაში ჯანსაღი ცხოვრების წესის დამკვიდრება და სოციალური პასუხისმგებლობის გაზიარებაა.
რაც შეეხება მარათონის გამარჯვებულებს, მამაკაცებში, 10 კილომეტრზე გარბენში გამარჯვებული სომხეთის მოქალაქე ელვანდ ბომბეთეჩიანი გახდა, მეორე და მესამე ადგილები კი, ქართველმა მონაწილეებმა თეიმურაზ ბაითაურმა და ჯეირან ხოფერიამ დაიკავა.
ამავე მანძილზე, გოგონებში გამარჯვებულები კი, თამარ გელოშვილი (1 ადგილი), სტეფანი გორგოვსკი (მეორე ადგილი) და მარიამ დარახველიძე (მესამე ადგილი) გახდნენ.
რაც შეეხება ნახევარმარათონში (21კმ) გამარჯვებულ მონაწილეებს, გოგონებს შორის, პირველი ადგილი ვაილა ავალიანმა, მეორე ადგილი – თინათინ პაპუაშვილმა, მესამე კი, ბესა ბერბედკინომ დაიკავა.
ვაჟებს შორის ამავე დისტანციაზე კი, გამარჯვებულები გახდნენ: დავით ხარეზიშვილი (პირველი ადგილი), ანატოლი ოლეინიკოვი (მეორე ადგილი), მიხეილ მასუნიანი (მესამე ადგილი).
"თბილისი-მარათონი" მომავალ წელსაც გაიმართება.
