გასული კვირის ხუთშაბათს, გურიის სამხარეო ადმინისტრაციაში, "საქართველოს 2016 წლის სახელმწიფო ბიუჯეტის შესახებ" საქართველოს კანონის პროექტის საჯარო განხილვა გაიმართა. შეხვედრაზე დამსწრეებს საპარლამენტო კომიტეტისა და სამინისტროების წარმომადგენლებთან ერთად საშუალება მიეცათ, გაცნობოდნენ ბიუჯეტის პროექტს, განეხილათ მომავალი წლის საფინანსო დოკუმენტში გათვალისწინებული პრიორიტეტები და რიგი საკითხების შესახებ საკუთარი მოსაზრებები გამოეთქვათ.
გურიის მხარეში საბიუჯეტო პარამეტრების განხილვას საქართველოს პარლამენტის საფინანსო-საბიუჯეტო კომიტეტის თავმჯდომარე თამაზ მეჭიაური, კომიტეტის თავმჯდომარის პირველი მოადგილე ნოდარ ებანოიძე, ოზურგეთის მაჟორიტარი დეპუტატი, საპარლამენტო უმრავლესობის ლიდერი ზვიად კვაჭანტირაძე, ჩოხატაურის მაჟორიტარი დეპუტატი თემურ ჭკუასელი, ადგილობრივი ხელისუფლების, არასამთავრობო ორგანიზაციის და მედიის წარმომადგენლები ესწრებოდნენ.
ოზურგეთის მუნიციპალიტეტის საკრებულოს თავმჯდომარე დავით დარჩია პენსიების ზრდის საკითხით დაინტერესდა.
ფინანსთა სამინისტროს წარმომადგენლის ეკა გუნცაძის თქმით, ამ ეტაპზე, ჯერჯერობით, უცნობია, გაიზრდება თუ არა 2016 წელს პენსია:
_ ბიუჯეტის იმ ვერსიაში, რომელიც პირველი მოსმენით წარედგინა პარლამენტს, პენსიების ზრდა გათვალისწინებული არ არის, ანუ ნომინალურ გამოხატულებაში საპენსიო პროგრამა გაზრდილია. მოგეხსენებათ, წელს სექტემბრიდან გაიზარდა პენსია. წლევანდელ ბიუჯეტში მხოლოდ სექტემბრიდან წლის ბოლომდე საჭიროა სახსრები, ანუ 2016 წელს სრული ეფექტი იწვევს საპენსიო უზრუნველყოფის ზრდას, ამასთანავე დემოგრაფიული მდგომარეობა გვაქვს ისეთი, საპენსიო ასაკის მოსახლეობის რაოდენობა საკმაოდ იმატებს და პენსიონერთა რიცხვი 715 000-მდე გაიზრდება, როდესაც 2012 წლის ბოლოს იყო 695 000 ასაკით პენსიონერი. შემდეგ წარდგენაზე იქნება თუ არა ამ კუთხით ზრდა, მსჯელობის საგანია და მოლაპარაკებები მიმდინარეობს. ამ ეტაპზე პირდაპირ პასუხს ვერ გეტყვით, _ თქვა ეკა გუნცაძემ.
თამაზ მეჭიაურის თქმით, ფინანსთა სამინისტროს პარლამენტიდან სამმა კომიტეტმა მიმართა, რომ შემდეგ წელს მოხდეს პენსიის ზრდა:
_ ჯერჯერობით, მიმდინარეობს მუშა პროცესი და ვნახოთ, რა იქნება. არ გვინდა, ისეთი ნაბიჯი გადავდგათ, ერთი საქმე გავაკეთოთ და მეორე გავაფუჭოთ, _ განაცხადა შეხვედრაზე მეჭიაურმა.
_ შეკითხვა ძალიან ბევრი მაქვს. როგორც "კარალიოკის" ხეა შემოდგომაზე დახუნძლული, იმდენი კითხვა მაქვს. ყველაფრის თქმას დღეს არ ვაპირებ და ერთი კითხვა მექნება, _ ასე დაიწყო თავისი გამოსვლა დეპუტატმა თემურ ჭკუასელმა, _ შეხვედრაზე ითქვა, რომ მთის კანონთან დაკავშირებით 20 000 000 ლარი არის გათვალისწინებული ბიუჯეტში. ჩემთვის ეს არის გაუგებარი იმიტომ, რომ რამდენიმე დღის წინ იყო კომისიის სხდომა და ჯერ არაფერია დამთავრებული. თუ არაფერია დამთავრებული, 20 000 000 როგორ არის გამოყოფილი? ჯერ არ არის ცნობილი, რომელი სოფლები იქნება ამ პროექტში გათვალისწინებული და მეტი რომ იყოს საჭირო?! _ იკითხა დეპუტატმა.
ეკა გუნცაძე: _ ერთია, რამდენი არის საჭირო და მეორეა, რა საშუალება გვაქვს, ანუ რამდენიმე თემა არის მთის კანონთან დაკავშირებით…
თემურ ჭკუასელი: _ ეტყობა, კარგად ვერ ვთქვი და დავაზუსტებ _ ჯერ უნდა დადგინდეს რამდენია საჭირო და მერე უნდა გამოიყოს თანხა.
გუნცაძე ამბობს, რომ საორიენტაციოდ ზუსტი სია არ არსებობს, მაგრამ წარმოდგენა აქვთ, თუ რომელ სოფლებს მიენიჭებათ მაღალი სოფლის სტატუსი.
თემურ ჭკუასელის თქმით, ოზურგეთის მუნიციპალიტეტში ასეთი ოთხი სოფელი უნდა იყოს, ჩოხატაურის მუნიციპალიტეტში _ 8 სოფელი:
_ მაგრამ, ახლა ვერ მაძლევენ პასუხს, იქნება თუ არა ამ რაოდენობის სოფელი ამ პროექტში, _ აღნიშნა შეხვედრაზე ჭკუასელმა.
თემურ ჭკუასელმა განათლებისა და მეცნიერების სამინისტროს წარმომადგენელს ნათია გორგაძეს ჩოხატაურის მუნიციპალიტეტის სოფელ გუთურის სკოლის შენობის მშენებლობაზე დაუსვა კითხვა და მისი მისამართით კომპლიმენტიც არ დაიშურა: "განათლების სამინისტროს მინისტრივით ლამაზი გოგო გამოუგზავნია განხილვაზე", _ თქვა ჭკუასელმა.
"გურია ნიუსის" შეკითხვაზე, რამდენი სკოლის აშენება იგეგმება მომავალ წელს გურიის მასშტაბით, ნათია გორგაძემ უპასუხა, რომ ჩოხატაურში სკოლები აშენდება ამაღლებასა და ზოტში, ოზურგეთში კი _ ჭანიეთში.
_ გურიიდან დავიწყებთ მგონი ბუნტს, რადგან ძალიან მძიმე მდგომარეობაა გუთურში. ბავშვები სოფლის ადმინისტრაციულ შენობაში სწავლობენ. აქ იმყოფებიან ფინანსთა სამინისტროს წარმომადგენელებიც და მოგმართავთ თხოვნით, რაც შეიძლება დააჩქაროთ პრობლემის გადაწყვეტა, _ თქვა თემურ ჭკუასელმა.
ქალაქ ოზურგეთის მერმა ბეგლარ სიორიძემ წყლის სისტემის საკითხის მოგვარებაში დახმარება ითხოვა:
_ ქალაქ ოზურგეთში და ანასეულში საერთოდ არ მიეწოდება მოსახლეობას წყალი. ძალიან მძიმე მდგომარეობაა. მილიონნახევარი ლარი სჭირდება ამ პრობლემის გადაჭრას და ძალიან გთხოვთ, გაითვალისწინოთ ეს საკითხი, _ თქვა სიორიძემ, თუმცა, ამომწურავი პასუხი ვერ მიიღო.
გურიის გუბერნატორმა გია სალუქვაძემ ტენდერებზე გაამახვილა ყურადღება:
_ მიხეილ სააკაშვილმა როდესაც შემოიღო ეს ელექტრონული ტენდერები, გამოძიებით უკვე კარგა ხანია დადგენილია, რომ მაშინ სერვერი პირდაპირ მიერთებული იყო იუსტიციის სამინისტროსთან. ეს იყო "დემოკრატიის აყვავება" _ ნახეთ, რა კარგია ელექტრონული ტენდერიო, მაგრამ მასში მონაწილეობდნენ ერთი და იგივე ფირმები, რომლებიც "ნაცმოძრაობასთან" იყვნენ "გადასკვნილები". ახლა ჩვენ შევინარჩუნეთ ის კანონმდებლობა და მე გეუბნებით, როგორც გუბერნატორი, რომ ძალიან დიდი პრობლემების წინაშე დავდექით _ ტენდერში შემოდის მატყუარა, აფერისტი ფირმები და დროში ჭიანურდება ბევრი კარგი საქმის გაკეთება. ტენდერი აუცილებლად უნდა ჩატარდეს, მაგრამ ეს უნდა იყოს მაქსიმალურად გამჭვირვალედ, არ უნდა შექმნას პრობლემები და ფირმებმა დროზე შეასრულონ თავიანთი ვალდებულება, _ თქვა გუბერნატორმა.
შეხვედრაზე გია სალუქვაძემ თქვა, რომ ოზურგეთში თურქული კომპანია საწარმოს გახსნის:
_ ეს არის სოციალური პროექტი და ბოლო მიმოწერების მიხედვით, ყველაფერი გადაწყვეტილია. თურქული მხარე აპირებს "ადიდასის" და "ნაიკის" პროდუქციის მწარმოებელი საწარმოს გახსნას, რომლის მსგავსიც უკვე ფუნქციონირებს ხელვაჩაურში.
იქ დასაქმდება 400 ადამიანი. ამ პროექტის გახორციელებით გვინდა, რომ თურქეთში წასული ქალები დაუბრუნდნენ თავიათ საცხოვრებელ ადგილს, _ თქვა გუბერნატორმა.
სახელმწიფო ბიუჯეტის საჯარო განხილვების პროექტი, პარლამენტის საფინანსო-საბიუჯეტო კომიტეტის ორგანიზებით და USAID/დემოკრატიული მმართველობის ინიციატივა საქართველოში (CCI) მხარდაჭერით ხორციელდება.
