საქართველოს ყოფილი საგარეო საქმეთა მინისტრი სალომე ზურაბიშვილი იმ კომპლექსურ ღონისიებებზე საუბრობს, რომელთა გატარების შემთხვევაში თბილისში ჰაერის დაბინძურების მაჩვენებელი უნდა შემცირდეს.
"მგონი პრემიერი მთლად ტყუილად არ ჩასულა პარიზში და რაღაც სწორი მოსაზრებებიც კლიმატის ცვლილებების კონფერენციიდან ჩამოგვიტანა! "_- ასე უხმიანება ის საქართველოს მთავრობის მიერ ეკოლოგიურად უსაფრთხო გარემოს შექმნის მიზნით დაგეგმილ რიგ ღონისძიებებს ფეისბუქის პირად გვერდზე. სალომე ზურაბიშვილი მომავალში დასანერგ კომპლექსურ ღონისძიებებს თავაზობს ხელისუფლებას, რომელთა განხორციელების გარეშე ვერ მოხერხდება თბილიში ეკოლოგიური მდგომარეობის გამოსწორება.
"რაც ეხება თბილისის ეკოლოგიურ მდგომარეობას, და მანქანების გამონაბოლქვისგან გაწმენდის აუცილებლობას, ამ ყველა მოსაზრებას მთლიანად ვეთანხმები … ასევე ვიზიარებ ყველა მიღებულ თუ მისაღებ გადაწყვეტილებას, რათა მანქანების მიმოსვლა თბილისში ნორმალურ თანამედროვე წესებს ექვემდებარებოდეს !… ცივილიზებულ ქალაქს დავამსგავსოთ თბილისი , ამას რა სჯობია და ვინ უნდა იყოს წინააღმდეგი?
ისიც მართალია რომ ძალიან დიდი ნაწილი დღევანდელი ონკოლოგიურ დაავადებების გამოწვეულია სწორედ ჰაერის დაბინძურებისა და მწვანე საფარის შემცირებისგან!!!
ამავე დროს ასეთი პოლიტიკა, რომ იყოს ეფექტური, უნდა იყოს კომპლექსური და მხოლოდ მანქანებს მიმოსვლას და მათ ტექნიკურ გამართულობას არ აწესრიგებდეს, არამედ მთლიანობაში არსებულ პრობლემის გადაწყვეტას ემასახურებოდეს, რაც იწყება პირველ რიგში შემდეგი ზომებით :
– ბენზინის ხარისხის შემოწმებით და უვარგისი შემადგენლობის ბენზინის აკრძალვით (ხარისხის სერტიფიკატებს უნდა უშვებდეს ტარნსპორტის სამინისტრო და ამაზე პასუხისმგებლობას იღებდეს)
– ჰაერის ხარისხის განსინჯვის თანამედროვე მეთოდები და დანადგარები უნდა შემოიღონ და საზოგადოებას ეცნობოდეს ყოველდღიურად -როგორც ხდება ყველა დიდ ქალაქში- ჰაერის შემადგენლობა თავის სათანადო გაფრთხილებებით (ბავშვების და ხანშესულ ან დაავადებულ პირების მისამართით).
– მწვანე საფარის შენარჩუნების, გადარჩენის და გაზრდის სტრატეგია უნდა იყოს შემუშავებული და საჯაროდ გამოქვეყნებული: მაგალითად, შემოღებული იყოს მინიმალური კოეფიციენტები ქალაქის თითო უბნის მაშტაბით." -წერს სალომე ზურაბიშვილი. მისი აზრით, ხელისუფლებამ თავად უნდა მისცეს მაგალითი საზოგადოებას და მაქსიმალურად უნდა შეამციროს სახელმწიფოს კუთვნილი ავტომანქანების რაოდენობა, მკაცრად გააკონტროლოს ბენზინის ვაუჩერების მოხმარება სახელმწიფო მოხელეთა მიერ.
"მაგრამ აქედან უკვე სჩანს რომ ამ უმძიმეს მდგომარეობის გამოსწორებას სჭირდება არა ცალცალკე მიღებული ზომები, არამედ კომპლექსური სტრატეგია და საზოგადოების მომზადება …
ეს ყველაფერი და ბევრი სხვა რამ კიდევ აუცილებელია თუ გვინდა რომ გადავარჩინოთ ქალაქი და მისი მაცხოვრებლები უფრო მძიმე შედეგებისგან მომავალში…."– მიიჩნევს ზურაბიშვილი.
