საქართველოს თავდაცვის სამინისტრო უწყების ბალანსზე არსებულ ობიექტებს ამოწმებს.
ამის შესახებ "გურია ნიუსისთვის" გახდა ცნობილი.
სამინისტროში აცხადებენ, რომ გეგმიური შემოწმება მიმდინარეობს, თუმცა ობიექტებზე მაცხოვრებლებს განსხვავებული მოსაზრება აქვთ. მათი ინფორმაციით, სამინისტრო თავის ბალანსზე არსებული ობიექტებიდან ხალხის გამოსახლებას გეგმავს.
"გურია ნიუსი" თავდაცვის სამინისტროს საკუთრებაში არსებულ ვაზიანის დასახლებაში იმყოფებოდა, სადაც დაახლოებით 5 ათასამდე ადამიანი 56 კორპუსში უკვე რამდენიმე ათეული წელია ცხოვრობს. მაცხოვრებელთა პირობები თითქმის გაუსაძლისია, თუმცა როგორც ისინი ჩვენთან საუბრისას აცხადებენ, სხვაგან წასასვლელი არსად აქვთ.
კორპუსებში არ არის გამართული საკანალიზაციო და წყლის მილები, ფეკალიები კი პირდაპირ სარდაფში ჩაედინება.
ტერიტორიაზე რამდენიმე ნაგავსაყრელია. მოსახლეობა ამბობს, რომ ნაგვის გროვები საკუთარი სახსრებით გააქვთ, თუმცა, ეს საკმარისი არ არის.
ადგილობრივი მაცხოვრებლები ძირითადად აფხაზეთიდან დევნილები, უსახლკაროები და სოციალურად დაუცველი პირები არიან, რომლებიც რამდენიმე ათეული წელია აღნიშნულ კორპუსებში თვითნებურად შესახლდნენ.
როგორც ადგილობრივმა მაცხოვრებლებმა "გურია ნისს" განუცხადეს, ნოემბრის ბოლოდან სამინისტრო მათ აღწერას ატარებს. სამხედრო პოლიციის თანამშრომლები ადგილზე რამდენჯერმე იმყოფებოდნენ და მაცხოვრებელთა მონაცემები – სახელი, გვარი, პირადი ნომრები და ოჯახის წევრთა საერთო რაოდენობა ჩაიწერეს.
ადგილობრივები ამბობენ, რომ სამინისტროს წარმომადგენლები ადგილზე დაბეჭდილი სიებით იყვნენ მისულები, თუმცა, საიდან ჰქონდათ მათ ეს მონაცემები არ იციან, მაშინ როდესაც აღწერა ადგილზე 10 წელზე მეტია არ ჩატარებულა.
"ნოემბრის ბოლოდან დაიწყეს აღწერა. სამხედრო პოლიცია იყო მოსული. რომ ვკითხეთ რასთან დაკავშირებით იწერდნენ მონაცემებს, გვითხრეს, რომ მინისტრის ბრძანების საფუძველზე ტარდებოდა აღწერა.
ყველა კორპუსის მონაცემები აღწერეს. ოჯახის წევრების მონაცემებს იწერდნენ, პირადობის ნომრებით და სახეებით და გვარებით. სამხედროფორმიანი პირები იყვნენ, აგდებულად მიპასუხეს, მინისტრის ბრძანების ნომერი რომ ვიკითხე, 363 ნომერიაო. თვითონ ჰქონდათ სიები მოტანილი და იმის მიხედვით ამოწმებდნენ. ტელეფონის ნომრებს, პირადობის ნომერს და სულადობას ინიშნავდნენ", _ აცხადებენ ვაზიანის დასახლების მაცხოვრებლები.
"აქ მაცხოვრებელთა ზუსტი რიცხვი გარდაბნის მუნიციპალიტეტმაც არ იცის. რა სიები ჰქონდათ მოტანილი, ნამდვილად ვერ გეტყვით, ჩვენი სახელები და გვარები რომ ნამდვილად ეწერა, ეს შეგვიძლია დაგიდასტუროთ. ვისი ბინაც დაკეტილი დახვდათ, მეზობლების ინფორმაციის საფუძველზე არ წერდნენ", _ აღნიშნა ჩვენთან საუბრისას ვაზიანის დასახლების ერთ-ერთმა მაცხოვრებელმა ნონა მარტიაშვილმა.
"ჩვენი ინფორმაციით, სამხედროების ოჯახებისთვის აპირებენ ამ ბინების გადაცემას და მაგიტომ ამოწმებენ, თუმცა, დაზუსტებული ინფორმაცია არ გვაქვს", _ ამბობს გურია ნიუსთან" საუბრისას ნინო ქობულაშვილი.
ინფორმაციის გადასამოწმებლად "გურია ნიუსი" თავდაცვის სამინისტროს დაუკავშირდა. უწყებაში ადასტურებენ, რომ უწყების ბალანსზე არსებული შენობა-ნაგებობებისა და მასში მცხოვრები პირების აღწერა ნამდვილად მიმდინარეობს. თუმცა, პრესსამსახურში განგვიცხადეს, რომ მინისტრის კონკრეტული ბრძანების ნომერი მათთვის უცნობია, რის საფუძველზეც ეს შემოწმება ხორციელდება.
"ნამდვილად მიმდინარეობს შემოწმება. უკვე შევამოწმეთ ვაზიანსა და მცხეთაში არსებული კორპუსები. გვინდა ვიცოდეთ ვინ რა კანონიერი საფუძვლით ცხოვრობს სამინისტროს ბალანსზე არსებულ ქონებაში. თუმცა, გამოსახლება ან რაიმე სხვა მიზანი ამ შემოწმებას არ აქვს", _ აცხადებენ სამინისტროში.
ამავე თემაზე:
ვაზიანის მოსახლეობა შველას ითხოვს
მინისტრმა, ალბათ, ჩვენი გასაჭირი არ იცის – რას ითხოვს გიგლა აგულაშვილისგან მოსახლეობა
"გურია ნიუსის" სტატიას გარემოს დაცვის მინისტრი გამოეხმაურა
ვაზიანის დასახლების პრობლემა გარემოს დაცვის ზედამხედველობის დეპარტამენტმა შეისწავლა
სამინისტროს წერილი, გამგებლის წარმომადგენლის პასუხი და ნაგავსაყრელი ვაზიანში
