3 ბინა, 3 საცხოვრებელი სახლი და 6 მიწის ნაკვეთი – ეს ქონება პარლამენტის უმრავლესობის დეპუტატის, სოსო ჯაჭვლიანის ოჯახის საკუთრებაშია.
როგორც ჯაჭვლიანის ქონებრივ დეკლარაციაშია აღნიშნული, მისი ოჯახი თბილისში სამ ბინას ფლობს: დიდი დიღომი გიორგი ბრწყინვალეს ქუჩაზე 150.00 კვ.მ-ის ფართობის ბინა სოსო ჯაჭვლიანის საკუთრებაშია. ი.აბაშიძის ქუჩაზე 140.00 კვ.მ-ის ფართობისა და მოსაშვილის ქუჩაზე 100.00 კვ.მ-ის ფართობის ბინებს მისი მეუღლე, ირმა ფირცხალაიშვილი ფლობს.
სოსო ჯაჭვლიანის 100%-იან საკუთრებაშია მცხეთაში მდებარე 200.00 კვ.მ-ის ფართობის საცხოვრებელი სახლი (მებაღეობა ვეჯინი) და ამავე ტერიტორიაზე მდებარე 4 მიწის ნაკვეთი, რომელთა საერთო ფართობიც 3400 კვ.მ-ია.
გარდა ამისა ჯაჭვლიანის საკუთრებაშია საცხოვრებელი სახლი მესტიაში, ფარჯიანის ქუჩაზე, რომლის ფართობიც 150.00 კვ.მ-ია და ამავე მისამართზე მდებარე 1850.00 კვ.მ-ის ფართობის მიწის ნაკვეთი.
ჯაჭვლიანის მეუღლის საკუთრებაშია მიწის ნაკვეთი და საცხოვრებელი სახლი ბორჯომში ( წაღვერი), ფიროსმანის ქუჩაზე, დეკლარაციის მიხედვით, მიწის ნაკვეთის ფართობი 500.00 კვ.მ, ხოლო სახლის ფართობი 80.00 კვ.მ-ია.
ჯაჭვლიანის საკუთრებაშია, ასევე, თბილისში, დიდი დიღომში გ.ბრწყინვალის ქუჩაზე მდებარე 25.00 კვ.მ-ის ფართობის ავტოფარეხიც.
რაც შეეხება პარლამენტარის ფინანსურ მდგომარეობას, დეკლარაციის მიხედვით, მისი წლიური შემოსავალი 58 665 ლარი იყო.
კერძოდ, საქართველოს პარლამენტიდან ჯაჭვლიანმა 56865.00 ლარი, ხოლო საქართველოს მკლავჭიდის ეროვნული ფედერაციის მწვრთნელის პოზიციისტვის კი, 1800.00 ლარი მიიღო.
დეკლარაციის შევსების მომენტში, სოსო ჯაჭვლიანის სახელფასო ანგარიშზე ბანკ „ქართუში“ 3000.00 ლარი იყო, მეორე ანგარიშზე კი, 975.00 ლარი; თი-ბი-სი ბანკის დეპოზიტზე 403 ევრო ჰქონდა.
დეპუტატის სახელზე არ არის ფასიანი ქაღალდები და საბანკო სესხი.
დეკლარაციის მიხედვით, მას ერთი წლის განმავლობაში არც ფასიანი საჩუქრები მიუღია.
