მომავალი წლის მთავარ საფინანსო დოკუმენტის შესწორებულ პროექტზე მსჯელობა ლანჩხუთის საკრებულოს სხდომაზე მომავალ პარასკევს გაიმართება. მანამდე კი აღნიშნულ დოკუმენტს ფრაქციებისა და კომისიების სხდომებზე განიხილავენ.
როგორც გაირკვა, 2016 წელს ძირითადი პრიორიტეტი ინფრასტრუქტურული სამუშაოების გახორციელებაა.
გამგეობის ინფრასტრუქტურისა და არქიტექტურის სამსახურის უფროსის, ლევან ჩხაიძის ინფორმაციით, ინფრასტრუქტურული პროექტები ყველა ადმინისტრაციულ ერთეულს მოიცავს _ მოწესრიგდება გზები, წყლის სისტემები. მუნიციპალიტეტში სამი ახალი საბავშვო ბაღი აშენდება, ხოლო შუხუთის ადმინისტრაციაში არსებულ ბაღს სრული რეაბილიტაცია ჩაუტარდება. ასევე, იგეგმება სპორტული სკოლის შენობის დაპროექტებაც.
ამ პრიორიტეტების წარმოჩენის ფონზე აღმოჩნდა, რომ გამგეობის მხრიდან წარმოდგენილი ბიუჯეტის პროექტს დადებით შეფასებას უმრავლესობის ზოგიერთი წევრიც ვერ აძლევს. უფრო მეტიც _ ბიუჯეტის არსებულ ვარიანტს მხარი არ დაუჭირა ეკონომიკის, ქონების მართვისა და ბუნებრივი რესურსების საკითხების კომისიის შვიდი წევრიდან ექვსმა დეპუტატმა. შენიშვნა, ძირითადად, საკუთარი შემოსავლების მუხლს ეხებოდა, რომლის შესრულება ნამდვილად იწვევს ეჭვს. კომისიის წევრებს მიაჩნიათ, რომ ამ მუხლში წარმოდგენილი თანხა 2 მილიონ 500 ათას ლარამდე უნდა შემცირდეს. არადა, გამგეობის მიერ წარმოდგენილ ბიუჯეტის პროექტში საკუთარი შემოსავლები 3 მილიონ 958 ათას 200 ლარია. ამ მხრივ გამოითქვა მოსაზრება, თუ როგორ უნდა მოხდეს ეს შემცირება და რაც მთავარია, რის ხარჯზე. კომისიამ დაადგინა, რომ საამისოდ საფეხბურთო კლუბ "გურიას" 300 ათასი ლარით უნდა შეუმცირდეს დაფინანსება. ამას გარდა, საკრებულოსა და გამგეობის საჯარო მოხელეთა ხელფასები დაგეგმილი 14 თვის ნაცვლად 13 თვით აისახოს. კომისიამ მიზანშეწონილად მიიჩნია, რომ ა(ა)იპ-ებში შტატები ძირეულად შემცირდეს და ამის ხარჯზე გამოთავისუფლდეს, დაახლოებით, 800 ათასი ლარი. ამ მოთხოვნების გარდა, სხვა საბიუჯეტო ცვლილებების მომხრე არიან კომისიის წევრები და მხოლოდ ამის შემდეგ დაუჭერენ ისინი მხარს ახალ ბიუჯეტს.
გაცილებით შორს წავიდა ბიუჯეტის პროექტზე მსჯელობისას სამანდატო, საპროცედურო, იურიდიულ საკითხთა და ეთიკის კომისია. კომისიის წევრების მხრიდან გამოთქმული შენიშვნების გათვალისწინებით, სხდომამ მიიღო გადაწყვეტილება, რომ "ლანჩხუთის მუნიციპალიტეტის 2016 წლის ბიუჯეტის დამტკიცების შესახებ" დადგენილების პროექტს მხარი არ დაუჭიროს. მათი თქმით, ბოლო ორი წლის მანძილზე ტენდენციად იქცა ლანჩხუთის მუნიციპალიტეტის ბიუჯეტის არშესრულების ტრადიცია. აქედან გამომდინარე, ისინი ვარაუდს გამოთქვამენ, რომ მომავალი წლის ბიუჯეტის პროექტის ხელოვნურად გაზრდილი საშემოსავლო ნაწილი ვერ შესრულდება.
წინასწარი ვარაუდით, ბიუჯეტის პროექტთან დაკავშირებით, მწვავე მსჯელობა იქნება საფინანსო-საბიუჯეტო კომისიის სხდომაზეც. კომისიის ცალკეულ წევრებთან საუბრისას იკვეთება, რომ მათ უმრავლესობას ძირითადი შენიშვნები, სწორედ, საკუთარი შემოსავლების მუხლთან დაკავშირებით გააჩნიათ.
