ქალაქ ოზურგეთის მუნიციპალიტეტის საკრებულოს დეპუტატი "ლეიბორისტული პარტიიდან ნათია შარაშენიძე ამბობს, რომ გუშინ, ბიუროს სხდომის დასასრულს სანიშნე ფურცლები ესროლეს.
მისი ვარაუდით, ეს ოზურგეთის მერი ბეგლარ სიორიძე იყო.
ამ ინფორმაციას კატეგორიულად უარყოფს სიორიძე და აღნიშნავს, რომ "ქალბატონ ნათიას ოპოზიციონერობა, ყველა საშუალების გამოყენებით, მუდმივი წინააღმდეგობა ჰგონია":
_ მას შემდეგ, რაც ლეიბორისტი შარაშენიძე თავისი არადეკვატური გამოხდომებით ყოველგვარ ზღვარს გასცდა, განვაცხადე, რომ მის სიზმრებზე კომენტარს აღარ გავაკეთებდი. ეს გამონაკლისი შემთხვევაა, როცა ჩემს ნათქვამს არ ვასრულებ და ერთადერთი დაპირების შეუსრულებლობა მართლაც გამომტყუა ქალბატონმა ნათიამ.
მას აქვს აკვიატებული იდეა-ფიქსი, რომ მერიისა და მერის ყველა ინიციატივას წინააღმდეგობა გაუწიოს. აბსოლუტურად არ ხარჯავს მისი მწირი გონების არცერთ შესაძლებლობას, რომ დაფიქრდეს, იქნებ საზოგადოებისთვის სასარგებლოა მერიის რომელიმე ინიციატივა?
ან ვერ ახერხებს ამ ყველაფრის გააზრებას, რაშიც გულწრფელად ვუთანაგრძნობ, ან საერთოდ არ აინტერესებს ხალხისთვის სასარგებლო რა არის. ქალბატონ ნათიას ოპოზიციონერობა, ყველა საშუალების გამოყენებით, მუდმივი წინააღმდეგობა ჰგონია.
რაც შეეხება მის ბოლოდროინდელ პროვოკაციას ქალაქის მერის წინააღმდეგ, (თუკი ეს მიზანმიმართული პროვოკაცია არ არის და მას ნამდვილად დაეწყო მოჩვენებები), თითქოს მას ქაღალდის სანიშნეები ვესროლე, არ მეგულება ოზურგეთში ადამიანი, ვინც ამას დაიჯერებს.
თუ არა მიზანმიმართული პროვოკაცია ქალაქის მერის მიმართ და თუკი ქალბატონ ნათიას მართლაც უჩნდება ასეთი აზრი, რომ მას ვინმემ სანიშნეები ესროლა, საინტერესოა, რატომ მაინცდამაინც ქალაქის მერმა და არა ვინმემ სხვამ ჩაიდინა ეს საშინელი დანაშაული?! ოთახში ხომ 15-მდე ადამიანი იმყოფებოდა. ამ თხუთმეტი ადამიანიდან კი ვერცერთმა მათგანმა ვერ დაინახა ეს ფაქტი?! თუმცა რას დაინახავდნენ, როცა მსგავსი რამ არავის ესიზმრება, გარდა ნათია შარაშენიძისა.
აქვე მინდა საზოგადოებას განვუმარტო, რომ ამჟამად ქალაქის მერიასა და საკრებულოში მიმდინარეობს სარემონტო სამუშაოები და ფორს-მაჟორული გარემოა შექმნილი (მიმდინარე ტექნიკური სამუშაოების გამო ქაღალდის სანიშნეები დროებით გამოყენებული იყო კარის ჩარჩოზე ზარის გასამაგრებლად).
ბოლოს, რჩევის სახით ვეტყოდი, რომ ცოტათი მაინც გაუსწოროს რეალობას თვალი, ადეკვატურად აღიქვას მოვლენები. ცოტათი მაინც შეელიოს ‘’მყეფარა ძაღლის’’ იმიჯს, რადგან კარგად მოეხსენება, ‘’ძაღლი ყეფს, ქარავანი მიდის’’. ქარავანი კი, მერწმუნეთ, ნამდვილად სწორი მიმართულებით მიდის და ქალაქ ოზურგეთის აღმშენებლობას ლეიბორისტი შარაშენიძე ხელს ვერასდროს შეუშლის!, _ აღნიშნავს სიორიძე.
ამავე თემაზე: დეპუტატი კოლეგას წიხლქვეშ გაგდებით დაემუქრა; დეპუტატი მერს: შეგიძლიათ არ დაესწროთ სხდომას ანუ რა მოხდა ბიუროზე
