ლანჩხუთის მუნიციპალიტეტის 2016 წლის დამტკიცებულ ბიუჯეტში, განისაზღვრა იმ 11 არაკომერციული (არამომგებიანი) იურიდიული პირის დაფინანსება, რომელიც მუნიციპალიტეტის ტერიტორიაზე ახორციელებს სხვადასხვა საქმიანობას. მთლიანობაში ა(ა)იპ – ები დაფინანსდება 5 მილიონ 864 ათასი ლარით, მათ შორის ყველაზე დიდი თანხა ერგო "სკოლამდელ საგანმანათლებლო ცენტრს", რომელსაც გასულ წელთან შედარებით 250 ათასი ლარით გაეზარდა დაფინანსება და მილიონ 750 ათასი ლარი გაუხდა.
მილიონ ლარს გადააცილა საფეხბურთო კლუბ "გურიას" დაფინანსებამაც და ის მილიონ 250 ათასი ლარით განისაზღვრა, ხოლო "მილიონერთა" სიაში მოხვდა ასევე "კულტურის დაწესებულებათა გაერთიანებაც", რომელსაც მილიონ 023 ათასი ლარი ერგო.
სპორტული დაწესებულებებიდან "სპორტული ცენტრი" მომავალ წელს 375 ათასი ლარით დაფინანსდება, "ბავშვთა საფეხბურთო სკოლა" 190 ათასი ლარით, ხოლო "გოგონათა სარაგბო – საფეხბურთო სკოლა" – 65 ათასი ლარით.
მუნიციპალიტეტის ტერიტორიის დაგვა – დასუფთავებასა და ნარჩენების გატანაზე, არსებული სკვერების მოვლასა და გამწვანების სამუშაოების ჩატარებაზე და სასაფლაოების მოვლა – პატრონობაზე იზრუნებს ა(ა) იპ "ლანჩხუთი – სერვისი," რომელიც 450 ათასი ლარით დაფინანსდება, ხოლო გარე განათებისა და სოფლებში წყლის სისტემების მოვლა – პატრონობისთვის ა(ა) იპ "ტექ – სერვისს" 400 ათასი ლარი ერგო.
"საზოგადოებრივი ჯანდაცვის ცენტრი" 130 ათასი ლარით განახორციელებს მომავალი წლის პროგრამებს, ხოლო "საგარეო-ეკონომიკური კავშირურთიერთობების, ინვესტიციების, ტრანსპორტის და ტურიზმის განვითარების ცენტრი" – 154 ათასი ლარით.
რაც შეეხება "უფასო სასადილი მზრუნველობამოკლებულთათვის", ის 2016 წელს 77 ათასი ლარით დაფინანსდა.
