"ლანჩხუთში დღეს მართლაც დიდი თოვლი მოვიდა. შეიძლება მხოლოდ თოვლის ბაბუს გაკეთება გაუხარდათ პატარებს, მაგრამ არ მგონია უფროსებს, რომლებიც დარჩნენ გზის გარეშე უამრავ პრობლემებთან ერთად, უხაროდეთ ეს თოვლი. მთელი დღის განმავლობაში ვრცელდება სამარცხვინო ტყუილი ინფორმაცია, თითქოს მუნიციპალიტეტი გზას ასუფთავებს. არ დაიჯეროთ. ჯუნეწერში გზა არ არის. ერთი მეტრო თოვლი დევს გზაზე. ვის სჭირდება ასეთი არაკეთილსინდისიერი ხელუსუფლება? მთელი დღე კიდეც მიდის ხალხის მოტყუება. სირცხვილი, უსინდისობა. აი, ეს არის დღევანდელი ლანჩხუთი. დაჯექით და ფანჯრებიდან უყურეთ ვინ გაგიწმენდთ გზაააას… კარგია რა თოვლი?.." ეს სტატუსი გუშინ გამოაქვეყნა სოციალურ ქსელში ლანჩხუთის მუნიციპალიტეტის სოფელ გვიმბალაურში მცხოვრებმა ნანა გოგილაშვილმა.
ჯუნეწერი გვიმბალაურის შემადგენლობაში შემავალი სოფელია, რომელიც სამი კილომეტრითაა მოშორებული რაიონულ ცენტრს. სტატუსს ოპერატიულად გამოეხმაურა ლანჩხუთის მუნიციპალიტეტის გამგეობის პრესსამსახურის თანამშრომელი ნინო მშვიდობაძე, რომელის პასუხიც ასეთი იყო: "მთელი ღამის განმავლობაში მუშაობდა გრეიდერი. თავად ვარ ამის მნახველი და მონაწილეც. ამიტომ ტყუილი საკადრისი არაა. ფაქტია, ყველგან ვერ შეძლო გავლა. დღეს ისევ ყველა სოფელში გაიწმინდება გზები. ერთბაშად ყველაფერი ვერ გაკეთდება, ნელ-ნელა კეთდება, ჯუნეწერშიც ამოვა გრეიდერი."
ეს ხდებოდა გუშინ. ჩვენ დღეს შევეცადეთ რეალური სურათი გვეჩვენებინა რა ხდება სოფელში ამ წუთებში.
ტელეფონით დაგვიკავშირდა ადგილობრივი მოსახლეობა, რომელიც ამბობს, რომ სოფელში ამ დრომდე არც გზაა გაწმენდილი და გუშინდელს მერე არც ელექტროენერგია მიეწოდებათ. ამის საილუსტრაციოდ კი ფოტოებიც მოგვაწოდეს.
ლანჩხუთის გამგეობის პრესსამსახურის უფროსის მაკა სულაბერიძის ინფორმაციით, დაზიანებულია ელექტროგადამცემი ხაზები, რომლის შეკეთების სამუშაოები ამ წუთებშიც მიმდინარეობს. სავარაუდოდ, შუქი სოფელს დღეს საღამომდე აღუდგება.
რაც შეეხება გზის გაწმენდას, გამგეობის ზედამხედველობის სამსახურის უფროსის თენგიზ ხელაძის ინფორმაციით, ჯუნეწერში ტრაქტორი უკვე გაგზავნილია.
