გამოცდებზე გასული ის პირები, რომელთა მიმართაც გარკვეული ეჭვი არსებობს, მოკვლევის დასრულებამდე სასამართლო სისტემაში ვერ მოხვდებიან.
ამის შესახებ ჟურნალისტებს იუსტციის საბჭოს მდივანმა, ლევან მურუსიძემ განუცხადა.
მისივე თქმით, იუსტიცის უმაღლესი საბჭო სწავლობს ტესტირების ყველა შედეგს და თუ რა დასკვნა მომზადდება, ამის შესახებ საზოგადოებისთვის გახდება ცნობილი.
"გამოცდაზე ათეულობით კონკურსანტი გავიდა. შემოწმებას დრო სჭირდება. ვიდრე არ გაირკვევა აღნიშნული საკითხი, ისინი სასამართლო სისტემაში ვერ მოხვდებიან. საბჭო დიდი ხანია, ამ თემაზე მუშაობს, არავინ არაფრის დამალვას არ აპირებს", _ აღნიშნა მურუსიძემ.
კითხვაზე, ტესტირებაში მონაწილე ირინე ხერხეულიძესთან დაკავშირებით, რომელმაც 100 ქულა მოაგროვა და, რომლის სადოქტორო ნამუშევრის ხელმძღვანელია ნინო გვენეტაძე, მურუსიძემ განაცხადა, რომ ამ მიმართულებით ეჭვები შეიძლება გაძლიერდეს, შეიძლება – არა.
განცხადება, რომ მოსამართლეთა შესარჩევ კონკურსში მონაწილე ზოგიერთმა პირმა წინასწარ იცოდა ტესტების შინაარსი, თბილისის საქალაქო სასამართლოს თავმჯდომარემ, მამუკა ახვლედიანმა გააკეთა. ასეთ კონკურსანტებს შორის მან ირინა ხერხეულიძე დაასახელა.
