სახელმწიფო აუდიტის სამსახურმა ლეონიდ ჩერნოვეცკის ფონდის – "გაერთიანება ბედნიერი საქართველოსთვის" – განცხადებული საარჩევნო მიზნის მქონე სუბიექტად აღიარების პროცესი დაასრულა.
როგორც სახელმწიფო აუდიტის სამსახურის მიერ გავრცელებულ განცხადებაშია აღნიშნული, დღეიდან ჩერნოვეცკის ფონდი "მოქალაქეთა პოლიტიკური გაერთიანებების შესახებ" საქართველოს ორგანული კანონით პოლიტიკური პარტიებისთვის დადგენილ შეზღუდვებს დაექვემდებარება. ფონდის შემოსავლები და ფინანსური ანგარიშები კი, საჯარო იქნება.
"აღსანიშნავია, რომ ყველა სუბიექტი, რომელსაც გააჩნია საარჩევნო მიზნები და ამ მიზნების მისაღწევად გაწევს ფინანსურ ხარჯს, უნდა დაექვემდებაროს პოლიტიკური პარტიებისთვის კანონმდებლობით დადგენილ წესებს. შესაბამისად, მივმართავთ ნებისმიერ იურიდიულ თუ ფიზიკურ პირს, რომელიც გეგმავს საპარლამენტო არჩევნებში მონაწილეობას, დარეგისტრირდეს სახელმწიფო აუდიტის სამსახურში. აღნიშნულის მიზანია მივაღწიოთ პოლიტიკური ფინანსების მაქსიმალურ გამჭვირვალობას, რათა დაინტერესებულმა პირებმა იცოდნენ, თუ როგორ ფინანსდება და იხარჯება თანხები სუბიექტების მიერ", _ აღნიშნულია სახელმწიფო აუდიტის სამსახურის მიერ გავრცელებულ განცხადებაში.
