ოზურგეთის მუნიციპალიტეტის სოფლებში _ ურეკისა და მერიის ტერიტორიაზე, ნაგავსაყრელებია განთავსებული. "გურია ნიუსი" დაინტერესდა, რამდენადაა დაცული ნაგავსაყრელის მიმდებარე ტერიტორიაზე მცხოვრები მოსახლეობა.
როგორც მერიის მცხოვრებლები ამბობენ, არის ანტისანიტარია, აწუხებთ სუნი და რაც ყველაზე მთავარია, მათი თქმით, ნაგავსაყრელთან მისასვლელი სამანქანო გზა იმდენად ჭაობიანია, რომ გავლა საშიში ხდება.
ოზურგეთის მუნიციპალიტეტის გამგეობაში აღნიშნულთან დაკავშირებით ამბობენ, რომ მყარი ნარჩენების დამუშავება ყველა ინსტრუქციის დაცვით მიმდინარეობს:
"მერია-ლაითურის ნაგავსაყრელზე მყარი ნარჩენების დამუშავება ხდება ყველა ინსტრუქციის დაცვით. ნაგავსაყრელიდან ორი კილომეტრის რადიუსში მოსახლეობა არ ცხოვრობს. ოპერატიულად მიმდინარეობს მუდმივი სამუშაო პროცესი. ნაგავსაყრელზე უცხო პირთა შესვლა აკრძალულია. მოსახლეობას საფრთხე არ ემუქრება, გამომდინარე იქედან, რომ პროცესი არის ტექნოლოგიურად გამართული, ოპერატორები მუშაობენ დაშვებული ნორმების ფარგლებში, რესპირატორებით და სპეცტანსაცმლით, რითაც მუშა-პერსონალი დაცულია მავნე ზემოქმედებისგან. გარდა ამისა, მერიის ნაგავსაყრელზე არ შემოდის საფრთხის შემცველი ნარჩენები _ ქიმიკატები და მომწამვლელი ნივთიერებები, ვადაგასული ფარმაცევტული ნაწარმი. აქ შემოდის მხოლოდ ორგანული ნარჩენი. პროცესი კონტროლდება მკაცრად.
რაც შეეხება ურეკის მუნიციპალურ ნაგავსაყრელს, მისი ფართობი 13 305.00 კვადრატულ მეტრს შეადგენს. ყოველთვიურად ნაგავსაყრელის ტერიტორიაზე, დაახლოებით, 1 398 კუბური მეტრი ნარჩენი დაბა ურეკისა და მისი მიმდებარე სოფლებიდან შედის.
ურეკის ნაგავსაყრელი "საქართველოს მყარი ნარჩენების მართვის კომპანიას" საკუთრებაში 2013 წლის 13 იანვარს გადაეცა.
იმ დროისთვის, ნაგავსაყრელზე არსებული მდგომარეობა უკიდურესად მძიმე იყო _ ნარჩენების შეტანა ხდებოდა არაორგანიზებულად, ნაგავსაყრელი ოპერირებდა სტანდარტებთან შეუსაბამოდ, ვერ აკმაყოფილებდა ეკოლოგიურ და სანიტარულ ნორმებს, კონტროლი და სანიტარული ზედამხედველობა პოლიგონზე არ ხორციელდებოდა, რაც ზიანს აყენებდა გარემოს და საფრთხეს უქმნიდა ადგილობრივი მოსახლეობის ჯანმრთელობას.
შპს საქართველოს "მყარი ნარჩენების მართვის კომპანიამ", საქართველოს რეგიონული განვითარებისა და ინფრასტრუქტურის სამინისტროსთან კოორდინაციით, ურეკის ნაგავსაყრელზე დახურვის სამუშაოები ჩაატარა, რომლის ფარგლებშიც მოეწყო ნარჩენების გადამზიდი სადგური. მოხდა არსებული არასახიფათო ნარჩენების საიზოლაციო გრუნტით გადაფარვა. ასევე, მოწესრიგდა პოლიგონის შიდა გზები, წყალარინების არხები, განახლდა არსებული ღობე. მოხდა შიდა ელექტროფიცირება.
"მყარი ნარჩენების მართვის კომპანიამ" ნარჩენების გადამზიდი სპეცმანქანა შეიძინა, რომელიც უზრუნველყოფს ნარჩენების ტრანსპორტირებას ურეკის გადამზიდი სადგურიდან მერიის ნაგავსაყრელზე. პროექტის ღირებულებამ 226, 686, 70 ლარი შეადგინა. პროექტი დაფინანსდა სახელმწიფო ბიუჯეტიდან და განახორციელა ტენდერში გამარჯვებულმა კომპანიამ – შპს "ლავა" _ აცხადებენ გამგეობაში.
სულ სხვა პოზიციას აფიქსირებს გურიის გუბერნატორი გია სალუქვაძე _ ის აღნიშნავს, რომ ამ მხრივ სიტუაცია მართლაც გაუსაძლისია: "იქ არის ნამდვილად გაუსაძლისი მდგომარეობა, ურთულესი. ერთი კვირის წინ იყო ჩამოსული მყარი ნარჩენების გადამუშავების კომპანიის დირექტორი. ჩვენ დავათვალიერეთ ახლად მოწყობილი პოლიგონი ურეკში და ჩოხატაურში. მინდა გითხრათ, რომ გვეყოლება სრულიად ახალი ტექნიკა, რომელიც იქნება არა მარტო ნაგავსაყრელისთვის, მოხდება პირდაპირ ნაგვის გატანა ცეცხლაურში, სადაც გაკეთდება თანამედროვე ტიპის ნაგავსაყრელის პოლიგონი. ეს პრობლემები, წლებია, გროვდება და დღეს უკვე არის უკიდურესად გაუსაძლისი მდგომარეობა. სწორედ ამიტომ, გურიის სამხარეო ადმინისტრაციაში მყარი ნარჩენების მართვისა და სპეცტექნიკის შესყიდვების თემაზე სამუშაო შეხვედრა გაიმართა. კომპანია "გამა კონსალტინგის" წარმომადგენლმა ზურაბ მგალობლიშვილმა, რეგიონში მყარი ნარჩენების კუთხით დაგეგმილ სამუშაოებზე ისაუბრა და მყარი საყოფაცხოვრებო ნარჩენების შეგროვების აღჭურვილობით უზრუნველყოფის პროექტი განიხილა".
გუბერნატორის თქმით, ევროპის რეკონსტრუქციის და განვითარების ბანკის მხარდაჭერით (EBRD), საქართველოს მთავრობა, დასუფთავების სამუშაოების ეფექტურად გახორციელების მიზნით, 2016 წლიდან რეგიონების ახალი ნაგავმზიდი ავტომანქანებითა და ნაგვის ურნებით აღჭურვას გეგმავს. პირველი ეტაპისთვის გამოყოფილია 15 მილიონი ევრო:
"ოზურგეთის მუნიციპალიტეტის სამ მანქანას დაემატება კიდევ ერთი, ქალაქ ოზურგეთს _ სამი, ჩოხატაურს _ სამი ახალი მანქანა თავისი ბუნკერებით და ლანჩხუთს _ ორი. ეს ნიშნავს, რომ ის პრობლემა, რომელიც სოფელ მერიაშია, აღმოფხვრილი იქნება", _ თქვა გია სალუქვაძემ.
