გავრცელებულ ინფორმაციას, რომ საქართველოს საკონსტიტუციო სასამართლოს თავმჯდომარე გიორგი პაპუაშვილი, შესაძლოა, 2016 წლის საპარლამენტო არჩევნებზე "ნაციონალური მოძრაობის" პირველი ნომერი იყოს, საკონსტიტუციო სასამართლოს პრესსამსახურში არ ადასტურებენ.
როგორც "გურია ნიუსს" სასამართლოს პრესსამსახურში განუცხადეს, ინფორმაცია, რომ პაპუაშვილმა, შესაძლოა, რომელიმე პატრიის სახელით 2016 წლის არჩევნებში მონაწილეობა მიიღოს, გამორიცხულია.
"აბსურდული ინფორმაციაა. მსგავსი რამ არ იგეგმება, არც მოლაპარაკებები ყოფილა", _ აცხადებენ პრესსამსახურში.
პაპუაშვილის არჩევნებში მონაწილეობის შესახებ ინფორმაცია დღეს, არასამთავრობო ორგანიზაცია "ახალაგაზრდა ადვოკატების" თავმჯდომარემ, არჩილ კაიკაციშვილმა ჟურნალისტებთან გამართულ შეხვედრაზე გააჟღერა.
მისი თქმით, გიორგი პაპუაშვილი, საკონსტიტუციო სასამართლოს თავმჯდომარის უფლებამოსილების ამოწურვის შემდგომ, რაც 2016 წლის ივნისში მოხდება, აქტიურად აპირებს პოლიტიკურ ცხოვრებაში გადასვლას.
"ჩემი ინფორმაციით, პოლიტიკური გაერთიანება "ერთიანი ნაციონალური მოძრაობა" 2016 წლის საპარლამენტო არჩევნებისთვის, გიორგი პაპუაშვილის პარტიული სიის #1 კანდიდატად დასახელებაზე კულუარულად მსჯელობს. ჩემთვის მნიშვნელობა აქვს სადო ქონებასთან დაკავშირებულ საკითხებს და არა ბატონი გიორგი პაპუაშვილის პოლიტიკურ სიმპატიებს, მაგრამ მინდა მასაც ვთხოვო, რომ ევროსასამართლოში მოსამართლის შესარჩევ კონკურსში დამარცხების გამო, ნუ გააკეთებს პოლიტიკური ხასიათის შეფასებებს, იმსჯელოს საგნობრივად და ამით ჩიხში არ შეიყვანოს საკონსტიტუციო სასამართლოს დამოუკიდებლობისა და მიუკერძოებლობის საკითხი", _ განაცხადა არჩილ კაიკაციშვილმა.
სიის პირველ ნომრად პაპუაშვილის მზადებას "ნაციონალური მოძრაობაც" არ ადასტურებს. როგორც პარტიის პრესსამასახურში აცხადებენ, ჯერჯერობით სიის ფორმირება არ მომხდარა.
"არცერთ შესაძლო კანდიდატზე, რომლებზეც გავრცელდა ინფორმაცია, რომ პარტიის სიის პირველი ნომერი შეიძლება იყოს, არ ვადასტურებთ, რადგან ჯერჯერობით სიის ფორმირება არ მომხდარა", _ აცხადებენ პარტიაში.
