6 მარტს, მულტიკულტურულ – ლიტერატურულ კაფე "რვას +1"-ში საქართველოს პარლამენტის ეროვნული ბიბლიოთეკის გენერალური დირექტორის, პროზაიკოსისა და პოეტის, გიორგი კეკელიძის წიგნის "ორი თავგადასავალი პრეზენტაცია შედგა.
პრეზენტაციას თავად გიორგი კეკელიძე ესწრებოდა და მის მკითხველებს ახალი წიგნის შესახებ ესაუბრა.
"ეს არის წიგნი, ერთგვარი ისტორია ადამიანზე, რომელიც 90-იან წლებში ჩავიდა გურიიდან თბილისში და მოექცა იმ კრიმინალური ზეგავლენების ქვეშ, რომელიც იმ პერიოდს ახასიათებდა. თუმცა, ცხადია ის იყო სასწავლად ჩასული და ეს არის ერთგვარი კონფლიქტი ადამიანში ამ მიმართულებით, მეორე მხრივ ეს არც არის კონფლიქტი იმიტომ, რომ რეალურად მისი ქმედებები და მისი შინაგანი სურვილები ერთმანეთს ცდება. მოკლედ, რომ ვთქვა, სინდისის ხარჯზე არ გადის ეს ყველაფერი. რაც შეეხება მის თვისებურ მხარეს, ეს არის დაკვირვება სიცოცხლეზე და სიკვდილზე, პოსტსაბჭოთა ქვეყანაზე და იმ ინერციაზე, რაც მას ახასიათებდა 90-იანი წლების დასაწყისში დასავლეთთან მიმართებაში." – თქვა "გურია ნიუსთან" საუბრის დროს გიორგი კეკელიძემ.
"გურია ნიუსი" დაინტერესდა უწევს თუ არა კონკურენციას "ორი თავგადასავალი" "გურულ დღიურებს" – რაზეც გიორგი კეკელიძე გვიპასუხა:
"როგორც ვიცი "ორი თავგადასავალი" ერთ-ერთი ლიდერი წიგნია საქართველოში და ამ თვალსაზრისით სერიოზული საეჭვიანო გაუჩნდა "გურულ დღიურებს." თუმცა "გურული დღიურები" კვლავ ინარჩუნებს თავის პოზიციას გაყიდვების კუთხით," – თქვა გიორგი კეკელიძემ.
"ორი თავგადასავალის" პრეზენტაციას ოზურგეთში არაერთი სტუმარი დაესწრო, მათ შორის იყო ქალაქ ბათუმიდან ნინო ყოლბაია.
"სიმართლე გითხრათ გიორგი კეკელიძის ლექსები უფრო მიყვარს. რადგან მისი ახალი წიგნის პრეზენტაცია არის, ჩამოვედი ოზურგეთში და დავესწარი. აუცილებლად უნდა წავიკითხო."- გვითხრა ნინო ყოლბაიამ.
წიგნის პრეზენტაცია ქალთა უფლებების კვირეულის ფარგლებში ჩატარდა.
