ბაღების მართვის სააგენტოს დირექტორის გადაწყვეტილებით, თბილისის რამოდენიმე საბავშვო ბაღის დირექტორი მოვალეობის არასათანადოდ შესრულების გამო თანამდებობიდან გაათავისუფლეს. სააგენტოს მონიტორინგის სამსახურმა შემოწმების შედეგად, ბაღებში სხვადასხვა სახის დარღვევები აღმოაჩინა.
ყოფილი დირექტორები და მათი მხარდამჭერები მიიჩნევენ, რომ მათი გათავისუფლება უკანონოდ მოხდა. ხოლო პროცესს პოლიტიკურ ჭრილში განიხილავენ.
დღეს "ერთიანმა ნაციონალურმა მოძრაობის" ოფისში პარტიის ერთ-ერთმა ლიდერმა გიორგი ვაშაძემ ბრიფინგი გამართა, სადაც გათავისუფლებულ დირექტორებზეც ისაუბრა. ვაშაძე მიიჩნევს, რომ ეს პროცესები არჩევნების მოახლოებასთანაა დაკავშირებული, გათავისუფლებული კადრების ადგილებზე, მმართველი პარტია თავის ერთგულ აქტივისტებს ნიშნავს.
"ნაციონალური მოძრაობის" შუამდგომლობით, 31 მარტს პარლამენტში, განათლების კომიტეტის სხდომა გაიმართება, რომელსაც საბავშვო ბაღების გათავისუფლებული დირექტორები და პედაგოგები დაესწრებიან და სადაც განხილული იქნება ის არგუმენტები, რომელის საფუძველზეც პირებმა სამუშაო დაკარგეს.
"არჩევნების მოახლოებასთან ერთად, ხელისუფლება რადიკალურ უკანონო ქმედებებზე გადავიდა, რომელსაც სხვადასხვა მიმართულებით ახორციელებს. ამჯერად მინდა საბავშვო ბაღებზე ვისაუბრო, როდესაც პედაგოგების, დირექტორების თანამდებობებიდან გათავისუფლება ყოველგვარი სამართლებრივი პროცედურების უგულვებელყოფით მიმდინარეობს. თბილისში უკვე 40-მდე ბაღის ხელმძღვანელია გათავისუფლებული. იგივე ხდება ქუთაისშიც, სადაც იანვარში 3 ბაღის ხელმძღვანელი გაათავისუფლეს. ჩვენი ინფორმაციით, ვითარება მსგავსია საქართველოს სხვა რაიონებშიც. ამ ქმედებაში საგანგაშოა ის, რომ პირების გათავისუფლებას არანაირი სამართლებრივი საფუძველი არ უდევს.
რატომ ხდება ეს ყველაფერი? – იმიტომ, რომ არჩევნები ახლოვდება და მთავრობას სურს, რომ თავიანთი აგიტატორები, "ქართული ოცნების" მხარდამჭრები დაასაქმონ, რათა მათი ერთგულება იყიდონ.
ყველაზე მნიშვნელოვანია პასუხი, რასაც ხელისუფლებისგან იღებს ეს ხალხი – წადით, იჩივლეთ სასამართლოში. მათი გათვლა არის ის, რომ დღეიდან არჩევნებამდე დარჩენილია იმაზე ნაკლები ვადა, ვიდრე სასამართლო საბოლოო გადაწყვეტილებას მიიღებს. ამიტომ, ურჩევნიათ ჰყავდეთ თავისი დანიშნული, ზოგჯერ უდიპლომო ადამიანები და არჩევნებზე სარგებელი მიიღონ.
სწორედ ამიტომ, ხუშაბათს, პარლამენტში განათლების კომიტეტის სხდომა გაიმართება, სადაც ყველა დაზარალებულ მხარეს ვთავაზობთ მოვიდეს და წარმოადგინოს საკუთარი არგუმენტები, ან მანამდე მოგვაწოდონ ინფორმაცია მათი უფლებების დარღვევის შესახებ."-განაცხადა ვაშაძემ.
თბილისის ბაგა-ბაღების მართვის სააგენტო მოუწოდებს გათავისუფლებულ დირექტორებს, თავი შეიკავონ პროცესების პოლიტიზირებისგან.
"თბილისის ბაგა-ბაღების რამდენიმე გათავისუფლებული დირექტორი, გარკვეულ ჯგუფებთან ერთად ცდილობს, პროცესები პოლიტიკურ ჭრილში გადაიყვანოს და ბაღების ნორმალურ ფუნქციონირებას ხელი შეუშალოს.
თბილისის საბავშვო ბაგა-ბაღების მართვის სააგენტო მოუწოდებს ბაგა-ბაღების ყველა თანამშრომელს, ნუ ჩაერთვებიან ხელოვნურად მართულ პროცესებში, ნუ ჩაშლიან სააღმზრდელო პროცესს და ნუ შეუქმნიან მშობლებს დისკომფორტს თავიანთი უპასუხისმგებლო საქციელით.
გვინდა მოგმართოთ, რომ თუ კიდევ გაგრძელდება სააღმზრდელო პროცესის ჩაშლის მცდელობა, ნებისმიერი თანამშრომელი აგებს პასუხს საბავშვო ბაღის წესდებისა და შინაგანაწესის შესაბამისად სააღმზრდელო პროცესის ჩაშლისთვის.
მოგიწოდებთ, პასუხისმგებლობით და კეთილსინდისიერად მოეკიდოთ თქვენს სამუშაოს, დაკისრებულ მოვალეობას და ნუ ჩაერთვებით პროცესების პოლიტიზების მცდელობაში."-ნათქვამია სააგენტოს მიერ გავრელებულ განცხადებაში.
