თბილისის სახელმწიფო უნივერსიტეტის აქციების ერთ-ერთი ორგანიზატორი და სტუდენტი ირაკლი კუპრაძე სოციალურ ქსელში ახალ პოსტს აქვეყნებს, რომელსაც "გურია ნიუსი" უცვლელად გთავაზობთ:
"საბოლოო წერტილი და ,,ბოლო ჟამის სტუდენტური თვითმმართველობა" _ გუშინ საღამოს, აუდიტორია #115-ს უმნიშვნელოვანესი და მართლაც ისტორიული შეხვედრა გვქონდა განათლების სამინისტროსთან ,,უმაღლესი განათლების შესახებ" კანონში ცვლილების შეტანის თაობაზე, სადაც მათ ჩვენ მიერ შემუშავებული საკანონმდებლო ცვლილებების პრინციპები და მოთხოვნები წარვადგინეთ.
ჩვენ ვიბრძვით, რომ როგორც ინსტიტუცია სტუდენტური თვითმმართველობა წარსულს ჩაბარდეს და ეს ასეც მოხდება. უნდა დამთავრდეს მათი პრივილეგიების და მონოპოლიების ეპოქა. ჩვენ მიერ მოთხოვნილი ცვლილებების მიხედვით : უმაღლესი განათლების შესახებ კანონში საერთოდ აღარ იარსებებს სიტყვათშეთანხმება ,,სტუდენტური თვითმმართველობა" რაც მის ინსტიტუციურ გაუქმებას ნიშნას. მათ მხოლოდ როგორც რიგითი ორგანიზაცია, ისე შეეძლებათ არსებობა.
საფაკულტეტო საბჭოებში არ იქნება არჩეული პრივილეგირებულად მხოლოდ თვითმმართველობის წევრები, როგორც აქამდე ხდებოდა და მასში არჩევის საშუალება თანასწორ საწყისებზე ყველა სტუდენტს პირდაპირი არჩევნების წესით ექნება.
წინამდებარედ ხსენებული ცვლილების მიხედვით თვითმმართველობა ვეღარ შეძლებს პრივილეგირებულად საფაკულტეტო საბჭოს 7 კაციანი წარმომადგენლობით გავლენა მოახდინოს ფაკულტეტის დეკანის და აკადემიური საბჭოს წევრის არჩევაზე. თვითმმართველობის ეს 7 ხმა ყოველთვის პოლიტიკური ვაჭრობის საგანი ხდებოდა და ესეც წარსულს ჩაბარდება.
ამ ყველა ზოგად პრინციპზე შეთანხმება უკვე მიღწეულია. ზეგ-ორშაბათსვე ველოდებით განათლების სამინისტროსგან უკვე ფორმირებულ კანონპროექტს და შემდეგ თუ თანხმობა ისევ ძალაში დარჩა სამინისტრო პირობას დებს, რომ კანონპროექტს დაჩქარებული განხილვის მოთხოვნით გადააგზავნის პარლამენტში, რომელიც ბოლო ინსტანციაა ^^
ასე დასრულდება თვითმმართველობის ინსტიტუტის პრივილეგიების და მონოპოლიების ისტორია მთელს საქართველოში და არა მხოლოდ თსუ-ში.
მართალია ეს ყველაფერი ძალიან მძიმე ბრძოლად, მუდმივ ნერვიულობად-დაძაბულობად და ბევრ შეურაცხყოფად დაგვიჯდა, მაგრამ რომ ვიცოდე ამის გადატანა მომიწევდა კიდევ ერთხელ დაუფიქრებლად თავიდან გავიბრძოლებდი.
ეს გამარჯვება იმ ძალიან ბევრი სტუდენტის და სტუდენტური მოძრაობის ბრძოლის დაბოლოება და დაფასება იქნება, რომლებიც წლების განმავლობაში იბრძოდნენ თანასწორი გარემოსთვის უნივერსიტეტებში! მადლობა მათ. ჩვენ ვიბრძვით სისტემის წინააღმდეგ და ეს ბრძოლა გრძელდება!"
