დღეს ოზურგეთის მუნიციპალიტეტის საკრებულოს სხდომა შედგა, სადაც 15 საკითხიანი დღის წესრიგი განიხილეს. აქედან ცხრა საკითხი მუნიციპალიტეტის გამგეობის ცხრა სამსახურის ანგარიშის წარდგენას შეეხებოდა.
ოზურგეთის მუნიციპალიტეტის გამგეობის საფინანსო-საბიუჯეტო სამსახურის 2015 წლის ანგარიში გაწეული მუშაობის შესახებ, ამავე სამსახურის უფროსმა გია მამაკაიშვილმა წარმოადგინა. მან მიმოიხილა ყველა დეტალი და თქვა, რომ საანგარიშო პერიოდში მუნიციპალიტეტის გამგეობამ არსებული კანონმდებობის და მოსახლეობის ინტერესების შესაბამისად, სერიოზული მუშაობა გასწია.
"2015 წლის ბიუჯეტი 7 მილიონ 14100 ლარით დავიწყეთ და მოხდა უპრეცედენტო ზრდა _ ის 20 მილიონ 231800 ლარამდე ავიდა. სულ 17 ცვლილება გახორციელდა, რაც ძირითადად ინფრასტრუქტურულ სამუშაოებს თუ სტიქიით დაზარალებულთა დახმარებას მოხმარდა. ლომის წილი კი სოფლის პროგრამებზე მოდის. ეს ტენდენცია წელსაც გაგრძელდება," _ თქვა გია მამაკაიშვილმა.
საკრებულოს თავმჯდომარის მოადგილემ დიმიტრი კვერღელიძემ, მამაკაიშვილის გამოსვლისას, საფინანსო -საბიუჯეტო სამსახურის უფროსს თხოვნით მიმართა და მიანიშნა, რომ ეს დავალებაც იყო – მომავალში ყურადღება მიაპყროს პროგრამული ბიუჯეტის შექმნას.
"ჩვენ 2017 წლისთვის უკვე პროგრამული ბიუჯეტი უნდა გვქონდეს! კონკრეტულად უნდა მოხდეს საკითხების დალაგება, ყველაფერი უნდა იყოს გამჭვირვალე. ისე არ დავამტკიცებთ! ინოვაციების არ გვეშინია. ვიმოქმედოთ შეთანხმებულად, თუ საჭირო იქნება, თანამშრომლები გავგზავნოთ სტაჟირებაზე. ეს იქნება ახალი სიტყვა ჩვენი საკრებულოს ბიუჯეტის ისტორიაში, "- თქვა დიმიტრი კვერღელიძემ, რასაც დარბაზი მოწონებით შეხვდა.
