ლანჩხუთის მუნიციპალიტეტის მთავარ საფინანსო დოკუმენტში მორიგი ცვლილება იგეგმება, რომელზეც მსჯელობა დეპუტატებს 28 აპრილისთვის ჩანიშნულ სხდომაზე მოუწევთ.
საქმე იმაშია, რომ მიმდინარე წელს ა(ა)იპ საფეხბურთო სკოლის ბიუჯეტიდან 169 083 ლარის, ხოლო გოგონათა სარაგბო-საფეხბურთო სკოლის დაფინანსებიდან 54 829 ლარის აკუმულირება იგეგმებოდა "ქართული ფეხბურთის განვითარების ფონდში". თუმცა, ფონდისვე გადაწყვეტილებით, აღნიშნული თანხები ისევ ა(ა)იპ-ებს დარჩება განსაკარგვად.
ამის შესახებ 12 აპრილს, ფრაქცია "ლანჩხუთი-ევროატლანტიკური მომავლისთვის" სხდომაზე განაცხადა გამგეობის საფინანსო-საბიუჯეტო სამსახურის უფროსმა როლანდ ლაშხიამ:
"ვინაიდან წელს არ არის გათვალისწინებული ინფრასტრუქტურის განვითარება, ამიტომ, გთხოვთ, თქვენს დაქვემდებარებაში მყოფი სკოლები არსებული თანხებით დააფინანსოთ ისევე, როგორც აფინანსებდით 2016 წლის პირველ მარტამდე".
ლაშხიას თქმით, ბიუჯეტში ცვლილება საფეხბურთო კლუბ ლანჩხუთის "გურიასთან" მიმართებაშიც იგეგმება:
"კლუბის ინფრასტრუქტურის დასაფინანსებლად ბიუჯეტში 100 ათასი ლარია გათვალისწინებული; ასევე, 100 ათასი ლარი იყო გათვალისწინებული გრიგოლეთის ბაზის მოვლა-პატრონობისთვის. ვინაიდან ბაზა კლუბს დარჩა, ამიტომაც, თავის დროზე, მიზანშეწონილად ჩაითვალა საამისოდ განკუთვნილი თანხაც ფონდში გადამისამართებულიყო. თუმცა, აქაც მოხდა ცვლილება და რადგან ფონდი არ ითვალისწინებს კლუბის დავალიანებების გასტუმრებას, ეს 100 ათასი ლარი სწორედ კლუბის ვალების გასტუმრებას მოხმარდება", _ დასძინა საფინანსო-საბიუჯეტო სამსახურის უფროსმა.
რამდენად კანონიერად მოხდა ადგილობრივი ბიუჯეტიდან ქართული ფეხბურთის განვითარების ფონდში თანხების კონსოლიდირება, ამასთან დაკავშირებით ფრაქციის სხდომაზე განმარტების გაკეთება მოუხდა გამგეობის იურიდიული სამსახურის უფროსს შოთა ჩაგუნავას:
"საბიუჯეტო კოდექსის თანახმად, მუნიციპალიტეტის ბიუჯეტი დამოუკიდებელია. ამიტომაც, მუნიციპალიტეტი უფლებამოსილია საკუთარი შეხედულებისამებრ განკარგოს თავისი შემოსულობები. რაც შეეხება კონკრეტულ გარემოებას, როდესაც საუბარია ქართული ფეხბურთის განვითარების ფონდში თანხების კონსოლიდირებაზე, ამასთან დაკავშირებით არსებობს მთავრობის დადგენილება "საქართველოში ფეხბურთის განვითარების სახელმწიფო პროგრამის დამტკიცების შესახებ", რომელშიც საუბარია იმაზე, რომ ეთხოვოთ ადგილობრივ თვითმმართველობებს, რომლებიც საკუთარი ბიუჯეტიდან აფინანსებდნენ ფეხბურთს, ემსჯელათ, მიემართათ თუ არა თანხები ამ ფონდში. ეს არ იყო ვალდებულება _ ეს იყო თხოვნა, რომლის საფუძველზეც ჩვენმა საკრებულომ მიიღო შესაბამისი დადგენილება და გაიზიარა მთავრობის თხოვნა", _ აღნიშნა შოთა ჩაგუნავამ.
საქმე ისაა, რომ მარტის დასაწყისში, საკრებულოს თანხმობით, "ქართული ფეხბურთის განვითარების ფონდში", რომელიც გასული წლის 30 დეკემბერს მთავრობის განკარგულებით დარეგისტრირდა არასამეწარმეო (არაკომერციულ) იურიდიულ პირად, საფეხბურთო კლუბ "გურიას" კუთვნილი 500 ათასი ლარის აკუმულირება მოხდა.
შვიდ მარტს, საკრებულოს რიგგარეშე სხდომაზე საკითხი განსახილველად თავად მუნიციპალიტეტის გამგებელმა და ამავდროულად კლუბის პრეზიდენტმა, ზაზა ურუშაძემ გამოიტანა:
"ერთი რამ გადაჭრით შემიძლია გითხრათ, რომ ამ ფონდის შექმნით ქართული ფეხბურთი მოიგებს. ამ ეტაპზე, ლანჩხუთი წაგებულ მდგომარეობაში კი დარჩა, მაგრამ საბოლოოდ მოგებულები დავრჩებით, რადგან პროგრამა გარკვეულ ბონუსებსაც გულისხმობს. ფონდის ხელმძღვანელობასთან მქონდა საუბარი, რომლებიც თავად ამბობენ, რომ გარკვეული რაღაცები დასახვეწია. გვექნება მათთან საუბარი და არსებულ პრობლემებს დავაყენებთ მათ წინაშე", _ ასეთი განმარტება გააკეთა მაშინ ურუშაძემ.
თუმცა, კონკრეტულად რა ბონუსებსა და სამოტივაციო თანხებს მიიღებს კლუბი, აქამდე უცნობია.
"დაზუსტებული ინფორმაცია ამ დღეებში მექნება, თბილისში მივდივარ ფონდის ხელმძღვანელობასთან შესახვედრად", _ ამბობს კლუბის ფინანსური ხელმძღვანელი თენგიზ კიკვაძე, რომელის თქმითაც, ფონდის შექმნის მთავარ მიზანს, პერსპექტივაში წარმოადგენს, რომ საბოლოოდ საფეხბურთო გუნდები ჩამოშორდეს ბიუჯეტს.
თავის მხრივ, ფონდთან მიმართებაში მკვეთრად უარყოფითი განწყობა აქვთ ფრაქცია "ლანჩხუთი _ ევროატლანტიკური მომავლისთვის" წევრებს და ისინი არ აპირებენ მომავალ საკრებულოს სხდომაზე მხარი დაუჭირონ ბიუჯეტში გასახორციელებელ ზემონახსენებ ცვლილებებს:
"ვთვლით, რომ უმრავლესობამ უკანონობა ჩაიდინა, როცა გაიზიარა მთავრობის თხოვნა და ფონდს განსაკარგად მისცა თანხები. ამიტომაც, არ ვაპირებთ ფონდთან მიმართებაში ბიუჯეტში განსახორციელებელ რაიმე ცვლილებას მხარი დავუჭიროთ. ადრე თუ გვიან ამაზე პასუხისგება მოუწევს ვიღაცას", _ ამბობენ ფრაქციის წევრები.
"ევროალტანტიკოსებისგან" განსხვავებით, უმრავლესობის ქმედებაში უკანონობას ვერ ხედავს გამგეობის იურიდიული სამსახურის უფროსი, რომელიც კატეგორიულად არ იზიარებს მათ ამ მოსაზრებას.
