საზოგადოებრივი მაუწყებლის გენერალური დირექტორის, გიორგი ბარათაშვილის ოჯახმა, 2015 წელს, შემოსავალზე 17 100 ლარით მეტი დახარჯა.
ამის შესახებ გიორგი ბარათაშვილის ქონებრივ დეკლარაციაშია აღნიშნული, რომელიც მან 2016 წლის 13 აპრილს შეავსო.
დეკლარაციის მიხედვით, 2015 წელს, გიორგი ბარათაშვილის შემოსავალი საზოგადოებრივი მაუწყებლიდან 66 000 ლარი იყო. ხოლო მისმა მეუღლემ ანა ნადირაძემ საზოგადოებრივი მაუწყებლიდან, სადაც მას აღმასრულებელი პროდიუსერის თანამდებობა უჭირავს 30 000 ლარის შემოსავალი მიიღო.
ჯამში ოჯახის შემოსავალმა 96 000 ლარი შეადგინა, თუმცა, ამავე 2015 წელს ოჯახის გასავალი 113 100 იყო.
კერძოდ, დეკლარაციაში მითითებულია, რომ გიორგი ბარათაშვილმა 2015 წლის 27 აპრილს "რესპუბლიკა ბანკიდან" 100 000-ლარიანი იპოთეკური სესხი აიღო, რომლის პროცენტის დასაფარადაც გასულ წელს 12 600.00 ლარი გადაიხადა; ამ სესხის აღებამდე რამდენიმე დღით ადრე, ბარათაშვილს კიდევ ერთი, 5000-ლარიანი სესხი საკრადიტო ბარათიდან აქვს აღებული (სესხის დაფარვის ვადა 03/03/2017) და მისი პროცენტის დასაფარად 1000 ლარი გადაიხადა.
ბარათაშვილმა 2015 წელს 3940-ლარიანი განვადებაც გააკეთა "რესპუბლიკა ბანკიდან", რისთვისაც 200 ლარი პროცენტში გადაიხადა.
რაც შეეხება 40 000-ლარიან სამომხმარებლო სესხს, ბარათაშვილმა ის 2014 წლის 13 აგვისტოს აიღო და ვადა 2018 წელს ეწურება. 2015 წელს კი, "კორსტანდარტ ბანკს" სესხის დასაფარად 36 000 გადაუხადა.
გარდა ამისა, 4 000-ლარიანი სამომხმარებლო სესხი, 2015 წლის 1 მარტს, ბარათაშვილის მეუღლეს, ანა ნადირაძესაც აქვს აღებული (სესხის დაფარვის თარიღი 01/03/2017), რისთვისაც მან "საქართველოს ბანკს" 800.00 ლარი პროცენტში გადაუხადა.
დეკლარაციის გასავლის გრაფაში ასევე აღნიშნულია, რომ გიორგი ბარათაშვილს 4 500 ლარი სწავლაში აქვს გადახდილი, ხოლო სარემონტო სამუშაოებისთვის 58 000 ლარი გასცა.
დეკლარაციის შევსების მომენტში კი, ბარათაშვილის სახელფასო ანგარიშზე "რესპუბლიკა ბანკში" 800 ლარი, ხოლო ამავე ბანკის საკრედიტო ანგარიშზე 5 000 ლარი (დებეტი(-) ერიცხებოდა.
მის მეუღლეს, ანა ნადირაძეს "რესპუბლიკა ბანკის" სახელფასო ანგარიშზე 520 ლარი ჰქონდა, ხოლო "საქართველოს ბანკის" საკრედიტო ანგარიშზე 4 000.00 ლარი (დებეტი(-).
რაც შეეხება ოჯახის უძრავ-მოძრავ ქონებას, დეკლარაციის მიხედვით, ანა ნადირაძე ფლობს თბილისში, ყიფშიძის ქუჩაზე 74.00 კვ.მ.-ის ფართობის ბინასა და 2003 წელს გამოშვებულ მსუბუქ ავტომანქანა wolkswagen Touareg-ს.
აღსანიშნავია ისიც, რომ ბარათაშვილსა და მის მეუღლეს საზოგადოებრივი მაუწყებლიდან 2013 წელსაც იგივე ოდენობის შემოსავალი აქვთ აღებული, ჯამში 96 ათასი ლარი.
რაც შეეხება 2012 წლის შემოსავლებს, დეკლარაციაში აღნიშნულია, რომ ოჯახმა ჯამში 78 000 ლარის შემოსავალი მიიღო. აქედან, გიორგი ბარათაშვილმა საზოგადოებრივი მაუწყებლიდან, სადაც მას ტექნიკური დეპარტამენტის ხელმძღვანელის თანამდებობა ეჭირა – 60000ლარი, ხოლო მისმა მეუღლემ საზოგადოებრივი მაუწყებლის გადაცემის წამყვანობისთვის – 2400 ლარი. გარდა ამისა, ანა ნადირაძეს "იუჯითი"-ს საზოგადოებასთან ურთიერთობის მენეჯერის თანამდებობიდან 15600 ლარი მიუღია.
