"გურია ნიუსი" მშენებარე და დასრულებული ობიექტების მონიტორინგს განაგრძნობს _ ამჯერად ქალაქ ოზურგეთში სამი ობიექტი გადავამოწმეთ.
ქალაქ ოზურგეთის მუნიციპალიტეტმა, ქალაქ ოზურგეთში, მდინარე ბაზრისწყალის ორივე მხარეს ნაპირდამცავი ჯებირების მოწყობის სამუშაოების შესყიდვაზე ტენდერი 2015 წლის ივლისში გამოაცხადა. 1 593940.00 შეფასებული პროექტი შპს "პირამიდა-ფ.რ."-ს ფილიალმა 1 255152 ლარად მოიგო. 2015 წლის 31 აგვისტოს გაფორმებული ხელშეკრულებების თანახმად, კომპანიამ ნაპირდამცავი სამუშაოები 2016 წლის პირველ ივნისამდე უნდა დაასრულოს.
სამუშაოები აქტიურ რეჟიმში მიმდინარეობს და თუ პირველად აქტებს, ფარული სამუშაოების ფოტო მასალას და მიმდინარე მშენებლობას დავეყრდნობით, საკმაოდ ხარისხიანად.
ინსპექტირების ჯგუფის დასკვნის საფუძველზე, რომელსაც თან ჩატარებული სამუშაოების ამსახველი ფოტო მასალა ახლავს, კომპანიას თანხის ნახევარი უკვე მიღებული აქვს.
ფუნდამენტი 1,5, ზემოთ _ 1.8 მეტრი _ ამ ზომებშია უკვე გაკეთებული ჯებირები, რომელსაც სტანდარტების შესაბამისი წყალგამტარებიც აქვს.
საბოლოოდ, კომპანიის მიერ შესრულებულ სამუშაოებს ქალაქის მერია სამხარაულის დასკვნის საფუძველზე ჩაიბარებს. ჩოხატაურისგან განსხვავებით, ქალაქ ოზურგეთში, ყველა ობიექტის ჩაბარების დროს სამხარაულის დასკვნა აუცილებლია და ამ ვალდებულებას შემსყიდველი შემსრულებელს ხელშეკრულებაში უდებს.
ასე მოხდა გურამიშვილის ქ, #7-ში მრავალბინიან საცხოვრებელ სახლზე ფასადის და ჭავჭავაძის ქ.#15-ში მრავალბინიან საცხოვრებელ სახლზე ფასადის სარემონტო სამუშაოების შესრულების დროსაც _ კომპანიას სამუშაოების ჩაბარებისას სამხარაულის ექსპერტიზის ბიუროს დასკვნაც უნდა წარმოედგინა. აღნიშნული სამუშაოების შესრულების უფლება კომპანია "დეგომ" ტენდერით მიიღო _ 43 800 ლარად შეფასებული სამუშაოები კომპანიამ 35 039 ლარად მოიგო.
სამხარაულის ექსპერტიზის ბიუროს დასკვნაში აღნიშნულია, რომ კომპანიის შესრულებული სამუშაოები მოცულობაში არ ჯდებოდა.
ეს დასკვნა მხოლოდ სამუშაოების მოცულობაზეა გაკეთებული _ სამხარაულის ბიუროს ხარისხის შეფასება არ მოუხდენია, თუმცა, ხარისხთან დაკავშირებით საკუთარი დასკვნა დადო ქალაქ ოზურგეთის მერიის ინსპექტირების ჯგუფმა, შპს "დეგო" უხარისხოდ შესრულებული სამუშაოს გამო დააჯარიმა და ხელშეკრულებაც შეუწყვიტა. საერთო ჯამში, მერიამ კომპანიას 22 ათასი ლარი არ ჩაურიცხა იმისთვის, რომ შესრულებული სამუშაო არც მოცულობაში ჯდებოდა და არც ხარისხს აკმაყოფილებდა. როგორც ქალაქ ოზურგეთის მერი ბეგლარ სიორიძე ამბობს, აღნიშნული თანხით ხელახალი ტენდერი გამოცხადდება და სამუშაოებს ახალი კომპანია დაასრულებს.
აღსანიშნავია, რომ შპს "დეგოს" ჩოხატაურში, სამების საბავშვო ბაღში უხარისხოდ შესრულებული სამუშაოს გამო პასუხი არ მოსთხოვეს, რის შესახებაც "გურია ნიუსი" უკვე წერდა. აღნიშნულ კომპანიას პასუხს ვერც მუშების დავალინების გამო სთხოვენ. ჩოხატაურის მუნიციპალიტეტის მსგავსად, ამ შემთხვევაში, ჩარევის ბერკეტი არც ქალაქ ოზურგეთის მერიას გააჩნია. ფულის ამოღების მექანიზმი არც მუშებს აქვთ _ კომპანიას არც ერთ მათგანთან შრომითი ხელშეკრულება არ აქვს გაფორმებული, რაც იურისტების განმარტებით, კანონის დარღვევაა.
კიდევ ერთი ობიექტი, რომელიც ოზურგეთში მოვინახულეთ, "სოციალური" სახლია. ამ შენობის სარემონტო სამუშაოებიც სამხარაულის ბიუროს დასკვნის საფუძველზეა ჩაბარებული, თუმცა, ხარვეზები არც თუ ისე მცირეა _ დაბზარული კედლები, არასწორად ჩასმული კარები, ჩამოცვენილი ბათქაში თვალში მოგხვდებათ. თუმცა, ეს აქაური მცხოვრებლებისთვის პრობლემას არ წარმოადგენს:
_ თუ რაიმე ფუჭდება, ჩვენ ვართ პასუხისმგებლები. აქ ჩვენ ვცხოვრობთ. არავის აქვს უფლება შემოვიდეს და თვალიერება დაიწყოს. ყველაზე მთავარი ისაა, რომ ძალიან კმაყოფილები ვართ _ ჭერი გვაქვს, თავზე არ გვაწვიმს, _ გვითხრეს მობინადრეებმა, რომლებიც მიიჩნევენ, რომ ბიუჯეტის ფულით გარემონტებული ობიექტის ნახვის უფლება ჟურნალისტებს არ აქვთ.
არადა, ე. წ. "სოციალური სახლის" რემონტი, რომელიც სამშობიარო სახლის ყოფილ შენობაშია განთავსებული, ბიუჯეტს 418 529.87 ლარი დაუჯდა. სამუშაოები ტენდერში გამარჯვებულმა კომპანიამ შპს "ვიგორამ" შეასრულა. დოკუმენტების თანახმად, შესრულებული სამუშაოები მოცულობაში სწორია. რაც შეეხება ხარისხს, ამის შემოწმება არ მომხდარა და შედეგიც სახეზეა. ქალაქ ოზურგეთის მერიაში განმარტავენ, რომ კომპანიას არსებული ხარვეზების გამოსწორების ვალდებულება ხელშეკრულებით აქვს ნაკისრი, რომელსაც აუცილებლად შეასრულებს.
