ჩოხატაურის მუნიციპალიტეტის 2015 წლის ბიუჯეტის აუდიტი GFA-ს აუდიტორმა გიორგი ჯიბლაძემ ჩაატარა. კომპანია ტენდერის საფუძველზე შეირჩა და შესამოწმებელ პერიოდად 2015 წლის 1 იანვრიდან 2015 წლის 31 დეკემბერი განისაზღვრა. დასკვნა ჩოხატაურის მუნიციპალიტეტის მიერ წარდგენილი დოკუმენტაციის საფუძველზე გაკეთდა.
“ჩვენი მიზანი არ იყო დოკუმენტაციის ნამდვილობის და ფაქტიურობის დადგენა. ჩვენთვის მოწოდებული დოკუმენტები აღქმულია, როგორც რეალური და უტყუარი. წარმოდგენილი ინფორმაციის სისრულესა და სიზუსტეზე მთლიანად პასუხისმგებელია დამკვეთი. ჩვენ ვიღებთ პასუხისმგებლობას წარმოდგენილი ინფორმაციის საფუძველზე გამოტანილი დასკვნის სისწორეზე“, _ აღნიშნავს გიორგი ჯიბლაძე,
მისივე განმარტებით „დამკვეთის მიერ დადგენილი აუდიტის მცირე პერიოდის გამო, წარმოდგენილი დოკუმენტაციის შერჩევით გადამოწმება განხორციელდა“.
მიუხედავად შერჩევითობისა, აუდიტორმა ბევრი დარღვევა იპოვა და შესაბამისი რეკომენდაციებიც გასცა.
დასკვნის თანახმად, გასული წლის ბიუჯეტის პირველ პრიორიტეტად განსაზღვრულია თავდაცვა და უსაფრთხოება, რაც პირველი პრიორიტეტი არ უნდა იყოს, ვინაიდან თავდაცვა საერთოდ არ წარმოადგენს მუნიციპალიტეტის საკუთარ უფლებამოსილებას და „მისი პირველი რიგის პრიორიტეტად წარმოდგენა აბსურდულია“:
“ეს პროგრამები წარმოდგენილია ისეთი ფორმით, რაც რეალურ საშუალებას არ იძლევა შეფასდეს პროგრამით გახორციელებით მიღებული შედეგების ეფექტურობა და ხარისხი,“ _ წერია დასკვნაში.
ამავე დასკვნის თანახმად, 2015 წლის ბიუჯეტში არ არის გათვალისწინებული მუნიციპალიტეტის ადგილობრივი თვითმმართველობის საჯარო მოხელეთა სწავლება-გადამზადების პროგრამა, რის გამოც დარღვეულია ადგილობრივი თვითმმართველობის კოდექსის 101-ე მუხლის მე-2 პუნქტის მოთხოვნები.
აუდიტის დასკვნით, თავდაპირველად დამტკიცებული ბიუჯეტით განსაზღვრული იქნა 103 შტატის რაოდენობა.
ადგილობრივი თვითმმართველობის კოდექსის 156-ე მუხლის შესაბამისად, ჩოხატაურის მუნიციპალიტეტს შეუძლია ჰყავდეს 148 საშტატო ერთეული. ჩოხატაურის საკრებულოს 2014 წლის 19 ნოემბრის #46 დადგენილებით დამტკიცებულია გამგეობის საშტატო ნუსხა, სადაც გამგეობისთვის განისაზღვრა 82 შტატი, რომელშიც არ შედის სახანძრო სამსახური.
საკრებულოს აპარატში განსაზღვრული იყო 8 ერთეული, ანუ, სულ გამგეობასა და საკრებულოს აპარატის საშტატო ერთეულების რაოდენობა შეადგენდა 90-ს, თვითმმართველობის კოდექსის 156-ე მუხლის მე-2 პუნქტის შესაბამისად, მუნიციპალიტეტში შესაძლებელი იყო შტატგარეშე მუშაკად აყვანილი 9 ერთეული, ხოლო ფაქტიურად, შრომითი ხელშეკრულება გაფორმებული იქნა 13 თანამშრომელთან, რითაც დარღვეული იქნა თვითმმართველობის კოდექსის 156-ე მუხლის მე-2 პუნქტი.
_ ანალოგიურად გაგრძელდა წლის განმავლობაში, როცა შეიცვალა მუნიციპალიტეტის საშტატო ერთეულების რაოდენობა. აღნიშნულიდან გამომდინარე, არსებობს რისკი, რომ დამატებით მუშაკებზე გაწეული ხარჯი ჩაითვალოს არამიზნობრივად, _ წერია დასკვნაში.
დოკუმენტში ასევე აღნიშნულია, რომ ჩოხატაურის მუნიციპალიტეტმა საქართველოს ნორმატიული აქტების მე-17 კანონის მუხლის მოთხოვნებიც დაარღვია, როცა ბიუჯეტის ცვლილების პროექტს დოკუმენტები არ დაურთო.
_ მიზანშეწონილია, განმარტებით ბარათში დაწვრილებით აღიწეროს, რატომ გახდა საჭირო ესა თუ ის ცვლილება. აღსანიშნავი ის გარემოებაც, რომ გამგებლის ბრძანების შესაბამისად ხდებოდა ბიუჯეტში ცვლილებები (დაზუსტება). ამასთან, იგივე სახის ცვლილება ხორციელდებოდა საკრებულოს მიერ ბიუჯეტში შეტანილი ცვლილებებით.
ანუ ერთი და იგივე ცვლილებაზე გამოცემულია ორი აქტი _ გამგებლის ბრძანება და საკრებულოს დადგენილება, როცა ბიუჯეტში გატარებულია ერთი ცვლილება, რაც არასწორია. უნდა მოხდეს ან ორივე ცვლილების გატარება დამტკიცებულ და დაზუსტებულ ბიუჯეტში, ან უნდა გაუქმდეს გამგებლის ბრძანებით გაწეული ცვლილებები საკრებულოს მიერ მიღებული დადგენილებისთანავე.
წინააღმდეგ შემთხვევაში, შეიძლება ითქვას, რომ ბიუჯეტის შესრულების აღრიცხვა არასწორად მიმდინარეობს და შესაბამისად, ბიუჯეტის შესრულების ანგარიში არასწორია,“ _ წერია დასკვნაში და იქვე განმარტებულია, რომ ანალოგიური მდგომარეობაა გამგებლის ბრძანებებს საფუძველზე ასიგნებების გადანაწილების შემდეგ ბიუჯეტში ცვლილებისას.
