ქალაქ ოზურგეთის მუნიციპალიტეტის საკრებულოს დეპუტატები ლევან მგელაძე, ნათია შარაშენიძე და თამარ ნადირიძე მედიის წარმომადგენლებთან აცხადებენ, რომ იმ ადგილზე, სადაც ქალაქ ოზურგეთის მერის მანქანა ჩერდება სხვა მანქანების გაჩერება არ შეიძლება.
ლევან მგელაძე ამბობს, რომ ამ დილით, როდესაც მანქანა დააყენა ქალაქ ოზურგეთის მერიის შენობის მიმდებარე ტერიტორიაზე, მასთან მივიდა მერიის თანამშრომელი აბესალომ სარიშვილი და მას მოთხოვა მანქანა გადაეყვანა სხვა ადგილზე.
"რის საფუძველზე ხდება ამ ბრძანების შესრულება არ ვიცი, მაგრამ ფაქტი ის არის, რომ თურმე სადაც მერის მანქანა ჩერდება, იქ არ უნდა გაჩერდეს სხვა მანქანები" – ამბობს ლევან მგელაძე.
მისივე თქმით, ის ესაუბრა ქალაქ ოზურგეთის მერს ბეგლარ სიორიძეს.
"მერმა მითხრა ასეთი რამ: როდესაც შენ გახდები ქალაქის მერი, თავისუფლად შეგეძლებათ მანქანის გაჩერება." – გვითხრა ლევან მგელაძემ.
"ქალაქ ოზურგეთის მერმა მეც მითხრა, რომ მანქანა იმ ადგილას არ დამეყენებინა, სადაც მისი მანქანა დგას. თავად მითხრა ეს სიტყვები" – თქვა ნათია შარაშენიძემ.
ქალაქ ოზურგეთის მერიის თანამშრომელი, აბესალომ სარიშვილი "გურია ნიუსთან" საუბრის ამბობს, რომ ის არის კანონმდებელი და მან უთხრა დეპუტატებს მერიის შენობის წინ, სადაც ქალაქ ოზურგეთის მერის მანქანა ჩერდება, იქ არ გაეჩერებინათ მანქანა.
"ყველა გავაფრთხილე ხუთი დღის წინ. მერიის შენობასთან არის ისეთი ადგილები, სადაც შეუძლიათ დააყენონ საკუთარი მანქანები და არავინ არაფერს არ ეტყვის. დეპუტატების ერთ ნაწილს მაინცდამაინც სურს იმ ადგილას დააყენოს მანქანა, სადაც მერის მანქანა ჩერდება. ეს არის მათი მხრიდან ახირება" – გვითხრა აბესალომ სარიშვილმა.
"გურია ნიუსი" ამ თემასთან დაკავშირებით მუშაობს და ქალაქ ოზურგეთის მუნიციპალიტეტის კომენტარს მიღებისთანავე შემოგთავაზებთ.
