საქართველოს პარლამენტის საგარეო ურთიერთობათა კომიტეტის თავმჯდომარეს, თედო ჯაფარიძეს 2015 წლის იანვრიდან 2016 წლის აპრილამდე საზღვარგარეთ 53 ოფიციალური ვიზიტი ჰქონდა, რაც ბიუჯეტს ჯამში 619 575 ლარი დაუჯდა.
ამის შესახებ "გურია ნიუსის" მიერ პარლამენტიდან გამოთხოვილ ინფორმაციაშია აღნიშნული.
ჩვენთვის მოწოდებული დოკუმენტაციის თანახმად, 2016 წლის იანვრიდან აპრილის ჩათვლით თედო ჯაფარიძეს საზღვარგარეთ 12 ოფიციალური ვიზიტი ჰქონდა, რაშიც ჯამში 34 127 76 ლარი დახარჯა. მივლინებებში კი, მან 41 დღე გაატარა. მათ შორის, იმყოფებოდა რიგაში, ბრიუსელში, სტრასბურგში, სოფიაში, ელ-დიარდში, ელ-ქუვეუთში, ბრიუსელში, ჟენევაში, პარიზსა და ბერლინში.
რაც შეეხება 2015 წლის ვიზიტებს, პარლამენტიდან მოწოდებული ინფორმაციით, ჯაფარიძეს საზღვარგარეთ 41 ვიზიტი ჰქონდა. ყველაზე ძვირიანი ვიზიტები კი, ამერიკის შეერთებულ შტატებში იყო.
ჯაფარიძის 24-29 სექტემბრის აშშ-ში ვიზიტი ბიუჯეტს 28 021.95 ლარი დაუჯდა, ხოლო 17-30 ივლისის ვიზიტი ვაშინგტონში 23 876 ლარი დაჯდა. კიდევ ერთი ვიზიტი აშშ-ში 1-8 მარტს, 19 357.98 ლარი დაჯდა, ხოლო ქალაქ კეიპტაუნში გატარებული 5 დღე (31.05-4-06) ბიუჯეტს 16 807.86 ლარი დაუჯდა.
რაც შეეხება 2015 წლის მივლინებების საერთო ჯამურ თანხას, 585 448 ლარია.
"გურია ნიუსი" პარლამენტის წევრებისა და პარლამენტის აპარატის თანამშრომელთა მივლინებებში დახარჯული თანხების შესახებ ინფორმაციას ეტაპობრივად შემოგთავაზებთ.
შენიშვნა: შინაარსის სანახავად დააკლიკეთ ფოტოზე
ამავე თემაზე:
